Грижата за повредените во пожарот во Кочани ќе биде долгорочна, ќе трае онолку години колку што ќе имаат потреба и целото лекување ќе биде на сметка на државата, кажа денес директорот на Фондот за здравствено осигурување, Сашо Клековски. Централна болница за лекување и терапија ќе биде болницата во Кочани каде што се податоците за сите пациенти. Државата во континуитет ќе ја обезбедува и менува компресивната облека за повредените до две години, колку што експертите советуваат дека треба да се носи.

„Компресивната облека која сега ја користат 58 лица за други делови на телото освен врат и лице, за врат и лице се осуммина, значи вкупно 66 лица. Ова е процес што ќе трае бидејќи се уште имаме 10 повредени лица кои се во болници. Имаме уште некои 15 лица на кои најверојатно во наредниот период ќе им бидат земени мерки, значи процесот трае и ќе се адаптира. Морам да кажам дека ќе трае две години. Препораките за употреба на компресивната облека е до две години и во тој период најмалку неколкупати на неколку месеци ќе треба да се замаат нови мерки за облеката, да се менува, да се адаптира“, рече директорот Клековски.

Компресивните маски, Клековски објасни дека ги прават во соработка со водечка фирма од Германија, а во грижата за повредените се вклучени странски експерти. Физикална терапија е овозможена во Кочани оти така препорачале британските експерти, а допрва се очекува експерт од Словенија за лекувањето на повредните кои имаат ампутации.

„За следниот период веќе поканивме експерти од Израел меѓутоа заради настанатата состојба тоа ќе се одложи на неодредено време бидејќи нема полетувања во моментот од израелските аеродроми. Тоа не значи дека не работиме на други опции. Очекуваме во следниот период да дојде експерт од Словенија, експерт за ампутации за да се погледнат опциите за третман на повредените кои имаат ампутации на прсти“, вели директорот Клековски.

Одобрени се контролни прегледи во болницата Пирогов во Бугарија на шестмина пациенти кои сакале таму да бидат контролирани, а здравствените власти се во постојана комуникација и со белгиските експерти кои беа кај нас, за долгорочни чекори вклучувајќи и лекување во странство доколку е потребно во некоја од наредните фази во третман на повредените.

Директорот Клековски токсична пропаганда ги нарече тврдењата дека ништо не се прави за повредените во Кочани апелираше повредените и семејствата да бидат смирени, да ги почитуваат протоколите и да не брзаат за естетски интервенции.

„Пристапот дека ништо не се прави создава една несигурност и неизвестност кај повредените и нивните семејства и веќе има притисок да брзаат, бараат консултации надвор од воспоставените доктрини и протоколи за третман на изгореници. Сакам да апелирам да има смиреност кај повредените и нивните семејства, имаме комплетна посветеност кон нив, во комуникација сме со соодветните центри за изгореници. Тука би сакал да го повторам тоа дека компресивната облека ќе треба да се користи две години, дека не се препорачува употреба на ласер за третман на изгорениците порано од шест месеци, дека во основа ќе треба да помине веројатно една или две години за да заврши заздравувањето на кожата пред да почнат естетски зафати за подобрување на изгледот. Ќе замолиме за сите прашања во однос на третманот повредените да се консултираат со Општата болница Кочани“, рече директорот Клековски.

Иако со тврдењата дека ништо не се прави се добива впечаток дека градот нема болница, Клековски вели дека болницата во Кочани не е гранапче туку здравствена институција со редовен годишен буџет од четири милиони евра, 50 лекари и 100 медицински сестри.

Израелскиот премиер, Бенјамин Нетанјаху, им се обрати на новинарите пред болницата Сорока во Бершеба, која претходно беше погодена од иранска ракета. Зборувајќи за улогата на САД во регионот, Нетанјаху ја истакна својата доверба во американскиот претседател Доналд Трамп.

„Претседателот Трамп ќе го направи она што е најдобро за Америка. Му верувам на неговиот суд – тој е голем пријател, голем светски лидер, голем пријател на Израел и еврејскиот народ“, рече Нетанјаху.

„И ние ќе го направиме она што мораме да го направиме – и го правиме тоа. Ние сме посветени на елиминирање на заканата од нуклеарно уништување што се надвиснува над Израел“, рече тој.

Тој, исто така, ја нагласи важноста на соработката меѓу САД и Израел.

„Морам да кажам дека партнерството со Соединетите Американски Држави, партнерството со претседателот Трамп, со кого разговарам речиси секој ден – е неверојатно. Мислам дека неговата решителност, неговата цврстина и јасност кога вели дека Иран не може да има нуклеарно оружје – е несомнена“, рече Нетанјаху.

„За да се постигне ова, Иран не смее да збогатува ураниум. Толку е едноставно“, рече тој, додавајќи: „Тој им даде можност да го решат ова преку преговори, а тие го одложуваа. И не го одложувајте Доналд Трамп – тој ја знае играта.“

На прашањето дали САД ќе се приклучат на нападите, Нетанјаху рече дека тоа е само одлука на претседателот Трамп, но додаде дека САД веќе многу помагаат, особено во одбраната на израелскиот воздушен простор.

Тој се пожали дека неговиот син морал двапати да ја откаже својата свадба поради тревогата.

Според новинската веб-страница Ynet, Нетанјаху рекол: „Целиот израелски народ ја плаќа цената. Минуваме низ напади, и тоа го поминуваме на неверојатен начин.“

„Луѓето се повредени, семејствата ги загубија најблиските. Секој од нас плаќа лична цена, а моето семејство не е исклучок – мојот син Авнер мораше да ја откаже својата свадба по втор пат поради ракетните закани. Тоа е лична цена за неговата свршеница, и морам да кажам дека мојата драга сопруга е хероина, и таа плаќа лична цена“, рече тој.

Претседателот на СДСМ, Венко Филипче, вечерва укажа на, како што рече, драматичниот пад на поддршката за ВМРО-ДПМНЕ, економскиот колапс и лицемерното однесување на Владата, која, како што рече, наместо резултати, нуди само пропаганда.

„Нашите информации се дека ВМРО-ДПМНЕ има изгубено 100 илјади гласови до сега. Таков пад на гласовите, таков дебакл до сега во историјата на државата за толку кратко време едноставно не се случил“, изјави Филипче.

Тој предупреди дека власта се обидува да ја покрие реалната состојба во државата со агресивна ПР-пропаганда, но, како што рече, граѓаните не се наивни.

„Не затрупуваат со информации, со пропаганда, со ПР дека прават економски бум. Што се случи? Бум слушнавме само со тоа што треснавме на земја. Евростат излегува со податоци дека сме последна земја во Европа според економската стапка“, потенцираше Филипче.

Според него, Мицкоски говори за вредности, отчетност и транспарентност, но со секој чекор ја демантира сопствената реторика.

„Зборува за транспарентна работа, зборува за отчетна работа, зборува за некаков систем на вредности, а ако навистина ја вршат работата како што треба, нема да има потреба да зборуваат за тоа. Нема да имаат потреба да зборуваат како владата и институциите треба да работат во интерес на граѓаните, ако јавната администрација сама работи така“, истакна Филипче.

Тој потсети дека кога институциите се навистина чесни и ефикасни, резултатите сами зборуваат, без да се замајува јавноста со празни приказни.

„Нема да има потреба да им зборуваат за фотелји, за клупи и за гајби на граѓаните ако навистина работат чесно. Факт е дека тоа не го прават на тој начин“, нагласи претседателот на СДСМ.