11-годишно дете и маж се здобиле со тешки телесни повреди, откако попладнево нивниот автомобил излетал од експресниот пат Прилеп–Градско и паднал околу 40 метри под патот, во населено место.

Детето, според информациите, се наоѓа во критична состојба, додека возачот исто така бил со сериозни повреди. Двајцата повредени се итно префрлени на Клиничкиот центар во Скопје, каде им е укажана лекарска помош. Трето лице, сопатник во возилото, поминал со полесни повреди и е згрижен во болницата во Велес.

Како што информираа од Основното јавно обвинителство Велес, несреќата се случила кога автомобилот марка „Фолксваген Поло“ со скопски регистарски таблички, во остра лева кривина изгубил контрола, удрил во претходно оштетена заштитна ограда и излетал од патот, паѓајќи во длабочина од околу 40 метри.

Јавен обвинител веднаш излегол на терен и извршил увид на лице место, при што издал наредби за технички преглед на возилото, како и проверка на присуство на алкохол кај возачот. Дополнително, подигнати се биолошки и други траги за понатамошно вештачење.

„Собраните материјални докази и резултатите од вештачењата ќе бидат искористени за утврдување на причините за несреќата и евентуалната одговорност“, информираат од Јавното обвинителство.

56-годишна жена од Охрид се здобила со тешки телесни повреди во сообраќајна несреќа што се случила во саботата рано наутро, на кружниот тек од улиците „15-ти Корпус“, „Железничка“, „7 Ноември“ и „Ристо Чадо“ во Охрид.

Како што соопшти полицијата, несреќата се случила на 12 јули 2025 година во 06:40 часот, кога товарно патничко возило „Рено“ со охридски регистарски таблички, управувано од О.Ф. (53) од село Лескоец, удрило во велосипед управуван од В.Л. (56) од Охрид.

Велосипедистката со сериозни повреди била пренесена во Општата болница во Охрид, каде што ѝ била укажана медицинска помош и ѝ биле констатирани тешки телесни повреди.

Извршен бил увид на местото на настанот од екипа на СВР Охрид, а се работи на целосно расчистување на случајот.

Тројца полициски службеници се повредени во сообраќајна несреќа што вчера попладне се случила во Скопје, на кружниот тек меѓу булеварот „Партизански одреди“, улицата „Ѓорче Петров“ и улицата „Ацо Шопов“.

Како што информираат од Министерството за внатрешни работи, несреќата се случила на 12 јули 2025 година околу 15 часот, при судир помеѓу патничко возило „Опел“ со скопски регистарски ознаки, управувано од 29-годишниот Б.Н. од Скопје и службено возило „Крајслер“, сопственост на МВР, управувано од полицискиот службеник В.И. (35) од село Бањане.

Во несреќата со телесни повреди се здобиле возачот В.И. и неговите сопатници, полициските службеници А.С. (28) и И.Б. (26), двајцата од Скопје. На сите тројца повредени им е укажана лекарска помош во Градската општа болница „Св. Наум Охридски“, каде биле констатирани телесни повреди.

На местото на несреќата извршен е увид од екипа на СВР Скопје.