Македонија
Запленети девизи, златни монети и накит

Во текот на минатите две недели царинските службеници открија три обиди за нелегално изнесување на готовински платежни средства од државата, еден обид за криумчарење златни предмети, еден обид за внесување фалсификати и еден обид за криумчарење мигранти.
Притоа привремено се задржани:
Девизи
– 25.000 евра, откриени од страна на мобилните царински тимови, при контрола на српски автомобил и личен претрес на двајца српски државјани кои со возилото се пријавиле за излез од државата, на граничниот премин Богородица. Кај двајцата патници биле пронајдени по 10.000 евра, додека во кутијата за прва помош, сместена во багажникот на возилото, биле пронајдени уше 25.000 евра, за кои возачот изјавил дека се негова сопственост. Согласно законските прописи, на патниците им биле вратени по 10.000 евра, износ што нерезидент може слободно да го изнесе од државата, а против возачот е поднесено барање за поведување прекршочна постапка.
– 20.000 евра, откриени во два одвоени случаи на граничниот премин Богородица.
Во првиот случај, при личен претрес на грчки државјанин кој, управувајќи грчки автомобил, се пријавил за излез од државата, во предните џебови од неговите панталони биле пронајдени 20.000 евра. Согласно законските прописи, на патникот му биле вратени 10.000 евра, износ што нерезидент може слободно да го изнесе од државата, а 10.000 евра биле привремено задржани.
Во вториот случај, двајца босански државјани, кои со босански автомобил се пријавиле за излез од државата, пријавиле дека со себе носат 20.000 евра, но при извршениот личен претрес кај возачот биле пронајдени 20.000 евра, а кај сопатничката, сопруга на возачот, биле пронајдени уште 10.000 евра.
Согласно законските прописи, на патниците им биле вратени по 10.000 евра, износ што нерезидент може слободно да го изнесе од државата, а 10.000 евра биле привремено задржани.
Во двата случаи, против двајцата возачи се поднесени барања за поведување прекршочни постапки.
Златни монети и накит
– 56 златници и 5 парчиња златен накит, со вкупна маса од 429 грама, откриени од страна на мобилните царински тимови, при контрола на македонски автомобил со кој за излез од државата на граничниот премин Блаце се пријавиле двајца сопружници, македонски државјани. Непријавените златници и златниот накит биле откриени во еден сошиен чорап, сместен во несесер, и во алуминиумска фолија, сместена во паричник, пронајдени во чантата на сопатничката. Истите се привремено задржани, а случајот е предаден на Одделението за истраги при Царинската управа, за понатамошно постапување.
Делови за багер
– 1 употребуван ладилник за багер, откриен при контрола на стока со потекло од Албанија, пријавена за увозно царинење во царинската испостава Струга. Непријавениот ладилник, кој не бил опфатен со царинската декларација, е привремено задржан, а против увозникот ќе биде поведена соодветна постапка
Стока за која постои сомневање дека повредува права од интелектуална сопственост
– 336 пластични капачиња и 149 пластични стикери за бандажи со лого на заштитени трговски марки, откриени во царинската подружница Аеродром Скопје – отсек за стоково царинење, при контрола на брза пратка од Хонгконг, наменета за физичко лице од Скопје. Поради сомневање дека производите повредуваат права од интелектуалана сопственост, истите се привремено задржани, и согласно законските одредби ќе биде поведена постапка за утврдување на нивната оригиналност.
Мигранти
Во царинската подружница Скопје 3, возач на ирански камион паркиран во терминалот пријавил дека слушнал човечки гласови од приколката кои повикувале за помош. Преку Дежурниот царински центар биле известени мобилните царински тимови, кои по пристигнувањето на терминалот извршиле контрола на приколката, при што биле пронајдени 6 илегални мигранти. Според нивните изјави, петмина биле државјани на Бангладеш, а еден бил државјанин на Пакистан.
Мигрантите биле предадени на Министерството за внатрешни работи за понатамошна постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сергеј Попов ги матираше СДММ, извади документ од кој се гледа како лажат, велат од ВМРО-ДПМНЕ

„Се е пријавено дечки, затоа вчера ви рековме два пати да размислите пред да излезете на прес. Ама толку слушате, затоа сте младина сведена на статистичка грешка“, напиша Сергеј Попов, претседател на УМС и пратеник на ВМРО-ДПМНЕ, на социјалните мрежи.
„Штета, паметам времиња кога СДММ беше подмладок за почит“, додаде тој.
Македонија
Пратеничката Мимоза Муса на 73. КОСАК конференција во Варшава

