Свет
Мосад осуетила ирански заговор за напади на израелските амбасади во целиот свет
Израелската разузнавачка агенција Мосад осуетила заговор за напад врз повеќе израелски амбасади, објави израелскиот „Канал 12“ на хебрејски јазик.
Заговорот, зад кој наводно стои Иран, вклучувал амбасади во Европа и во целиот свет, иако списокот со земји во кои требало да се извршат нападите бил цензуриран од израелските власти. Не се објавени детали за заговорот и не посочени изворите на информациите.
Иран допрва треба да го коментира наводниот заговор. Сепак, во 2012 година Израел ја обвини Исламската Република за слична шема во која беше вклучена либанската милитантна група Хезболах и предвидуваше напади врз израелските дипломати во Индија и Грузија. Во тоа време Иран категорично ги отфрли обвинувањата нагласувајќи дека ги осудува сите акти на тероризам и обвинувајќи го ционистичкиот режим за водење пропагандна војна.
Четири лица беа повредени во нападот во Њу Делхи. Грузиската полиција спречи обид за напад со автомобил бомба во Тбилиси. Нападите во 2012 година се случија како реакција на атентатите организирани од Мосад на иранските нуклеарни научници, при што петмина научници беа убиени и еден преживеа во низата напади меѓу 2010 и 2012 година.
Извештајот на „Канал 12“ доаѓа во услови на зголемени тензии меѓу Иран и Израел по пожарот и експлозијата на 2 јули 2020 година во фабриката за производство на центрифуги за збогатување ураниум во нуклеарниот коплекс „Натанз“ во Иран. Претходно, непозната група наречена „Гепарди на татковината“ наводно ја презела одговорноста за саботажата.
Подоцна, кувајтските медиуми директно го обвинија Израел за вмешаност во експлозијата тврдејќи дека израелските разузнавачки служби извршиле компјутерски напад врз објектот. Во неделата „Њујорк тајмс“ објави, повикувајќи се на разузнавачки извор, дека Израел е одговорен за експлозијата во објектот.
Во неделата израелскиот министер за одбрана, Бени Ганц, навести дека Израел не бил вмешан во експлозијата тврдејќи дека сè што се случува во Иран не е поврзано со Израел. Но, истиот ден министерот за надворешни работи, Габи Ашкенази, рече дека Израел ќе продолжи да работи за да го спречи Иран да добие нуклеарна бомба и дека Тел Авив презема активности за кои е подобро да не се зборува. Ашкенази не го спомена директно инцидентот во „Натанз“.
Иран вети изградба на поголема и понапредна фабрика за замена на оштетените постројки за збогатување ураниум.
Израелските власти во неколку наврати ја предупредија меѓународната заедница за наводната потрага на Иран по нуклеарно оружје, при што Нетанјаху успешно лобира во администрацијата на Трамп да се повлече од нуклеарниот договор во Иран во 2018 година истакнувајќи дека Тел Авив нема да дозволи Иран да изгради нуклеарна бомба.
Иранските власти ги отфрлија обвиненијата на Израел, а министерот за надворешни работи, Мохамед Џвад Зариф, во повеќе наврати посочуваше дека Израел е единствената држава со нуклеарно оружје во регионот.
Техеран тврди дека нема намера да направи нуклеарно оружје. Според најновите податоци на Меѓународната агенција за атомска енергија, нивото на збогатување ураниум во земјата е на 4,5 отсто, малку под проценетата чистота од 80-90 отсто потребни за изградба на нуклеарно оружје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Американски разузнавачи со предупредување: Русија и Кина подготвуваат заедничка инвазија
Американското разузнавање има информации кои укажуваат дека Русија и Кина тесно соработуваат за голем број воени прашања, вклучително и потенцијална инвазија на Тајван.
Такво нешто ја поттикна американската администрација да планира како да спречи такво сценарио, пренесува „Блумберг“.
„Ова е првпат Кина и Русија да соработуваат за прашањето на Тајван. Кина дефинитивно сака да соработува со Русија во оваа насока“, рече шефицата на Националната разузнавачка служба Аврил Хејнс за време на нејзиното сведочење пред Конгресот.
Републиканскиот сенатор Мајк Раунд од Јужна Дакота ја праша Хејнс за такво сценарио за време на сослушувањето на Комитетот за вооружени служби во Сенатот. Тој праша и дали Пентагон планира одговор на таквата можност, бидејќи големи се шансите во случај на конфликт со една земја да биде отворен потенцијален конфликт со една или повеќе од нив. Тоа би влијаело на многу работи.
