Свет
Трамп испраќа федерални трупи во Сиетл
Американскиот претседател, Доналд Трамп, испраќа тактички тим од Службата за царина и гранична заштита во Сиетл да биде на стендбај-должност во случај да биде потребен на протестите, пренесува „Њујорк пост“.
Тимот е сличен на Тактичката единица за гранична патрола што Белата куќа ја распореди во Портланд, Орегон, потег што беше жестоко критикуван поради наводната употреба на агресивни борбени тактики на насилните протести.
Овој потег беше изненадување за градоначалничката на Сиетл, Џени Дуркан, која изјави дека разговарала со в.д. секретарот за домашна безбедност, Чад Вулф, и била уверена дека нема планови за распоредување на федералните трупи во нејзиниот град.
„Секое распоредување тука, според мое гледиште, би ја поткопало јавната безбедност“, рече Дуркан.
Сепак, администрацијата посочи дека тимот засега ќе остане во мирување и ќе биде распореден само по потреба.
„Во моментот нема огромно распоредување на персоналот во Сиетл. Секоја употреба на екипи за спроведување на законот ќе вклучува тесна координација со локалната полиција. Нема други градови во земјата што ги имаат истите закани и немаат локална поддршка за спроведување на законот, како што доживуваме во Портланд“, изјави портпаролот на Министерството за внатрешна безбедност, Алексеј Волторнист.
Трамп во неколку наврати се закануваше дека ќе испрати федерални сили во градовите што се справуваат со улични протести или зголемено насилство, вклучително и во Њујорк.
Градоначалничката на Чикаго, Лори Лајтфоут, која се противеше на федералните трупи во својот град, објави дека се согласила со плановите на Белата куќа да испрати 200 федерални агенти во градот за да го смири неодамнешниот бран насилства.
Во изјавата канцеларијата на Лајтфоут рече дека градоначалничката јасно ставила до знаење дека ако има отстапување од најавените мерки, таа ќе ги употреби сите расположиви законски опции за заштита на жителите на Чикаго.
Оваа недела официјалните лица на Портланд поднесоа барање за забрана за доближување против федералните агенти во градот тврдејќи дека тие користеле прекумерна сила против демонстрантите и апселе луѓе без доволна причина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Претседателот на Колумбија: Ги раскинуваме дипломатските односи со Израел
Колумбискиот претседател Густаво Петро изјави дека ќе ги прекине дипломатските односи со Израел поради војната во Газа.
Петро претходно силно го критикуваше израелскиот премиер Бенјамин Нетанјаху и повика Колумбија да се приклучи на тужбата за геноцид на Јужна Африка против Израел пред Меѓународниот суд на правдата.
„Овде пред вас, владата на промени, претседателот на републиката, најавува дека утре ќе ги прекине дипломатските односи со државата Израел, затоа што има влада, затоа што има претседател геноциден“, рече Петро на собир по повод Меѓународниот ден на трудот.
Светот не може да биде слеп пред настаните во Газа, додаде тој.
Во шестмесечната воена операција на Тел Авив загинаа 34.488 Палестинци, а ранети се 77.643, според здравствените власти во Газа. Војната ги расели повеќето од 2,3 милиони жители на Појасот Газа и го уништи најголемиот дел од крајбрежната енклава.
Најавата на Петро за прекин на дипломатските односи со Израел доаѓа во екот на се почестите шпекулации дека Израел наскоро ќе го нападне градот Рафах во јужниот дел на Газа, каде што се засолниле повеќе од милион Палестинци раселени од своите домови.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Свет
Хамас: Одговор за предлогот за примирје и ослободување на заложниците веројатно утре
Водачите на Хамас вечерва рекоа дека го проучуваат предлогот за примирје и ослободување на заложниците што им го претставија египетските посредници и велат дека се надеваат оти ќе го испратат својот одговор до утре, се вели во соопштението на палестинската милитантна група испратена до „Асошиејтед прес“.
Тековната рунда разговори за примирје меѓу Израел и Хамас изгледаат сериозни, но страните се во несогласување за едно клучно прашање – дали војната треба да заврши како дел од договорот, објави „Тајмс оф Израел“.
„Многу веројатно утре, односно четврток, ако даде Господ, посредниците ќе добијат одговор“, соопшти Хамас.
Преговорите меѓу Хамас и Израел, преку посредници како САД, Катар и Египет, траат со недели, а по Париз се водат нови рунди разговори во Каиро.