Свет
Италијанците имаат план за отворање на фабриките, продавниците, кафулињата, но не и за училиштата
Италијанската влада има план да ги отвори фабриките, продавниците, кафулињата, рестораните, па дури и берберниците, но не планира да ги отвора училишта до есен. Милиони Италијанци се многу незадоволни од ова.
„Тоа е комплицирано. Голем е ризикот епидемиолошката крива повторно да скокне ако ги отвориме училиштата“, се обиде да објасни италијанскиот премиер, Џузепе Конте, пред неколку дена.
„Сите студии предупредуваат дека ќе имаме нова експлозија на случаи за една недела или две и не можеме да си дозволиме“, додаде тој.
Сепак, многумина се прашуваат дали навистина нема друга опција.
„Незамисливо е да се рестартира земјата, да се отворат фабриките, работните места и да се испратат родителите на работа, а да ги остават своите деца дома“, смета пратеникот Алесандро Фусачија.
Фусачија, кој беше шеф на кабинетот на поранешниот министер за образование, се прашува зошто опцијата за постепено отворање на училиштата не е разгледана како што тоа го прават другите европски земји.
Во Франција училиштата ќе се отворат постепено во неколку фази почнувајќи од 11 мај. Ќе има максимум 15 ученици во училниците.
Мајка од Рим изјави за ДПА дека е во неволји до гуша поради сегашната состојба.
Додека е на работа, нејзината шестгодишна ќерка е чувана од дадилката, која не ѝ помага со задачите и не ги извршува домаќинските работи.
Таа ја отфрли опцијата да замине на родителско отсуство бидејќи би била помалку платена.
„Мојот поранешен сопруг работи во секторот за туризам и престана да плаќа алиментација во февруари. Не можам повеќе да отсуствувам од работа затоа што едвај ги покривам основните трошоци за живеење“, рече таа.
Владата им обезбеди на семејствата еднократен бонус од 600 евра, а уште еден би можел да се обезбеди со новата владина регулатива.
Министерката за семејство, Елена Бонети, предлага меѓу 80 и 160 евра детски додаток месечно, но не е познато дали владата ќе се согласи со идејата.
Бонети исто така ги охрабрува градоначалниците да ги отворат игралиштата и други јавни места за децата, но притоа да се обезбедат мерки за социјална дистанца.
Во Италија учењето од дома продолжува, а за многу деца не е соодветно поради слабиот пристап до интернет.
„Се обидувате да го слушате наставникот додека го користите мобилниот телефон на чичко ви со скршен екран, позајмувате Wi-Fi од вашиот сосед, слушате куче што лае, брат што плаче или мајка што чисти со правосмукалка“, напиша учителката за основно училиште, Мелина Зербо, во отворено писмо.
Зербо ја нагласува потребата за социјализација и играње со децата и тинејџерите надвор и предупредува на психолошка штета ако се пролонгира нивната социјална изолација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија распиша потерница по Зеленски, се огласи Украина
Украинското Министерство за надворешни работи соопшти дека издавањето налог за апсење од страна на Русија за претседателот Володимир Зеленски е „доказ за очајот на руската државна машина и пропаганда“, пишува „Украинска правда“.
„Руските извештаи за наводното додавање на украинскиот претседател Володимир Зеленски на потерницата на руското Министерство за внатрешни работи го покажуваат очајот на руската државна машина и пропаганда. Русите не знаат што друго да измислат за да привлечат внимание“, посочија Украинците. надвор.
„Ги потсетуваме сите дека, спротивно на безвредните руски најави, налогот на Меѓународниот кривичен суд за апсење на рускиот диктатор Владимир Путин под обвинение за воени злосторства е реален и спроведлив во 123 земји“, додаваат тие.
Русите не го прецизираа написот врз основа на кој е издаден налогот за апсење на украинскиот лидер. „Володимир Александрович Зеленски, 25 јануари 1978 година. Се бара според членот од Кривичниот законик“, стои во базата на податоци на веб-страницата на руското Министерство за внатрешни работи.
Базата на податоци го наведува и местото на раѓање на бараното лице, градот Кривиј Рих во регионот Дњепропетровск. Објавена е и фотографија од Зеленски, направена пред војната.
Свет
НАТО започна огромни вежби, за Русија: Тоа е подготовка за војна
Четиримесечните воени вежби на НАТО во близина на границите на Русија, наречени „Непоколеблив бранител“ се доказ дека алијансата се подготвува за потенцијален конфликт со Русија, изјави портпаролката на руското Министерство за надворешни работи, Марија Захарова.
Захарова неделава ги отфрли обвинувањата на НАТО дека Русија води хибридна војна против нејзините членки, тврдејќи дека тоа е дезинформација со цел да се одвлече вниманието од активностите на алијансата.
НАТО е тој што води хибридна војна против Русија, поддржувајќи ја Украина со оружје, разузнавачки информации и финансии, рече таа.
„Во моментов, најголемата вежба на НАТО од Студената војна, Непопустлив бранител, се одржува во близина на руските граници. Според нивното сценарио, акциите на коалицијата против Русија се практикуваат со користење на сите инструменти, вклучително и хибридно и конвенционално оружје“, продолжи Захарова.
„Мора да признаеме дека НАТО сериозно се подготвува за потенцијален конфликт со нас“, рече Захарова.
Најавувајќи го почетокот на вежбите во јануари, НАТО најави дека на нив ќе учествуваат 90.000 војници, кои ќе го вежбаат сценариото американските сили да им помагаат на Европејците во земјите кои граничат со Русија и на источното крило на алијансата доколку конфликтот се разгори.
Вежбите ќе траат до мај, пишува Ројтерс.
Свет
Во Мексико трагаа по исчезнати туристи од САД и Австралија, пронајдоа три тела
Мексиканските власти пронајдоа три тела во областа Долна Калифорнија за време на потрагата по исчезнати туристи. ФБИ соопшти дека телата биле пронајдени во градот Санто Томас и се уште не се идентификувани. Австралијците Џејк (30) и Калум Робинсон (33) и Американецот Џек Картер Роуд (30) сурфале во близина на популарното туристичко место Енсенада. Исчезнаа на 27 април, пишува Би-Би-Си.
Мексиканската полиција во четвртокот испрашувала жена и двајца мажи во врска со нивното исчезнување. Пред да бидат пронајдени телата, во областа беа пронајдени напуштени шатори, запален бел пикап и мобилен телефон поврзан со исчезнатите туристи.
Долна Калифорнија е меѓу државите во Мексико со највисоко ниво на насилство додека локалните нарко банди се борат за територија. И покрај тоа, туристите често ја посетуваат областа поради добрите услови за сурфање.