Пратеничката Мимоза Муса, членка на Комисијата за европски прашања, учествува на 73. Конференција на комисиите за европски прашања на Парламентите на земјите членки на Европската Унија (КОСАК), која се одржува од 8 до 10 јуни 2025 година во Варшава, Република Полска.
Конференцијата се одржува во Сејмот на Република Полска, а учество земаат претставници на Парламентите од земјите членки и кандидатите за членство во Европската Унија, како и претставници на Европската комисија и Европскиот парламент.
Темите опфатени на Конференцијата се: приоритетите на Полското претседателство со Советот на ЕУ, работните програми на Европската комисија и Европскиот парламент во новиот институционален циклус, идната повеќегодишна финансиска рамка на ЕУ, политиката за проширување и јакнењето на сајбер отпорноста и борбата против дезинформации.
Настанот беше свечено отворен од страна на маршалот на Сејмот на Република Полска, Шимон Холовниа, а Конференцијата се одвива под копретседателство на Агњешка Помаска, претседателка на Комисијата за европски прашања на Сејмот на Република Полска и Томаш Гродsки, претседател на Комисијата за европски прашања на Сенатот на Република Полска.
Во своите воведни обраќања ја нагласија важноста на парламентарната соработка и единството на европските институции во справување со заедничките предизвици. Тие упатија повик за продлабочена вклученост на националните парламенти во процесот на донесување политики на ниво на ЕУ и подвлекоа дека проширувањето останува клучен инструмент за стабилност и просперитет на целиот континент.
Пратеничката Мимоза Муса имаше свое обраќања на втората сесија од Конференцијата.
На втората сесија, каде се дебатираше за работните програми на европските институции и Стратешката агенда на ЕУ, Муса истакна дека приоритетите на Комисијата и Парламентот се од исклучително значење за земјите кандидати. Таа подвлече дека Северна Македонија активно работи на зелена транзиција, дигитализација, економски развој и борба против корупцијата, и ја потенцираше важноста на продолжување на политиката на проширување врз основа на заслуги.
Во рамки на своето учество, пратеничката оствари средба со голем број колеги и со амбасадорот на Република Северна Македонија во Република Полска, Јасмин Ќахил.
КОСАК претставува форум за соработка меѓу комисиите за европски прашања од националните парламенти и Европскиот парламент, кој овозможува редовна размена на информации, ставови и добри практики во однос на европското законодавство и политики. Форумот постои од 1989 година и има важна улога во вклучувањето на националните парламенти во процесите на донесување одлуки на ниво на ЕУ.
Македонија
Арсенал илегално оружје и муниција пронајдени кај скопјанец, поведена истрага

Јавен обвинител од Основното јавно обвинителство Скопје донесе Наредба за спроведување истражна постапка против едно лице за кривични дела – Неовластено изработување, држење, посредување и тргување со оружје и експлозивни материи од член 396 од Кривичниот законик.
При претрес во домот во кој престојувал осомничениот 29-годишник на улицата “Благоја Паровиќ” во Скопје, било пронајдено поголемо количество огнено оружје, муниција и експлозивни материи кои на граѓаните им се забранети и тоа: автоматска пушка со калибар 7,62×39 мм, четири рамки со 120 куршуми и уште дополнителни 779 куршуми боева муниција од истиот калибар наменета за испалување од автоматски, полуавтоматски пушки, митралези, пушкомитралези и репетирачки пушки. Биле пронајдени и 3 рамки со вкупно 51 куршум со калибар 9 мм Para и уште 136 куршуми од тој калибар наменети за испалување од автоматски огнени оружја и полуавтоматски пиштоли. Потоа биле откриени и 31 куршум боева муниција со калибар 7,65 мм, која исто така се користи за автоматски и полуавтоматски оружја, како и рачна граната од моделот РГД 5, која е од офанзивен тип со ефективно убиствено дејство од 15-20 метри и ранувачко дејство до 30 метри.
Покрај ова оружје, муниција и експлозивни направи кои се целосно забранети за граѓаните, тој во домот без дозвола држел и огнено оружје кое било преправено – пиштол ZORAKI М 906-B со кој било овозможено истрелување на проектили од куршуми од боева муниција со кал.7,65 мм, пневматски пиштол марка SIG SAUER M17 наменет за истрелување на топчести проектили со калибар 4,5 мм, полуавтоматски пиштол RANGER RA9, како и 51 куршум со калибар 9 мм P.A.K. наменета за предизвикување звучен-сигнален ефект при испалување од оружје за светлосно-звучна сигнализација. Целото пронајдено илегално оружје и муниција се одземени од осомничениот.
Поради опасност од бегство и можност да го повтори делото, јавниот обвинител до Судот достави предлог за определување мерка притвор за осомничениот.