Американските политичари разгледуваат носење закон за воведување поостри санкции против Русија по падот на малезискиот патнички авион во источна Украина, изјави во петокот американскиот сенатор Крис Марфи, а американската амбасадорка во Обединетите нации, ја обвини Москва дека „технички им помогнала“ на поруските бунтовници да го соборат авионот со 298 патници и членови на екипажот, додека рускиот амбасадор предупреди да не се носат предвремени заклучоци за причините за несреќата.

Русија го предупреди Западот и неговите сојузници да не носат прерани заклучоци за тоа кои се причините за несреќата на малезискиот патнички авиони кој во четвртокот попладнето падна на украинска територија под контрола на проруските бунтовници, 60-ина километри од руската граница.На итната седница на Советот за безбедност на ОН, рускиот амбасадор Виталиј Чуркин повика на „непристрасна отворена истрага“. „Зошто украинскиот контролор на летот го испратил авионот во областа каде што траат судири? Во подрачје во коешто се гаѓаат цивилни цели и каде има противавионски системи?“, запраша Чуркин.„Меѓународното право овозможува државата чиишто области се опасни за воздушниот сообраќај привремено да ги затвори. Оттаму треба да се истражи не само несреќата, туку и дали украинските воздухопловни власти ги исполниле своите должности“, истакнал Чуркин.Американската амбасадорка во светската организација, Саманта Пауер изјави дека малезискиот авион „веројатно е соборен со ракетен систем земја–воздух СА-11 од сепаратистичката област во источна Украина“.Пауер додаде дека не е веројатно оти проруските сепаратисти можеле сами да управуваат со системот без помош на оспособени офицери. „Затоа не можеме да ја исклучиме техничката поддршка на руски офицери во управување со системот. Украинците имаат системи СА-11 (според западната номенклатура) …. Но немаме информација дека во таа област имало барем еден украински (ракетен) систем“, рече американската амбасадорка.Москва претходно во петокот објави дека украинскиот ракетен систем „БУК“ бил оперативен на една од позициите од каде би можело да биде лансирана ракета врз цивилниот лет МH17. Според  руското министерство за одбрана, нејзините радарски системи детектирале радарска емисија од позиции кои ги има под контрола украинската војска.„Руската опрема на 17-ти јули детектираше активности на Купол радар, кој е дел од ракетниот систем ‘БУК – М1’ во близина на Стил, село оддалечено 30 километри од Донецк“, соопшти министерството за одбрана на Русија.Во соопштението се додава и дека радарот може да биде употребен за давање податоци на некој друг ракетен систем кој е распореден во овој регион и на кој МН17 му бил во полето на дострелот.Истовремено, сенаторот Крис Марфи, демократ од сојузната американска држава Конектикат и претседател на сенатскиот комитет за Европа, најави дека во текот на претстојниот викенд ќе разговара со влијателните сенатори за „нов закон за санкции“ против Русија. Додаде дека претседателот Барак Обама може самиот да ги поостри санкциите, но доколку се одлучи за поагресивна акцијата, поддршката на пратениците ќе му биде добредојдена. Марфи, како и многу други американски пратеници, сметаат дека би било многу корисно европските држави да се приклучат на ваквата американска иницијатива.Меѓутоа, Европската унија многу помалку од САД е наклонета ко засилени економски санкции за Русија којашто Западот ја смета за одговорна за конфликтот во Украина меѓу прозападните власти дојдени со превратот во март во Киев и проруското население во југоисточните региони. Европа инаку има многу поголема трговска размена со Русија, отколку САД којашто е речиси незначителна, и десетици илјадни западноевропски компании се присутни на големиот руски пазар, покрај делумната зависност на континентот од руските енергенси./крај/мф/сн

Извор: Макфакс