Полицијата приведе три лица, осомничени за извршување на 15 кражби на подрачјето на Кисела Вода и Центар.

Станува збор за лицата Г.С. (21) како и двајца малолетници од 14 и 13 годишна возраст кои се штитеници на ЈУЗКП „25 Мај“ – Скопје.

Кривичните дела пријавените ги извршувале во периодот од ноември минатата до мај оваа година на подрачје на град Скопје поточно во населбите Кисела Вода и Центар.

Имено, тие извршиле 15 кривични дела од кои; три тешки кражби во станови, два обиди за тешки кражби во станови, една кражба во стан, две тешки кражби во возила, две тешки кражби на моторцикли, четири тешки кражби во останати објекти (книжари и гаража), една кражба во куќа.

Тешките кражби во станови ги извршувале на тој начин што со насилно отварање на прозорецот од купатилото и прекачување преку истиот влегувале внатре во станот вршеле претурање и пребарување при што краделе мобилни телефони, лап топ, пари, женски ташни, паричници и др.

Кражбите во стан и куќа ги извршувале при згодна прилика односно во нив влегувале преку незаклучената врата. Тешките кражби во автомобили ги извршувале така што со штрафцигер ги обивале бравите од вратите на возилата и краделе акумулатори, алат, касетофони и друго, а пак, тешките кражби во книжарите ги вршеле на тој начин што со погоден предмет (камен и сл.) ги кршеле излогните стакла влегувале внатре и краделе ранци, пари и др.

Со двете деца од 14 и 13 годишна возраст обавен е службен разговор во ЈУЗКП „25 Мај“ – Скопје во присуство на инспектор за малолетничка деликвенција и социјален работник од домот.

По првопријавениот Г.С.распишан е локален распис, истиот е пронајден приведен и обавен службен разговор во ПС “Кисела Вода“.

Инаку, украдените предмети ги продавале на пазарот за стари работи лоциран на ул. “Лазар Личеновски“ на разни купувачи, потоа на Бит Пазар како и на лицето С.Б. (29) од ул. “Вашингтонска“, во чиј што дом со наредба од Истражен судија од ОСС 1 извршен е претрес и таму се пронајдени разни предмети кои потекнуваат од кривични дела : акумулатори, лап топ, касетофони, велосипеди и др.

Заработените пари ги користеле за купување на дрога како и други свои потреби. Отсекот за тешки кражби при СВР Скопје работи на расчистување и на други кривични дела тешки кражби, кражби во станови , куќи и ПМВ со истите сторители, а по целосно расчистување и документирање на кривичните дела од страна на СВР-Скопје ќе биде поднесена соодветна кривична пријава.

Лицето Г.С. во крим-евиденциите минува за сторени повеќе кривични дела: “тешка кражба“, “тешка кражба во обид“, “дрска кражба“, “кражба“, “разбојништво“ и “одземање на ПМВ“. Исто така за кривични дела од областа на имотните деликти во крим евиденцијата минуваат и двајцата малолетници. /крај/со/мф