Црна хроника
Осум приведени, десетици повредени и големи материјални штети по саботните инциденти

Осум приведени лица, 13 повредени граѓани, 13 повредени полицајци, еден повреден пожарникар, оштетени возила и објекти, е епилогот од саботните нереди по улиците на Скопје.
Насилниот протест, како што информираат од МВР, не бил пријавен во полиција, а учесниците и предизвикувачите на инцидентите се самоорганизирале преку социјалните мрежи.
Хронолошки, протестот започна во 12:00 часот кај комплексот „Чаирчанка”, по што насобраната група започна да се движи од Јајапашината џамија, преку мостот „Гоце Делчев” кон зградата на Владата. За цело време демонстрантите гласно скандираа „УЧК” и извикуваа разни пароли. Во моментот кога масата демостранти дојде пред Владата, дел од неа се обиде да го пробие полицискиот кордон, со цел да се упати кон плоштадот, на што полицијата реагираше и ја спречи натамошната ескалација. Дел од демонстрантите започнаа со фрлање на камења и тврди предмети и ги нападнаа полициските службеници. Со цел да не дојде до ескалација на инцидентите, Одделот за посебни единици употреби хемиско средство – солзавец, по што демонстрантите започнаа да се повлекуваат назад кон Старата Скопска Чаршија, а притоа ги каменуваа Музејот на Холокаустот, Музејот на ВМРО и новоизградениот Театар.
Во текот на протестот, беа регистрирани и повеќе други инциденти и физички напади во централното градско подрачје, на подрачјето кај Бит Пазар и околните улички во кои се повредени 13 граѓани на кои им е пружена медицинска помош во болниците, а четворица од нив се здобиле со тешки телесни повреди.
Во насилствата повредени се и тринаесет униформирани полициски службеници. Исто така, насилниците оштетиле осум приватни патнички моторни возила, од кои две се превртени.
Извршено е оштетување и на четири полициски возила и тоа: две „Шкода Јети”, еден „Дефендер” и едно комбе. Извршено е каменување на два автобуси сопственост на ЈСП на бул. „Никола Карев”, кај клучката „Детелинка” на Бит Пазар, бр. 61 и бр. 63 , а потоа автобусот со број 61 бил и опожарен. Заради интервенција дошле две возила на Бригадата за противпожарна заштита, кои од страна на хулиганите биле оштетени, а еден пожарникар повреден.
По завршувањето на насилните протести во 18:50 часот на автобуската постојка во с.Морани-Скопје, со камења извршено е оштетување на автобус на ЈСП, кој сообраќал на линија бр.67, при што било скршено странично стакло од левата страна.
Нешто подоцна, околу 19:20 часот во Скопје на ул „Ѓорче Петров” во близина на крстосницата со ул.„Сремски Фронт”, со фрлање камења извршено е оштетување на 3 автобуси кои се движеле во колона, а превезувале учесници и посетители на Конвенцијата за промовирање на кандидати за градоначалници и носители на избирачки листи на НДП.
Во 22:00 часот во непосредна близина на бензинската пумпа „Макпетрол” во нас.Драчево, бил каменуван автобус сопственост на ЈСП кој сообраќал на линија бр.67, при што било скршено странично стакло, а околу 22:40 часот во Скопје, на бул.„Едвард Кардељ”, спроти „Светлост” бил каменуван уште еден автобус на ЈСП, при што било искршено стакло на левата страна на автобусот. Десетина минути подоцна на ул.„Првомајска” во нас.Пинтија, бил каменуван и автобус на ЈСП кој сообраќал на линија бр.70, при што била оштетена шофершајбната.
Во врска со инцидентите, по полициската интервенција беа приведени и задржани осум лица, а врз основа на објавените снимки во медиумите и на социјалните мрежи се работи на идентификување и на останатите насилници. По целосно документирање на делата против приведените ќе биде поднесена соодветна пријава.
За претходниот петочен протест, СВР-Скопје поднесе кривична пријава до надлежното ОЈО-Скопје против 19 лица на возраст од 14 до 44 години, од кои 15 од Скопје, двајца од Битола и по еден од Штип и Прилеп, а поради основано сомнение дека сториле кривично дело „Учество во толпа што ќе изврши кривично дело”.
МВР повторно апелира граѓаните да не дозволат да бидат манипулирани и заради туѓи интереси да се инволвираат и да предизвикуваат разни инциденти.
„Полицијата ќе продолжи крајно неселективно, без никаква толеранција да ги санкционира оние што ќе ги прекршат законите”, велат од МВР. /крај/мф/ач
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Притворен 53-годишен дилер од Велес, продал кокаин за 50.000 евра

