Министерството за внатрешни работи ја известува јавноста дека по добиени сознанија за активностите за изградба на водоснабдителен систем за село Синичане, Тетовско, е излезено на самото место на терен, прибавени се податоци и информации и до Основното јавно обвинителство Тетово поднесено е известување за сомнение за сторено кривично дело бесправно градење, соопшти на денешната прес-конференција портпаролот на МВР, Тони Ангеловски.

„Потенцираме дека присуството на полициски службеници на местото на кои се почнати работни активности за изградбата на водоснабдителниот систем е во функција на обезбедување на јавниот ред и мир. Наша задача е единствено да бидат преземени сите законски мерки со цел да се спречи нарушување на јавниот ред и мир на таа локација за да не дојде до несакани настани со посериозни последици за мирот и безбедноста на граѓаните и тоа ќе го правиме сè додека постои безбедносна процена дека тоа може да се случи“, рече Ангеловски.

Што се однесува до координацијата и соработката со Јавното обвинителство, Ангеловски потенцира дека МВР соработува со Обвинителството во сите случаи, се разбира, и во овој за истрагата што ја води Обвинителството.

„Но, ние како институција, која е задолжена за одржување на јавниот ред и мир, имаме оперативни сознанија и неколку конкретни пријави од локални жители за опасност од сериозно нарушување на јавниот ред и мир и поради тоа на ова место има полициски службеници. Повторувам, со цел да се избегне какво било нарушување на јавниот ред и мир. Полицијата е сервис на сите граѓани и ние сме должни да постапиме во вакви случаи, а за тоа дали и каде треба да се гради водовод, ние немаме апсолутно никакви ингеренции ,туку за тоа се надлежни други институции и тие треба да одлучуваат за тоа“, рече Ангеловски.