„Секако дека постои можност да се случи такво нешто. Одговорот на тоа прашање зависи од сценариото што би се развило“, рече Хејнс, додавајќи дека разузнавачките проценки укажуваат дека постои зголемена соработка во партнерството „без забрани“ меѓу Русија и Кина во секој општествен сектор – политички, економски, воени, технолошки“, пренесува медиумот.
Нејзините изјави, според написите ги потврдил и генерал-полковник Џефри Круз и нагласил дека ситуацијата внимателно се следи и дека „тие се подготвени доколку се случи несакано сценарио“.
Медиумот анализира дека треба да се знае дека Русија, Кина и Иран во средината на март одржаа заеднички воени вежби наречени „Поморски безбедносен појас – 2024“ во Оманскиот Залив и Арапското Море.
Свет
Медведев до Швајцарија: Ти благодарам, земјо на сирењето и часовниците
Дмитриј Медведев, поранешен руски претседател и актуелен заменик на Советот за безбедност, рече дека конференцијата за прекин на огнот во Украина ќе биде уште еден доказ за пропаѓањето на „мировниот план“ на украинскиот претседател Володимир Зеленски.
Швајцарската влада претходно објави дека Русија во моментов не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Медведев објави денеска на Телеграм. „Која е користа за Русија од швајцарската „мировна конференција“? Придобивката е трикратна. Прво, тоа ќе биде уште еден доказ за пропаѓањето на таканаречениот мировен план на идиотот Зеленски.
Второ, тоа ќе стане видлив доказ за целосната немоќ на сегашните западни елити, кои извршија болна самокастрација на нивната способност да го прекинат воениот конфликт. Згора на тоа, по директна наредба на група сенилни лекари од Вашингтон.
Трето, тоа ќе им овозможи на нашите вооружени сили да продолжат да ја чистат територијата на Мала Русија од неонацистите без мешање или сметка за нечии глупави „мировни иницијативи“ и сите ние да извршиме скрупулозна работа во насока на конечниот колапс на политичкиот режим на Украина и брзото враќање на нашите оригинални територии во Руската Федерација. Ти благодарам, земјо на сирењето и часовниците“, напиша Медведев.
Европа
(Видео) Голем пожар во фабрика во Берлин, жителите предупредени да го избегнуваат подрачјето
Голем пожар во фабрика во Берлин-Лихтерфелд, која произведува системи за противвоздушна одбрана што се користат на бојното поле во Украина.
Противпожарната бригада предупредува на отровен чад, пренесува „Билд“.
‼️ A defense-industrial company factory is on fire in Berlin
According to media reports, a fire with toxic smoke occurred at a metallurgical plant of the defense-industrial company Diehl. The company is the main contractor of the IRIS-T production program and ammunition for this… pic.twitter.com/jZBBXTEdSm
— NEXTA (@nexta_tv) May 3, 2024
Адријан Венцел, портпарол на берлинската противпожарна бригада, изјави за Билд:
„Целосно изгореа четири ката од зградата. Дел од неа е веќе урнат, а ја гаснеме однадвор. Пожарот повеќе не може да се стави под контрола однатре.
Дежураат околу 160 пожарникари. Спасувачите носат заштитни одела.
Можеме да потврдиме дека во зградата биле запалени и хемикалии. Таму биле складирани сулфурна киселина и бакар цијанид. Постои ризик да се формира водород цијанид и да се издигне во воздухот со чад“, додаде портпаролот.
Противпожарната бригада го информираше населението преку апликации за предупредување.
Feuer mit Explosionen in Berlin Lichterfelde am 03.05.2024 #Feuerwehr #brand pic.twitter.com/4hZG5XekU0
— Niko (@nl_an) May 3, 2024
Станува збор за фирма „Diehl Metal Applications“ која има сопствен систем за доработка на метални површини во објектот.
По проценка на временските услови и соодветниот правец на ветерот, чадот од фабриката се пресели на север. Противпожарната бригада советува избегнување на просторот околу претпријатието, затворање на прозорците и вратите и исклучување на вентилацијата и климатизацијата.
Сојузната држава Берлин издаде официјално предупредување за опасност, советувајќи ги луѓето да ја избегнуваат областа.
Учениците и наставниците од околните училишта беа испратени дома.
Во е-пошта до родителите, една гимназија испратила порака во која ги замолува учениците да останат дома.
Засега нема информации за причината за пожарот, но соопштено е дека нема повредени.