Основното јавно обвинителство Велес донесе наредба за спроведување истражна постапка против едно лице за кое постои основано сомнение дека сторило кривично дело – Неовластено производство и пуштање во промет наркотични дроги, психотропни супстанции и прекурсори.
„Осомничениот 53-годишник, на 29 ноември 2024 година, неовластено продал 994,8 грама кокаин на лице од Велес. Дрогата се договориле да му ја продаде за 50.000 евра, од кои околу половина од сумата купувачот-сведок оставил на договорена локација пред преземањето на пратката.“, соопшти Обвинителството.
Кокаинот тогаш беше откриен при истрага и претрес во куќа на улицата „Петар Алчев” во Велес, каде се утврди дека еден осомничен преработувал кокаин и тоа од чист кокаин во крек кокаин, а уште две лица во тоа му помагале. Против тие осомничени веќе е изречена првостепена осудителна пресуда, а со дополнителни дејствија се утврди идентитетот и на лицето кое првично ја продало дрогата.
По предлог на јавен обвинител, судија на претходна постапка од Основниот суд во Велес донесе решение со кое на осомничениот му определи мерка притвор.
Црна хроника
Битолчанка сакала да ги убие своите баба и дедо, ги избодела со нож

Полицијата приведе жена од Битола која со нож ги избодела своите баба и дедо.
„По овластување на јавен обвинител од Основното јавно обвинителство Битола, екипи на МВР извршија увид на лице место во куќа на улицата „Солунска“, каде според првичните сознанија, внука при вршење семејно насилство се обидела да ги лиши од живот сопствените баба и дедо, нанесувајќи им повеќе убоди со нож“, соопшти Обвинителството.
Јавниот обвинител издаде повеќе наредби и насоки за целосно расчистување на настанот. Осомничената е лишена од слобода и се постапува за обезбедување докази.
Црна хроника
Полициска акција во Велес: пронајдени кокаин и над 30.000 евра

Одделот за криминалистичка полиција, Одделот за сузбивање на организиран и сериозен криминал и СВР Велес, во координација со јавен обвинител, на подрачјето на Велес спроведоа заедничка и координирана истрага против лица за кои постојат информации дека се инволвирани во случајот на купопродажба на еден килограм кокаин, кој беше запленет на 29.11.2024 и за кој СВР Велес поднесе кривична пријава против три лица.
Како дел од истрагата, денеска (11.06.2025), со наредби од Основен суд Велес, беа извршени претреси на повеќе локации во Велес и велешко.
Претреси беа извршени во куќата на А.В.(53) во Велес, во куќата, станот и викенд куќата на лицето С.С.(47) во Велес и Чашка, во куќа и плац на А.Ц.(29) во Велес и во станот на В.Л.(41) во Велес.
За време на претресите биле пронајдени и одземени кокаин, околу 37.000 евра, дигитална вага со остатоци од кокаин, мобилни телефони и други предмети за кои постои сомнение дека потекнуваат од кривично дело. Исто така, во текот на денот СВР Велес ќе поднесе кривична пријава против уште едно лице по член 215 од Кривичниот законик.