Свет
Британските медицински работници на протест, бараат повисоки плати

Mедицинските работници во Велика Британија се собраа да протестираат во неколку градови, барајќи од владата повисоки плати за нивната макотрпна работа за време на пандемијата на коронавирусот.
На протестот во Лондон, демонстрантите кои во главно носеа маски и се придржуваа до правилата за физичка дистанца, маршираа до вратата на Даунинг стрит, седиштето на Владата и домот на премиерот Бори Џонсон, извикувајќи: „ Борис Џонсон слушни не`. Плати ни адекватно или замини“.
Медицинските работници се прославени како херои за време на пандемијата и од страна на владата и од јавноста, но тие тврдат дека децениското намалување на трошоците на оваа, но и на претходната влада, направиле Националната здравствена служба да се бори за опстанок.
Слично постапија и лекарите и медицинскиот персонал во Глазгов, со пораките: „Доста празни зборови, дајте ни фер плати“ и „Борисе, кој те спаси?“, алудирајќи на тоа дека Џонсон беше во тешка состојба кога беше заразен со ковид-19.
Медицинските сестри, негователи и млади доктори се бесни бидејќи се изоставени од плановите за зголемување на платите над стапката на инфлација, во однос на речиси еден милион други работници во јавниот сектор, кои имаат поинакви договори со владата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп и Путин нема да разговараат еден на еден

Денешната билатерална средба меѓу американскиот и рускиот претседател ќе се одржи во променет формат, што претставува значително отстапување од претходната практика.
Наместо состаноци „еден на еден“, на разговорите ќе присуствуваат клучни соработници, што има за цел да обезбеди поголема транспарентност.
Средбите на Доналд Трамп со Владимир Путин за време на неговиот прв претседателски мандат честопати беа обвиткани во тајност. Бидејќи во просторијата беше присутен само преведувач, јавноста во голема мера не беше свесна за што точно разговарале двајцата лидери.
Вклучувањето на двајца високи функционери на денешната средба – државниот секретар Марко Рубио и специјалниот претставник на САД Стив Виткоф – треба да обезбеди многу поголемо ниво на јасност. Ова ќе биде особено важно ако, по средбата, руската страна понуди поглед на настаните што се разликува од американската перспектива.
Покрај тоа, еден од соработниците ќе може да води официјални белешки, што е клучен елемент за создавање веродостоен запис од разговорот на толку високо ниво.
Свет
Летот на Путин до Алјаска бил најследениот на светот

Летот со кој рускиот претседател Владимир Путин отпатува за Алјаска, каде што ќе се сретне со американскиот лидер Доналд Трамп, бил најследен во светот.
Рускиот владин авион слета во Алјаска, каде што е закажана средбата меѓу претседателот на Русија Владимир Путин и претседателот на Соединетите Американски Држави Доналд Трамп, објавува Ројтерс, повикувајќи се на веб-страницата „Флајт радар“, која ги следи летовите низ целиот свет.
Претходно денес, авионот Ту-214, за кој се верува дека го превезувал рускиот претседател Владимир Путин, влезе во воздушниот простор на Соединетите Американски Држави, според податоците од „Флајт радар“.
Движењето на авионот го следеле повеќе од 80.000 луѓе.
И авионот на американскиот претседател Доналд Трамп слета денес во Алјаска, каде што треба да се сретне со рускиот претседател Владимир Путин.
Според Ројтерс, авионот слета кусо по 20:15 часот по средноевропско време.
Свет
Трамп: Европа нема да ми каже што да правам, ако состанокот со Путин не е добар – ќе си заминам

Американскиот претседател Доналд Трамп е на пат кон Алјаска каде што ќе има историска средба со рускиот лидер Владимир Путин. Тој објави видео на социјалната мрежа „Вистина“ во кое новинарите му поставуваат прашања во авионот „Ер Форс Уан“.
Како што рече на самиот почеток, не е сигурен каков би бил исходот од средбата.
– Не знам, ништо не е зацртано. Сакам одредени работи. Сакам да видам прекин на огнот – рече Трамп, а потоа ја спомена Европа.
– Ова нема никаква врска со Европа. Европа нема да ми каже што да правам, но тие ќе бидат вклучени во процесот, очигледно, како и Зеленски, но сакам брзо да видам прекин на огнот – вели тој.
Нема да биде среќен ако денес не постигне одреден договор со Путин.
– Сите велеа дека не може да биде денес, но јас само велам дека сакам убивањето да престане. Јас сум во ова за да го спречам убивањето. Знаете, ние не инвестираме пари. Ние заработуваме пари. Тие го купуваат нашето оружје, а ние го испраќаме во НАТО, а НАТО ни испраќа големи, убави чекови. Но, не ме интересира тоа“, рече американскиот лидер.
Трамп додаде и дека ќе „излезе од состанокот со Путин ако не помине добро“.
– Мислам дека сè ќе испадне многу добро, а ако не помине добро, ќе се вратам дома многу наскоро – рече Трамп.
Кога новинарите го прашаа дали ќе стане и ќе го напушти состанокот, Трамп рече:
– Ако состанокот е лош, нема да повикам никого – си одам дома. … Но, ако состанокот е добар, ќе ги поканам претседателот Володимир Зеленски и европските лидери.