Авганистанските талибани во понеделникот ја нарекоа борбената мисија на НАТО предводена од САД „пораз“ и „разочарување“ за меѓународната коалиција ден по одбележувањето на 13-годишнината од инвазијата со којашто беше соборен талибанскиот режим во Кабул, а кое според арапските медиуми минало без свечена церемонија на одбележува на завршувањето на борбената мисија во услови на стравување од напади на радикалните исламисти.

Борбените сили на НАТО од мисијата за Меѓународна поддршка на безбедноста на Авганистан (ИСАФ) во неделата го спуштија знамето, како увод во новата мисија „Решителна поддршка“ со 13.500, од кои 10.800 американски припадници, за помош и оспособување на авганистанските безбедносни сили којашто треба да започне на 1-ви јануари 2015 година, а во која Македонија ќе учествува со 38 припадници на своите вооружени сили – АРМ.

„Ја сметаме оваа етапа за јасна индикација за нивниот пораз и за нивните разочарувања. САД, нивните сојузници, како и сите арогантни меѓународни организации претрпеа очигледен пораз во оваа асиметрична војна“, се истакнува во соопштението на англиски јазик коешто авганистанските талибани го испратија до агенциите во кое се додава и обвинувањето дека силите на НАТО земјата ја довеле до „крвопролевање“.

Авганистанските талибани кои во текот на советската интервенција ја имаа поддршката на Вашингтон, власта во Кабул ја преземаа во 1996 година а беа соборени со западната интервенција кон крајот на 2001 година, под обвинување за давање засолниште на глобалната терористичка мрежа Ал Каеда која ја презема одговорноста за терористичките напади врз САД од 11-ти септември истата година. Талибаните тринаесет години се борат против силите на меѓународните сили и безбедносните сили на авганистанските власти.

Во текот на годината на завршување на борбената мисија на меѓународната коалиција талибаните ги интензивираа нападите. Во надеж дека ќе ја стабилизира земјата во моментот кога НАТО се повлекува од земјата, новиот авганистански претседате Ашраф Гани ги повика талибаните на мировни преговори, но овие го добиваат дијалогот со Кабул.

Според податоците на Обединетите нации судирот во Авганистан е на точката на надминување на 10.000 цивилни жртви, вкупно ранети и убиени во 2014 година. До крајот на ноември годинава, загинале 3.188 цивил а 6.429 се ранети, се наведува во годишниот извештај на силите на ОН во Авганистан – UNAMA.

Бројот на ранетите жени и деца се зголемил за 14, односно за 33 отсто. Моменталните процени говорат дека до крајот на 2014 година комбинираниот број на цивилните жртви на годишно ниво првпат ќе надмине 10.000 откако UNAMA собира статистички податоци“, се наведува во соопштението на ОН во кое се истакнува дека во тековната година е регистриран и рекорден број на терористички напади.

Во однос на минатата 2013 година, оваа бројка претставува пораст за 19 отсто. Досега најголемиот број регистрирани цивилни жртви изнесуваше 3.133 луѓе во 2011 година.

Обединетите нации започнаа да ги следат податоците за цивилните жртви во 2009 година, и досега вкупно се регистрирани 17.252 смртни случаи и 29.536 ранети цивили.

Во периодот кога американските и меѓународните сили го објавија крајот на борбените мисии и ги започнаа подготовките за повлекување од Авганистан до крајот на годинава, рекорден број жртви забележаа и националните безбедносни сили, армијата и полицијата, со повеќе од 4.600 жртви.

Воената кампања на САД со своите 13 години траење стана најдолгата во историјата на земјата, оценува ресурсот Think Progress направи пресек на показателите преку кои прави процена на степенот на оваа војна.

Така, според порталот во вкрстен или ткн пријателски оган, во експлозии на гранати, бомбашки напади, убиства, бомбардирања и ноќни рации во домови загинале 21.000 авганистански цивили.

Во текот на тринаесетгодишните борбени дејствија загинале 2.224 американски и повеќе од илјада странски војници, според Associated Press. Во текот на операцијата „Трајна слобода“ биле ранети 17.674 американски војници, според специјализираниот ресурс за следење на жртвите во војните во Авганистан и во Ирак – iCasualties.org.

Во изминатиот период САД на авганистанските безбедносни сили им доставиле 747.000 единици вооружување. Според експертите консултирани од Think Progress, поголемиот дел од доставеното вооружување, исчезнало и би можело да дојде во посед на талибаните. Најголемата присутност на американски војници во оваа земја изнесувала 140.000 во текот на 2010 година

Се проценува, исто така, дека Вашингтон потрошил 34 милиони американски долари за обезбедување на нови земјоделски култури како грав и соја за авганистанските земјоделци./крај/мф/сн

Извор: Макфакс