Црна хроника
Полицаец тепал човек оти го пријавил градоначалникот на Карбинци за физички напад
Секторот за внатрешна контрола и професионални стандарди при МВР поднесе кривична пријава против полицискиот службеник Т.Д. (45) од Штип и Љ.А.(52) сопственик на приватна фирма, поради сомнение дека сториле кривично дело – “мачење и друго сурово, нечовечко или понижувачко постапување и казнување“.
Имено, на 19 јануари, околу 18.15 часот, во службена просторија во Полициската станица од општа надлежност Штип, пријавениот Т.Д. при преземање на службени активности и Љ.А. по претходна согласност полицаецот, со употреба на сила и закана над оштетениот Х.Г. од штипското село Козјак, се обиделе да го присилат да се откаже од претходно поднесена пријава за физички напад врз него, извршен од страна на В.Б. градоначалник на Општина Карбинци.
Веднаш по настанот, од командирот на полициската станица, телефонски е известена службата за внатрешна контрола, дека при пријавување на физички напад од страна на граѓанинот Х.Г. кај полицаецот, истиот бил повикан во друга канцеларија од страна на полицискиот службеник Т.Д.
По кратко време, од канцеларијата во која биле присутни и В.Б., градоначалник на општина Карбинци, Љ.А. директор на фирмата „Дрво Декор“, и полицискиот службеник Д.Т., оштетениот Х.Г. почнал да вика и да бара помош.
При обидот да влезат во просторијата, останатите полициски службеници биле спречени, но по известувањето на командирот и на негова наредба, Гигов е предаден на полицаецот. По ова, Х.Г. пријавил дека полицаецот Т.Д. и лицето Љ.А. го тепале со клоци со цел да ја повлече веќе поднесената пријава за физички напад против В.Б.
Заради целосно расчистување на настанот, во натамошните активности се вклучи и СВКПС, при што од извршениот увид во евиденциите и документацијата на полициската станица и од разговорите со полициските службеници кои за време на настанот биле во полициската станица во целост се потврдени наводите во пријавата.
Покрај кривичната пријава, СВКПС изрече задолжителна мерка до Началникот на СВР-Штип, против полицискиот службеник Т.Д. – согласно одредбите од Колективниот договор на МВР – да поднесе предлог за утврдување на дисциплинска одговорност пред надлежната Комисијата за утврдување на дисциплинска одговорност и до завршување на постапката Т.Д. да биде отстранет од работното место и од Министерството.
Истовремено, изречена е и задолжителна мерка, поведување на постапка за утврдување на дисциплинска одговорност до надлежната Комисија и против полицискиот службеник Д.Т., со оглед дека бил присутен во канцеларијата но не презел мерки за заштита на граѓанинот Х.Г./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Го погодил проектил во нога додека собирал печурки
Маж од Велес собирал печурки и почувствувал убод во левата нога. По лекарски преглед, од коленото му бил изваден проектил од огнено оружје.
„Во СВР Велес вчера во 11 часот, 63-годишниот Д.Ј.од Велес, пријавил дека при собирање печурки во атарот на село Лисиче, Општина Чашка, почувствувал убод на левата нога, по што во Општа болница Велес му бил извршен преглед и од коленото му бил изваден проектил од огнено оружје“, информира денеска Татјана Ѓуровска од СВР Велес.
Таа додаде дека за настанот бил известен јавен обвинител од Основното јавно обвинителство Велес и дека се преземаат мерки за негово расчистување.
Црна хроника
Мигранти од Турција и Ирак најдени на автопат кај Неготино
Полициски службеници од ОВР Неготино пронашле тројца мигранти, двајца од Република Турција и еден од Ирак, соопшти Министерството за внатрешни работи (МВР).
Мигрантите се пронајдени рано утрово, во 02.15 часот, на автопатот А1 кај Неготино по што се предадени на Полициската станица за граничен надзор Михајлово за натамошна постапка.
Црна хроника
71-годишен пензиониран кувар кој работел за дневница на прослава е загинатиот во лифт
Седумдесет и едногодишниот В.П. од Штип е починатиот кој вчера настрада во несреќа со лифт. Според неофицијалните информации кои ги пренесоа дел од медиумите, тој бил пензиониран кувар кој работел за дневница и непријавен на прослава во хотелот во кој се случила трагедијата. Во лифтот се носела храна, а кога се случила несреќата заедно со В.П бил и Т.О. (56) од Штип. Тој е тешко повреден,а работел како келнер на истата прославата.
Од МВР денеска информираат дека во 16:24 часот во штипската полиција е пријавено дека во хотел, при извршување на работни задачи, со тешки телесни повреди се здобиле В.П.(71) и Т.О.(56), двајцата од Штип.
„Тие биле пренесени во Клиничка болница Штип, каде што В.П. им подлегнал на повредите. Увид извршиле полициски службеници при СВР Штип, а на местото излегол трудов инспектор“, велат од МВР.
По наредба на јавен обвинител телото на починатиот било дадено на обдукција.