„Сакс фифт авенју“ ја обвитка својата клучна продавница на Менхетн со бодликава и со жилет-жица за да ги спречи крадците да ги искршат излозите, да влезат внатре и да избегаат со скапите производи, дознава „Њујорк пост“.

Компанијата исто така ангажираше и приватни чувари со специјално обучени кучиња за заштита на просториите, по грабежот во славната стоковна куќа „Мејсис“ на Хералд сквер во понеделникот вечерта.

Во „Сакс“, работниците во вторникот попладне почнаа да ја закачуваат бодликавата жица врз иверката што беше претходно поставена за да ги покрие славните излози на луксузната продавница. Во втората фаза од работата, работниците ја засилија оградата со жилет- жица по горниот раб.

Најмалку седум германски овчари и питбул кучиња им прават друштво на чуварите кои ќе ги користат кучињата за патрола надвор од продавницата во обид да ги одвратат ограбувачите.

„Господе, се надевам дека тие нема да се појават и сè ќе одвива непречено“, рече еден чувар, кој предупреди дека кучињата не се пријателски расположени.

Покрај жицата и чуварите, „Сакс“ изнајмил четири огромни рефлектори – по вкупна цена од повеќе од 16.000 американски долари – за да ги осветли улиците околу продавницата.

Њујоршката полиција има пристап до снимка во живо од камерите за надзор на покривот на „Сакс“ и другите блиски луксузни продавници и планира да ги следи протестите како што тече ноќта, соопштија полициски извори. Дополнителни полицајци беа распоредени во областа поради зголемено насилство и грабежи за време на протестите што почнаа во градот во четвртокот.

Неколку стотици демонстранти кои маршираа по Петтата авенија поминаа покрај „Сакс“ кусо по 19 часот, предизвикувајќи гласно лаење од кучињата, а многу луѓе во толпата ги фотографираа возбудените кучиња. Контингент од околу 30 полицајци ги следеше активистите кои маршираа кон север.

Нередите таму и на други места во градот го натераа гивернерот Ендрју Кумо да каже дека градоначалникот Бил де Бласио и Њујорк не си ја завршиле својата работа, а претседателот Трамп да побара активирање на Националната гарда.