Црна хроника
Кежаровски: Јас сум само новинар, никого не сум загрозил
На првото судско рочиште во случајот „Ликвидација“, приведениот новинар Томислав Кежаровски се чудеше на името на акцијата, а рече дека иако е само новинар кој ја информира јавноста, сепак е третиран како криминалец.
„Не ми е јасно зошто се вика акцијата ‘Ликвидација’. Ја сум само новинар кој ја врши работат да ја информира јавноста. Случајот Ореше требаше да ја открие гнилоста на институциите. Но не успеав да ги исчистам децениските криминални односи во судството и полицијата. Вперувањето пушка в глава пред ќерка ми е порака кон сите кои се критички насочени“, рече Кежаровски пред судот пренесоа македонските медиуми.
Тој смета дека сакаат намерно да го уништат, иако не загрозил ничија слобода ни живот.
„Само работев како новинар, а сега сум третиран како криминалец. Некој намерно сака да ме уништи како личност, нарачателите треба да знаат дека лагата е лоша. Со моето апсење се затвори медиумскиот простор, се колнам дека не сум загрозил ниту живот ниту слобода“, рече Кежаровски.
И останатите седуммина обвинети, меѓу кои има обвинител, судии и адвокати се изјаснија за невини.
На почетокот од процесот Судот донесе решение со кое ги отфрли предлозите на бранителите на обвинетите за негово прогласување за ненадлежен по однос на обвинението за незаконско посредување на дел од обвинетите.
Според адвокатите на обвинетите во случајот „Ликвидација“ каде на обвинителна клупа е и новинарот Томислав Кежаровски, изјавија дека процесот уште на стартот имал многу недоследности.
„Кривичното дело за кое се товарат обвинетите повеќе не постои. Обвинителството и натаму ги обвинува за противзаконско посредување. Процедурата е прекршена. Не ни се дадени докази на увид, ниту наредбите за посебни истражни мерки да видиме дали се спроведени законски. Најголем дел од мерките се снимки без аудио запис. Тоа е апсурд. Кај судот е и силата и секирата, а нашите аргументи и можности се лимитирани“, изјави адвокатот Тортевски.
Обвинетите се товарат за примање поткуп, злоупотреба на службена должност, неовластено откривање сведоци, недозволиво поседување оружје и друго. Кежаровски беше приведен поради текст објавен пред пет години во кој го открил идентитетот на заштитен сведок.
Акцијата „Ликвидација“ се подготвувала со години, соопшти МВР. Случајот е поврзан со убиството на 74-годишниот Лазар Милошевски во 2005 година во велешкото село Ореше.
Осомничени за убиството беа браќата Ордан и Љупчо Ѓорѓиевски, а како нарачател се спомнуваше Ѓоре Петровски, Македонец што живее во САД.
Во март годинава, тројцата обвинети беа ослободени од вина.
Од Иницијативниот одбор за ослободување на Кежаровски очекуваат новинарот да биде пуштен да се брани од слобода, а потоа Судот да донесе правична пресуда./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.