Нема место за криминалците во политиката, доаѓа обнова, изјави претседателот на ВМРО-ДПМНЕ, Христијан Мицкоски, кој заедно со носителот на втората изборна единица, Владо Мисајловски, ја посетија општина Чаир. При средбата со граѓани Мицкоски посочи дека има уште малку до 15 јули, денот кога ќе победи обновата.

„Денешниот говор ќе го почнам со реченица што ми ја кажа еден мој пријател пред два дена, а кој не е од Македонија, живее надвор ,инаку е родум тука. Вели: ‘Христијан, Зоран Заев за граѓаните во Македонија е вистински кошмар, но затоа е најдобриот и најсладок сон за некои соседи’. И тоа е така драги пријатели. Затоа што кај Зоран Заев и СДСМ граѓаните на Македонија и самата Македонија се на дното на приоритетите. Нему му се поважни други работи, поважни му се сите оние лични агенди кои е одлучен да ги турка на сметка на честа и достоинството на граѓаните во Македонија, без разлика на нивниот етнички состав, без разлика на нашите етнички и верски различности“, нагласи Мицкоски.

Мицкоски додаде дека, за жал, граѓаните на Република Македонија секогаш се наоѓаат на дното на приоритетите на Зоран Заев и на оваа влада предводена од СДСМ.

„Матрицата на СДСМ без исклучок е составена од четири чекори. Првиот чекор е онаа лага кажана со раката на срцето, главата налево или надесно, малку за жицата, малку за времето, малку за семето итн. И ќе каже неколку лаги со цел да ги добие симпатиите на гласачите и на народот. За волја на вистината, СДСМ веќе 18 години нема победено на парламентарни избори, ќе потсетам 18 години, така ќе биде и сега на овие избори. На овие 18 години ќе додадеме 4, па ќе бидат 22 години. Од тука доаѓа и вториот чекор, а тоа е национално понижување, национален срам. Третиот чекор од таа нивна матрица без исклучок е грабеж и криминал, масовен грабеж и масовен криминал. И конечно последниот чекор, тие го заробуваат обвинителството, судството. Обвинителството е заробено за да се пресметаат со политичките неистомисленици, противници. А, судството за да можат да се амнестираат за некоја неправда направена од минатото“, истакна Мицкоски.

Мицкоски оцени дека СДСМ единствено гледа за своите лични интереси и не се грижи како живеат македонските граѓани.

„Јас ви ветувам дека во првите 100 дена секој кој се огрешил пред законот, осрамотил пред граѓаните, без разлика дали е политички определен или неопределен, на онаа или оваа политичка партија, ќе одговара. Од прв до последен. Доста беше неправди, овој народ е уморен од криминалци, од натрапници во политиката“, вети Мицкоски.

Мицкоски за крај порача на граѓаните дека на 15 јули ќе победи обновата и со тоа доаѓаат и најдобрите четири години за Република Македонија.