Демократскиот сојуз предлага претседателот на државата, Владата и најмалку 20 пратеници да побараат да се свика итна седница на Собранието на Република Северна Македонија, на која ќе се расправа за вонредната состојба, причините и за ефектите од нејзиното воведува, потребата од продолжување, како и за мерките што се преземаат за спречување на коронавирусот Ковид-19, поставеноста и дејствувањето на здравствениот систем, функционирањето на безбедносниот систем и економските аспекти на кризата.

Демократскиот сојуз верува дека парламентот треба да отвори и сериозна расправа за издржаноста и оправданоста на мерките, подготовките за нивно олабавување, дали постои план за постепено активирање на бизнисот, враќање на животот во нормала, како и заштитата на човековите права.

Партијата укажува дека во согласност со Уставот, Законот за Собранието и Деловникот (член 5) за работа на Собранието, Собранието е во постојано заседание и мандатот на пратениците трае сè до верификација на мандатот на новоизбраните пратеници.

„Не постојат уставни и законски пречки да се свика парламентот, но политички постојат, поради тоа што многу од актуелните пратеници не се на кандидатските листи за пратеници. Можеби е тоа мотивот за блокада на парламентот. Инаку, нема никаква основа Талат Џафери и натаму да се спротивставува да свика седница на парламентот и на тој начин да оневозможува тој да биде вклучен во надминување на кризата од пандемијата“, велат од Демократскиот сојуз.