Работник од Пехчево пронашол коски кои наликувале на човечки при извршување ископ со багер во кругот на студентскиот дом „Стив Наумов“ во скопската општина Гази Баба.

Како што соопшти МВР, пријавата била поднесена во текот на вчерашниот ден од 39-годишниот Г.Ј. од Пехчево, кој ги извршувал работите во близина на старите гробишта.

По насоки на јавен обвинител, пронајдените коски се подигнати и предадени на вештачење за да се утврди нивното потекло.

Полицијата презема мерки за расчистување на случајот.

Фото: илустрација

Тројца граѓани се здобиле со тешки телесни повреди во три одделни сообраќајни несреќи што се случиле на 24 октомври во Скопје и Битола, соопшти МВР.

Во 19:15 часот во скопското село Марино, на крстосницата од улиците „532“ и „531“, се судриле патничко возило „Тојота Рав 4“ управувано од 63-годишниот Г.Т. од Марино и мопед со кој управувал 32-годишниот С.Г. од Скопје. Мопедистот се здобил со тешки повреди и бил пренесен во Комплекс клиники „Мајка Тереза“.

Неколку часа порано, во 17:42 часот, на регионалниот пат Битола–Новаци, патничко возило „Хјундаи“ со битолски регистарски таблички, управувано од 48-годишниот Ј.С. од Битола, излетало од коловозот. Возачот е тешко повреден и е хоспитализиран во битолската Клиничка болница.

Во уште една несреќа, што се случила во 10:30 часот во Скопје, на крстосницата од улиците „Народни херои“ и „Вера Јоциќ“, автомобил „Фолксваген Голф“, управуван од 65-годишната С.М., удрил во пешак – 76-годишната Ш.П. од Скопје, која со тешки повреди е пренесена во „Мајка Тереза“.

Во сите случаи увид извршиле екипи од Секторите за внатрешни работи во Скопје и Битола, а полицијата работи на целосно расчистување на околностите на несреќите.

Вчера во полицијата во Охрид било пријавено дека настанал пожар во угостителски објект во охридското село Пештани, сопственост на А.П.(44) од истото село.

Пожарот е изгаснат од екипа на Територијалната противпожарна единица Охрид и од сопственикот, кој вдишал чад и бил пренесен во Општата болница во Охрид за укажување помош, соопшти СВР Охрид.

Увид изврши полициска екипа.