Македонија
Јанушев: Заев рече дека ќе ги донесе и „Гугл“ и „Фејсбук“, ама и тоа изгледа беше дело на некои пранкери

Генералниот секретар на ВМРО-ДПМНЕ, Игор Јанушев и носител на листата на кандидати за пратеници од ИЕ 3 вечерва, претпоследниот ден од кампањата за предвремените парламентарни избори, беше во посета на Крива Паланка.
Јанушев рече дека во овие три години се изнагледавме криминал, корупција, лаги, неспособност. Јанушев се осврна тоа што се не направил, односно направил неговиот противник носителот на листата на кандидати за пратеници во ИЕ 3 од СДСМ и кажа дека тој знаел само за криминал потсетувајќи на увозот на бугарски тутун од 300 тони.
Јанушев од Крива Паланка порача дека за сиот сторен криминал ќе одговараат и тоа веднаш од 16 јули.
„Правдата стигнува од 16 јули, правдата ќе ги стигне за сите злодела што ги направија. Велат дека можат, јас би рекол можеа и да покажаа дека можат да лажат, дека можат повеќе криминал, ќе го донесеа и Гугл и Фејсбук но мислам и тоа дека беше дело на некои пранкери. Затоа на 15 јули ќе ги пратиме во историјата сите погрешни политичари и сите погрешни политики“, рече Јанушев.
Јанушев во своето обраќање пред граѓаните се осврна на програмата Проект-Обнова.
„Доаѓаат по околу шест илјади и петстотини денари повисоки плати за секој од вас, или три илјади денари повеќе за секој пензионер, 4 милијарди домашни и странски инвеститори, инвестиции во образованието, за младите, 160 милиони евра за субвенции и тоа со навремена исплата. Нема да дозволиме ниту еден граѓанин да не е задоволен. Ќе работиме со вас почитувани граѓани, за програмата ве слушнавме, разговаравме со вас, и понатаму ќе ве прашуваме за вашите проблеми и ќе ги решаваме“, рече Јанушев.
Јанушев кажа дека доаѓаат политичари кои ќе покажат многу повеќе, дека тоа е генерација која ќе ја обнови Македонија.
„Време е да си го вратиме достоинството, да сме горди што сме од Македонија. Ние сме Македонци кои зборуваат македонски јазик и живеат во Република Македонија. Затоа ве повикувам сите без исклучок да се обединиме и сплотиме, рамо до рамо, референдумски рано наутро да излеземе и да гласаме на 15 јули заокружувајќи го редниот број 14 за 14 пратеници од ИЕ 3“, порача Јанушев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.
Македонија
Судијата за врски на Франција за балканскиот регион во посета на Јавното обвинителство

Јавниот обвинител на Република Северна Македонија Љупчо Коцевски денеска се сретна со францускиот амбасадор Кристоф Ле Риголер, на средба за претставување на новоназначениот судија за врски на Република Франција за регионот Сирил Лакомб.
Тој е еден од вкупно 20 судии за врски на Франција во светот, а од државниот обвинител Коцевски се информираше директно за состојбите во обвинителството. Притоа, судијата за врски Лакомб понуди поддршка со оперативна и техничка помош, но и експертиза преку француските правосудни органи.
Бидејќи и самиот бил јавен обвинител и лице за врски на Република Франција со Европравда, Лакомб се интересираше и за постапката за делегирање на обвинителот за врски на Република Северна Македонија во оваа меѓународна институција.
Јавниот обвинител Коцевски, од своја страна, изрази благодарност за континуираната француска поддршка за работата на Јавното обвинителство.
Македонија
Камион излета од магистралниот пат Деве Баир – Крива Паланка, сообраќајот во прекин

Од 17:10 часот магистралниот пат Деве Баир – Крива Паланка кај место викано Самоков е во прекин за сите возила во двата правци поради собраќајна незгода. Товарно моторно возило излетало од патот и на самиот пат има расврлани метални предмети кои ги превезувало, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.