Македонија
Препораки за пациентите со малигни заболувања и лица од особен ризик поврзани со Ковид-19
Пациентите кои страдаат од онколошки или хематолошки заболувања, како и други болести поврзани со имуносупресија (на пр. вроден недостаток на имуниот систем, трансплантација на органи или хематопоетски матични клетки, автоимуни болести кај кои е неопходен имуносупресивен третман), се особено изложени на ризик поврзан со инфекции предизвикани од респираторни вируси, како што е грипот. Ризикот од хоспитализација на лица со карцином како резултат на САРС-КоВ-2 вирусот е поголем отколку кај лица со споредлива возраст.
Бидејќи во моментов нема конкретни вакцини или антивирусни лекови против инфекција со вирусот САРС-КоВ-2, дефинирани се препораки што важат за сите пациенти и се темелат на засилена хигиена и рестрикција на контакти. Хигиената и честото миење раце, како и избегнување на допирање на лицето се основните препораки, како и избегнување посети во домот на пациентот од страна на семејството или пријатели, без разлика дали имаат респираторни симптоми. Основно е да се избегнуваат, кога е можно, места каде има повеќе луѓе. Надвор од дома, а особено при посети на болница за терапија или третмани, неопходно е да се носи маска за еднократна употреба која треба да ги покрива устата и носот и не смее да се допира со рацете откако ќе се намести.
Клиниката за онкологија ги спроведува сите неопходни и препорачани мерки за заштита од ширење на инфекцијата со вирусот со цел пациентите да може навремено и безбедно да ја примаат терапијата. Пациентите кои примаат зрачна, хемо или биолошка терапија не смеат никако сами да го прекинуваат третманот, туку мора да се консултираат со својот онколог дали има потреба од модификација на терапијата и како е најдобро истото да се спроведе.
Една од препораките е доколку е соодветно, да се одложи рутинската контрола во договор со онкологот кај оние пациенти кај кои терапијата е веќе завршена, а со цел да се ограничи посетеноста на здравствените установи кога не е неопходно и со тоа да се ограничи ризикот од изложеност на САРС-КоВ-2.
Во клинички услови се препорачува да се поделат онколошките и онко-хематолошките пациенти во групи, и тоа пациенти кои го завршиле терапевтскиот дел, односно пациенти кои не се на терапија, а одделно оние пациентите кои сè уште се лекуваат, потоа во посебна група пациентите на цитостатичен и зрачен третман, кои се со поголем ризик од заразни компликации, а издвоени треба да се и пациентите на третман со имунотерапија. Пациентите кои биле подложени на операција за карцином, исто така, можат да бидат изложени на зголемен ризик од Ковид-19, па треба да ги спроведуваат сите мерки за самозаштита.
Исто така, со цел поголема заштита Министерството за здравство ќе ја дистрибуира терапијата за пациентите за дел од онколошките заболувања, во регионалните онколошки центри. Така, пациентите за кои е возможно терапијата да ја примаат во локалните центри, нема да мораат да доаѓаат во Клиниката за онкологија за да примат терапија, туку тоа ќе можат да го сторат во најблиската болница. Потребно е само претходно да се консултираат со својот онколог во однос на точниот термин и локацијата, центарот каде ќе може да ја примат терапијата. Дисперзијата на дел од онколошката терапија е направена со цел поголема заштита на пациентите и да се намали ризикот од нивно изложување на вирусот.
И покрај зголемениот ризик од инфекции кај онколошките пациенти кои се на третман за својата болест, сепак основно е да знаат дека треба пред сè редовно да ја примаат својата терапија, треба самите себе да се заштитат со тоа што сите контакти поврзани со својата болест или терапијата да ги сведат на неопходен минимум и ќе бидат во постојана консултација со својот доктор за да ги дознаат навреме сите информации и новости.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ќе ја замени градоначалничката фотелја и ќе биде гласот на народот: Блерим Беџети ќе делува како пратеник
Градоначалникот на Општина Сарај и актуелен организациски секретар на ДУИ, Блерим Беџети, соопшти дека градоначалничката фотелја ќе ја замени за пратеничка.
Преку неговиот Фејсбук статус вели дека отсега ќе делува како пратеник во Собранието на Република Македонија и дека ќе биде гласот на волјата на народот.
„Од денеска започнува моето ново патување како пратеник во Собранието. Ветувам дека ќе бидам гласот на волјата на народот и ќе докажам дека легитимитетот на албанскиот глас му припаѓа на Европскиот фронт. Продолжуваме обединети за европска држава и подобар економски развој“, напиша Беџети на Фејсбук.
Тој беше пратеник од 2006 до 2009, а и министер за правда во периодот 2011-2014 година.
Македонија
Сончево со мала до умерена облачност, попладне наместа со локално невреме, пороен дожд и грмежи
Времето денеска сончево со мала до умерена облачност. Попладне наместа ќе биде нестабилно со пороен дожд и грмежи, а локално ќе има услови за краткотрајно невреме со интензивен пороен дожд, засилен ветер и услови за појава на град. Минималната температура ќе биде во интервал од 5 до 13, а максималната ќе достигне од 21 до 29 степени. УВ=6
Во Скопје, времто ќе биде сончево со мала до умерена облачност, попладне во делови од котлината нестабилно со пороен дожд и грмежи. Минималната температура ќе се спушти до 11, а максималната ќе достигне до 26 степени.
И во четврток ќе има повремен пороен дожд и грмежи, локално во форма на краткотрајно невреме. Од петок дневната температура ќе биде во значителен пораст и на повеќе места ќе биде над 30 степени. Сепак во попладневните часови можна е изолирана појава на пороен дожд и грмежи.
Македонија
Мицотакис: Очекувам од новиот премиер изјава дека името на неговата земја е Северна Македонија и тоа ќе го користи во и вон неговата земја
„Очекувам од новиот премиер да даде јасна изјава дека го почитува Договорот од Преспа и дека името на неговата земја е Северна Македонија и тоа ќе го користи во и вон неговата земја“ рече грчкиот премиер Кирјакос Мицотакис во интервју за телевизијата Стар.
Говорејќи за надворешната политика, тој се осврна и на односите со Северна Македонија, посочувајќи дека Атина се стреми кон добри односи, но неопходно е почитување на Договорот од Преспа.
„Видов некои изјави на претседателката на Северна Македонија и мислам дека направи некои чекори назад од првичните изјави. Ние се стремиме кон добри односи со Северна Македонија, но многупати имаме кажано дека добрите односи поминуваат преку почитувањето на јадрото на Договорот што го потпишаа двете земји“, истакна тој.
„Договорот одреди едно име за сите и ова соседите мора да го почитуваат. И очекувам од новиот премиер, кога и штом ќе положи заклетва да даде јасна изјава дека го почитува Договорот од Преспа и дека името на неговата земја е Северна Македонија и тоа ќе го користи во и вон неговата земја“, кажа грчкиот премиер.