Македонија
Мицкоски: Ќе изградиме автопат од Скопје преку Прилеп, Битола до јужната граница

Лидерот на ВМРО-ДПМНЕ, Христијан Мицкоски, денеска во Прилеп оствари средби со стопанствениците, на кои стана збор за проектите и содржината со фокус на економскиот дел од нивната програма. Тој вети дека ВМРО-ДПМНЕ ќе го реши проблемот на граѓаните од Пелагонија, односно ќе го изгради автопатот од Скопје преку Прилеп, Битола до јужната граница.
„Претставниците на компаниите ни ги презентираа нивните гледишта, анализиравме дел од политиките и предлозите коишто ВМРО-ДПМНЕ ги предлага во оваа изборна програма. Коишто понатаму ќе бидат дел од, би рекол, програмата на Владата. Пред сè тука како главен адут го споменавме и автопатот што би се изградил од Скопје преку Прилеп, Битола до границата со нашиот јужен сосед. Нешто што е дамнешна желба на жителите на пелагонискиот крај, на прилепчани, но и на останатите. Цениме дека овој инфраструктурен проект многу ќе го подобри квалитетот на живот, ќе ја подобри комуникацијата и условите на бизнис-заедницата овде, од Прилеп, и Пелагонија во целост. Потоа зборувавме за политиките во делот на земјоделието со акцент на тутунот и тутунопроизводителите. Зборувавме и за реформите во делот на образованието, администрацијата, дигитализацијата, фискалната политика, поддршката. Така што ценам дека имавме навистина корисна средба, средба на којашто ние можевме да се презентираме и да имаме определена интеракција со стопанствениците од овде, од градот Прилеп“, рече Мицкоски.
Прашан за очекувањата за излезноста на изборите, Мицкоски истакна дека очекува помала излезност за разлика од други години, но верува дека, сепак, таа ќе изнесува над 45 проценти.
„Ценам дека излезноста ќе биде помала од вообичаената, како што сме навикнати во минатите години. Не очекувам дека ќе се реализираат оние сценарија и предвидувања од минатото дека ќе биде многу ниска и ќе се движи меѓу 40-45%. Ценам дека ќе биде повисока од таа. Можеби нема да стигнеме бројка како што беше тоа во минатото, 65-67%, но ценам дека ќе биде кредибилна за идната влада, што ќе ја предводи ВМРО-ДПМНЕ, веднаш уште од првиот ден да се зафати со структурни реформи и излез од моменталната ситуација во којашто се наоѓаме“, истакна Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Синдикатот на новинарите бара зголемување на минималната плата: социјалниот статус на медиумските работници во земјата е на многу ниско ниво

Самостојниот синдикат на новинари и медиумски работници во време на општата дебата за висината на минималната плата недвосмислено е за зголемување на минималната плата. Ставот на ССНМ, како што појаснуваат, кореспондира со актуелните барања на дел од синдикатите и вели дека покачувањето е повеќе од ургентно. Корекцијата, како што напоменуваат е неопходна поради тоа што моменталната висина на минималната плата е недостојна за пристоен живот на работниците, меѓу кои и на новинарите и медиумските работници, чии интереси ги застапува ССНМ.
„Владата и синдикатите преговараат за финансиска иднина на работниците, иднина во која новинарите и медиумските работници не смеат да бидат одминати. Последната опсежна анкета на ССНМ објавена во јануари 2024 покажа дека во медиумите повеќе од 50 проценти од вработените имаат
примања под просечните, а голем дел од вработените се зависни од висината на минималната плата пропишана со закон. Со оглед дека платите во медиумскиот сектор речиси и да не поместени од мртва точка во изминатите две години може слободно да се каже дека три четвртини од ангажираните во медиумите сега се под просечната плата, а се повеќе се зголемува бројот на оние кои се на минимална плата. Поради фактот дека голем дел од вработените во медиумите се директно поврзани со висината на минималната плата, ние како легитимен претставник на работничките права на новинарите и медиумските работници, бараме што е можно побрзо нејзино покачување.
Социјалниот статус на новинарите и медиумските работници во земјата е на многу ниско ниво, а праксата досега покажала дека тој директно влијае врз степенот на мотивација, професионалност и посветеност што не смее да биде под знак прашање за тие што водат сметка за јавниот интерес во државата. Притоа нагласуваме дека во оваа професија неретко се случува луѓето да бидат истовремено ангажирани на повеќе работни места, за што најексплицитен пример се локалните медиуми, во кои вработените често се ангажирани и на по три работни позиции, најчесто на минималец, кој е, како што истакнавме, под секое ниво за достоинствен живот“.
Синдикатот на новинарите и медиумските работници кој претставува голем дел од вработените во овој сектор, бара и очекува од Владата и работодавците решение кое е во согласност со потребите на членството, што би значело висина на минималната плата на ниво на платите на колегите од земјите од регионот.
Пристојни плати на новинарите и медиумските работници значат и професионално новинарство, независно од центрите на моќ, и чувар на јавниот интерес и слободата на медиумите и изразувањето, велат од ССНМ.
Македонија
Во Рашче има приведени поради пукање на свадба

Две лица беа приведени вчера во скопското село Рашче поради пукање на семејна веселба.
„Околу 22 часот во СВР Скопје е пријавено дека се слушаат истрели во селото, по што веднаш се преземени соодветни мерки и активности и утврдено е дека Е.К. и Б.К. со гасни пиштоли пукале на свадба“, соопшти МВР.
Тие се приведени во полициска станица и по целосно документирање на случајот ќе бидат поднесени соодветни поднесоци.
Македонија
ВМРО-ДПМНЕ и натаму бара оставка од обвинителот Коцевски

ВМРО-ДПМНЕ и денеска упати јавен повик до обвинителот, Љупчо Коцевски, да си поднесе оставка поради, како што велат, компромитирање на независноста на Обвинителството. Партијата го обвинува Коцевски дека ја претворил обвинителската функција во партиски сервис на СДСМ и ДУИ, со што, според нив, ја довел правдата во заложништво на политичките интереси.
Во соопштението од ВМРО-ДПМНЕ се наведува дека со негласањето на интерпелацијата во Собранието, СДСМ ја покажало својата поддршка за Коцевски како чувар на нивните функционери од кривична одговорност.
Партијата посочува дека довербата во обвинителот е падната под 2 проценти и дека тој, и покрај изгласаниот притисок и интерпелацијата, одбива да поднесе оставка.