Маж од германскиот град Оснабрик доживеал вистински кошмар кога останал заглавен во лифтот од сопствениот семеен дом – цели 96 часа, без храна, вода и можност да повика помош.

Полицијата потврди дека инцидентот се случил во јули, но деталите беа објавени дури неодамна. Иако неговиот идентитет и точната возраст не се откриени, познато е дека човекот е во своите седумдесетти години.

Не е јасно зошто неговата семејна куќа има лифт, бидејќи според полицијата, мажот не бил лице со посебни потреби.

На фотографијата направена во лифтот се гледа очајот во кој се наоѓал – панелите на кабината биле искинати, а металните компоненти искривени, очигледно во обид да излезе или барем да привлече внимание.

Како што наведува полицијата, мажот немал мобилен телефон со себе, а поради дефект на осигурувачот не работело ниту копчето за итни случаи. На крајот, животот му го спасил неговиот син, кој по неколку дена без контакт со татка си, повикал полиција.

На местото веднаш биле испратени двајца полицајци, кои по пристигнувањето слушнале слаб глас од внатрешноста на лифтот. Несреќниот маж бил дехидриран и целосно исцрпен, по што веднаш бил пренесен во болница.

Според медицинските проценки, човечкото тело може да преживее без вода три до пет дена, во зависност од условите.

Кон крајот на август, откако закрепнал и се вратил дома, човекот ги поканил полицајците на кафе за лично да им се заблагодари.

Тогаш им рекол: „Како љубител на брзи автомобили, никогаш не ја сакав полицијата – но тогаш бев пресреќен што слушнав глас од вас.“

Полицајците на ова одговориле со доза хумор, па на својот официјален „Инстаграм“ профил напишале:
„Без разлика дали сте пријател на полицијата или не – ние сме тука за сите вас.“

Британскиот здравствен систем се соочува со сериозни проблеми и често не успева адекватно да одговори на потребите на граѓаните, а еден од најпотресните примери доаѓа од Лестершир.

Во сведоштво за „Метро“, синот на починатата жена отворено го сподели болното искуство, кое укажува на преоптовареноста на службите за итна медицинска помош.

„Додека мајка ми лежеше на подот, во болки и лишена од достоинство, ме праша: ‘Кога ќе дојде помошта?’ Тие зборови засекогаш ќе ме прогонуваат, бидејќи не знаев што да ѝ одговорам, ниту можев да ѝ понудам утеха каква што заслужуваше,“ раскажува синот, чие мајка Џеки (78) починала од сепса.

Сè се случило на 10 јули 2022 година, кога Џеки паднала во својот дом и го активирала алармот за итни случаи. Синот веднаш дошол и ја затекнал како лежи неподвижна на подот од спалната соба. Пријателот кој бил со него се јавил на итната помош — во 5 часот наутро.

„Нè предупредија дека чекањето може да трае и до 10 часа, но нè уверија дека тоа сигурно нема да се случи. Мајка ми се жалеше на болка во ребрата, па по нивна препорака, ја оставивме да лежи без да ја поместуваме,“ објаснува тој.

Но, помошта не пристигнала. Во текот на следните 11 часа, синот повеќепати се јавувал на бројот 999, барајќи да се ажурира итноста на случајот.

„Им велев дека мајка ми е стара, повредена, во болки и плаче. Секојпат го добивав истиот одговор – некој ќе дојде што е можно побрзо,“ раскажува тој.

Чувството на немоќ било поразително.

„Се двоумевме дали сами да ја однесеме во болница, но ни рекоа да не ја мрднуваме поради ризик од внатрешни повреди. Времето минуваше, а надежта слабееше.“

Кога конечно пристигнал првиот медицински техничар, веднаш повикал амбулантна екипа. Итната помош стигнала по половина час. Персоналот бил човечен и професионален — но немоќен.

Џеки била пренесена во болница. На почеток изгледало дека ќе закрепне, но следното утро синот добил повик да дојде веднаш.

Инфекцијата, која на почеток не се поврзувала со падот, брзо преминала во сепса. Неговата сестра итно допатувала од Дубаи и стигнала точно на време да се прости. Џеки починала истата вечер — само 48 часа по падот.

„Сè се случи многу брзо, а сепак имав чувство дека времето застана. Кога таа ноќ излегов од болница, бев скршен. Не можев да сфатам како од обичен разговор стигнавме до загуба — за само два дена,“ вели тој.

Во неделите по нејзината смрт, болката се претворила во гнев.

„Почнав да истражувам колку чекаат луѓето на итна помош и бев шокиран — нашата приказна не е единствена. Илјадници луѓе во Британија го доживуваат истото, а некои, за жал, и сличен крај.“

Според The Health Foundation, бројот на пациенти кои чекале над 12 часа на прием достигнал рекордни нивоа. Доцнењата при предавањето пациенти меѓу амбулантите и болниците биле полоши отколку во која било претходна зима.

„Зад секоја бројка се крие човек, семејство, болка — како нашата,“ вели тој. Тоа сознание го поттикнало да се активира.

Оттогаш, станал еден од најгласните активисти за реформа на здравствениот систем. Се залага за повеќе финансирање, пократко чекање на итната помош и целосна реформа на социјалната грижа.

Тој денес јавно зборува за семејната трагедија, се приклучил на групи како Just Treatment, и постојано апелира до надлежните: „Ниту едно семејство не смее да минува низ ова. Системот мора да се промени – и тоа веднаш.“

Катарскиот премиер Мохамед бин Абдулрахман Ал-Тани вчера изјави дека неговиот израелски колега Бенјамин Нетанјаху мора да биде изведен пред лицето на правдата откако израелскиот напад врз лидерите на Хамас во Доха во вторникот „ја убило секоја надеж“ за ослободување на заложниците во Газа.

Ал-Тани додаде дека Катар преиспитува сè во врска со својата улога како посредник во досега неуспешните разговори насочени кон прекин на огнот во конфликтот предизвикан од нападот на Хамас на 7 октомври 2023 година. Израелските воздухопловни сили во вторникот ги погодија лидерите на Хамас кои се состанаа во комплекс во Доха, главниот град на сојузник на САД кој редовно е домаќин на разговорите.

„Мислам дека она што го направи Нетанјаху беше да ја убие секоја надеж за заложниците“, рече Ал-Тани во изјава за „Си-ен-ен“, додавајќи дека Нетанјаху „мора да биде изведен пред лицето на правдата“. Нападот, исто така, предизвика ретки критики од американскиот претседател Доналд Трамп, близок сојузник на Израел, кој рече дека е многу незадоволен поради тоа и дека потегот е неразумен.

Нетанјаху ги предупреди катарските власти: „Им велам на Катар и на сите нации што засолнуваат терористи: мора или да ги протерате или да ги изведете пред лицето на правдата. Бидејќи ако не го сторите тоа, ние ќе го сториме тоа“. Хамас, кој е во војна со Израел во Појасот Газа, тврди дека неговите насочени високи функционери преживеале, но дека шест лица биле убиени во израелските напади.