Регион
Балканската рута повторно оживеа: мигрантите носат и дрога, рации во цела БиХ
Најновата акција на Федералната полициска управа, во која е уапсен дилер од Сараево, од кого купувале дрога главно државјани на Алжир, Мароко и Пакистан, е уште една потврда дека мигрантите што доаѓаат во БиХ со себе носат многубројни безбедносни проблеми и дека балканската рута е повторно оживеана, пишува во сараевски „Дневни аваз“.
Тоа се лица што нелегално влегле на територијата на БиХ, односно нелегални мигранти.
Полицијата на Унско-санскиот кантон открила и одредена количина дрога од разни видови во последните десет рации во мигрантските кампови Бира, Липа, Мирал.
Повеќето мигранти доаѓаат од Пакистан, а потоа следуваат Бангладеш, Ирак, Авганистан, Иран, Сирија…
Мигрантите од Пакистан и Авганистан со себе носат посебен безбедносен аспект затоа што, според извештајот на Стејт департментот, овие две земји се прогласени за најголем светски производители и дистрибутери на дрога.
Пакистан е прогласен за еден од најголемите светски транзитни коридори на опијати.
„Опијатите се тргуваат преку порозни граници со Авганистан и Иран. Пристаништата, аеродромите, поштенските услуги и нерегистрираните крајбрежни области на Пакистан овозможуваат дистрибуција на нелегални дроги на глобално ниво. Канцеларијата на ООН за дрога и криминал проценува дека Пакистан е транзитна земја за 45 % од опијатите произведени во Авганистан. Истражувањето на оваа канцеларија покажа дека Пакистан има 6,7 милиони корисници на дрога,“ се наведува во извештајот на Стејт департментот, пишува сараевскиот весник.
Во извештајот се посочува дека дрогата што минува низ Пакистан е наменета за глобалниот пазар, а пакистанските сили се во можност да пресретнат само мал дел. Во 2019 година пакистанските агенции за спроведување на законот тврдат дека раскинале 11 синџири на трговија со дрога. За 10 месеци од минатата година, запленети се приближно шест тони морфиум и хероин, како и 7,9 тони опиум.
Министерот за внатрешни работи на сараевскиот кантон, Исмир Јушко, рече дека речиси не постои кривично дело што мигрантите не го сториле.
„Сведоци сме дека со лицата што нелегално влегуваат во БиХ, т.е. мигрантите, доаѓаат многубројни безбедносни проблеми. Насилство, поседување оружје, кражба, наркотици, сето тоа доаѓа со мигрантите“, вели Јушко.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Грција ќе забрани издавање нови дозволи за краткорочно изнајмување во центарот на Атина
Забраната за издавање нови дозволи за краткорочно изнајмување во три квартови во строгиот центар на Атина ќе остане на сила најмалку една година, објави денеска грчката влада, истовремено зголемувајќи го данокот за изнајмување на такво сместување за одмор.
Како и многу други европски туристички дестинации, Грција се бори да ја балансира профитабилната индустрија управувана од онлајн платформите како што е Airbnb со потребите на локалните жители кои се соочуваат со недостиг на станови.
Недостигот на станови и зголемените трошоци за живот ги натераа властите да објават одлука овој месец за зголемување на даноците за краткорочни изнајмувања, забрана на нови дозволи во центарот на Атина и охрабрување на сопствениците на имот да се префрлат на долгорочни изнајмувања.
Грчката министерка за туризам Олга Кефалојани денеска најави дека забраната за ново краткорочно изнајмување во Атина ќе стапи на сила од 1 јануари 2025 година.
Дневниот данок на краткорочни изнајмувања и помага на земјата да се справи со влијанието на природните катастрофи поврзани со климатските промени. Во периодот од април до октомври ќе се зголеми од 1,5 на 8 евра, изјави министерот за финансии. Во зимските месеци данокот ќе се зголеми од 0,5 на 2 евра.
Министерот Кефалојани рече дека Грција годинава од туризмот очекува приход од 22 милијарди евра, што е уште еден рекорд. Таа во борбата против масовниот туризам најави уште една мерка – такса во висина од 20 евра за посетителите од бродовите за крстарење кои во екот на летната сезона ги посетуваат островите Санторини и Миконос, а ќе стапи на сила следната година.
Регион
Земјотрес го погоди Сараево
Послаб земјотрес го потресе Сараево изутрината.
Како што соопшти Федералниот хидрометеоролошки завод во Сараево, во Центарот за сеизмологија е регистриран во 8.04 часот слаб земјотрес во областа на главниот град на Босна и Херцеговина.
Магнитудата на земјотресот била 2,2 степена според Рихтеровата скала, а интензитетот во епицентарот бил III степен според Меркалиевата скала.
Многубројни жители на Сараево пријавиле тресење на земјата на услугата EMSC.
„Кратко, но силно“, „Кратко, татнеж“, „Само мал трепет и силен звук“, „Кратко, но жестоко“, изјавија тие во своите коментари.
Регион
Ердоган ги спореди израелските напади во Газа со геноцидот во Сребреница
Турскиот претседател Реџеп Тајип Ердоган денеска по разговорот со претседавачот на Претседателството на БиХ, Денис Беќировиќ изјави дека Израел ќе одговара за злосторствата во Газа, споредувајќи ги со геноцидот во Сребреница.
„За жал, денес во Газа и на окупираните палестински територии сме сведоци на сличен масакр што беше извршен пред очите на целиот свет во Босна и Херцеговина во 1990-тите“, рече Ердоган, кој денеска го прими Беќировиќ во Истанбул.
Тој додаде дека Израел ќе биде кривично гонет за убиствата на повеќе од 41.000 Палестинци во Газа, вклучително и турскиот активист Ајсенур Езги Ејги, кој беше убиен на Западниот Брег минатата недела.
„Сторителите на геноцидот во Газа, како оние во Сребреница во 1995 година, ќе одговараат пред меѓународните судови“, рече Ердоган.
Тој потсети дека Турција ја спонзорирала Резолуцијата на ОН за осуда на геноцидот во Сребреница и дека таа земја се залага за стабилноста на Босна и Херцеговина. Тој ги повика властите во БиХ да се приклучат во борбата против движењето ФЕТО, сметајќи дека таа организација е терористичка.
Фето е движење на Фетулах Ѓулен, поранешен сојузник, а сега противник на претседателот Ердоган, кого го смета за виновен за обидот за воен удар во јули 2016 година. Беќировиќ рече дека пријателството меѓу Босна и Херцеговина и Турција е нераскинливо.
„Република Турција е докажан пријател на Босна и Херцеговина и една од најсилните членки на НАТО алијансата и затоа, меѓу другото, нејзината поддршка за Босна и Херцеговина е исклучително важна“, нагласи Беќировиќ.