Петнаесет лица се убиени а четиринаесет се ранети во терористички напад во кинеската покраина Синџиајнг каде што живее голема заедница на муслиманското ујгурско малцинство, објавија во саботата државните кинески медиуми.

Според државната телевизија CCTV, терористичката група во петокот нападнала локални жители во околината на градот Шаче, кога загинале четири лица, а 14 биле ранети. Единаесет напаѓачи се убиени подоцна во судирот. Агенцијата Синхуа јавува за истиот број жртви, повикувајќи се на локалните власти.

Во петокот рано утрото по локално време, напаѓачите фрлиле експлозив врз минувачи во фреквентна улица со продавници, а пота ги нападнале со студено оружје. На местото на нападот се запленети експлозиви, секири и ножеви, а ранетите се превезени во болница, се додава во извештајот на Синхуа.

Во округот Шаче, или Јарканд на ујгурски јазик, во јули годинава избија жестоки судири пред крајот на муслиманскиот празник рамазан. Автономната област Ујгурија-Синџијанг последните години е потресувана од безредија со многу жртви, поради нетрпеливоста меѓу доминантниот народ Хан и Ујгурите, туркофони муслимани. Официјален Пекинг тврди дека станува збора за исламски фундаментализам и дека екстремните Ујгури се поврзани со талибаните и други исламистички движење, во Пакистан, поради што е отворен дијалог со владата во Исламабад.

Агенцијата AFP наведува дека овој напад се случува поради големата кампања од последните месеци во којашто кинеските власти уапсија стотици лица под обвинение за тероризам, од кои десетици беа погубени по нападите во коишто беа убиени десетици припадници на заедницата Хан, напаѓани на железнички и автобуски станици, како и на пазари. Беа, исто така, во Синџијанг беа регистрирани и напади врз полициски станици.

Агенцијата, исто така, наведува дека нападот доаѓа пет дена откако студентите на затворениот ујгурски интелектуалец Илхам Тохти тајно биле изведени пред суд, кои, како и нивниот професор, се обвинети за сепаратизам. Четири дена претходно кинескиот апелационен суд ја потврди доживотната затворска казна за Тохти, кој подолг период преку западните медиуми предупредуваше на прогон на Ујгурите во Синџијанг. AFP тврди дека тој не повикувал на отцепување на покраината, и дека Ујгурите се жалат оти во Кина се жртви на дискриминација и прогон.

Во последните 18 месеци во Синџијанг се убиени неколку стотици луѓе, меѓу кои и имам од главната џамија во Кашгар, град на некогашниот Пат на свилата, кого ујгруските екстремисти го сметаа за човек близок на кинеските власти.

Синџијанг е безбедносно најнестабилниот регион во Кина. На територијата на овој регион, според властите во Пекинг, дејствува терористичката организација Источен Туркестан, за која постојат сомневања дека е поврзана со глобалната терористичка мрежа Ал Каеда.

Кина и претходно ги обвинуваше ујгурските сепаратисти и верските екстремисти за серија напади во покраината Синџијанг и тврди дека сакаат да формираат независна држава којашто ќе ја нарекуваат Источен Туркистан базирана на екстремните исламистички прописи. Ова тврдење не е далеку од вистината, бидејќи последните години повеќе ујгурски активисти ја потенцираат нивната етничка поврзаноста со турската популација. Организациите за човекови права, пак, сметаат дека Пекинг ги предимензионира овие закани. Некои групи за заштита на човековите права, пак, тврдат дека Кина претерува со овие обвинувања, за да ја оправда својата политика на цврста рака.

Немирите досега не беа проширени надвор од покраината Синџианг, иако се претпоставува дека од 1997 година радикалните Ујгури се одговорни за бомбашки напади во кои се убиени повеќе стотици лица во некои слични такви напади.

Ујгурите сочинуваа повеќе од 40 отсто од вкупно 21 милиони жители на овој регион. Повеќето од нив се населени во Кашгар и другите јужни делови на провинцијата и во последните години искажуваат незадоволство од нивниот статус во општеството

Покраината Синџијанг зазема една шестина од вкупната државна територија на Кина граничи со Авганистан, Пакистан, Индија и Централната Азиска Република, а богата е со нафта, гас и јаглен. Автохтоното население се туркофони муслимани Ујгури, но во децениите населување на покраината со мнозинскиот кинески народ Хан од другите делови на Кина, денес во Синџианг Ујгурите се помалку од половината од населението.

Постојаните тензии поради големите рестрикции на ујгурската јазична, културна и верска автономија кулминираа во јули 2009 година, кога во насилните судири меѓу Кинезите од народот Хан и етничките Ујгури во главниот град на провинцијата Уримкви, загинаа околу 200 луѓе, претежно припадници на народот Хан. Од тогаш кинеските власти погубија десетина лица осудени за поттикнување на насилни судири, уапсени и кривично гонети се стотици други, а безбедносните мерки се заострени во целата покраина. Во април 2013 година во близина на Кашгар, пак, во меѓуетничките судири загинаа 21 лице../крај/мф/сн

Извор: Макфакс