Македонија
Заев: Подготвен сум да бидам премиер во наредните четири години
Лидерот на СДСМ, Зоран Заев, е уверен дека ќе успее да состави влада во следните 20 дена, а веќе денеска продолжуваат преговорите и со лидерот на ДУИ, Али Ахмети. Кога на Заев му беше врачен мандатот од претседателот Стево Пендаровски, тој посочи дека со ДУИ имаат доста сериозни прашања, кои не се затворени. Запрашан за тоа дали ќе му ја оствари желбата на потенцијалниот коалициски партнер – ДУИ за прв премиер Албанец, Заев рече дека е подготвен да биде претседател на владата следните четири години иако се разговара за ова прашање со Ахмети. Тој додаде и дека целта му е да состави стабилна влада со повеќе од 61 пратеник во Собранието.
„Да, јас денес го добивам мандатот и се спремам да бидам четири години премиер. Но, една од темите е и таа. Овде, секако, разговорите се отворени со ДУИ. Во такви околности разумноста и желбата да се биде сервис за граѓаните треба да нè води. Но, тоа треба да го разберат и потенцијалните коалициски партнери. Се обидуваме да ги дадеме сите можни информации до онаму каде што нема да ги нарушиме преговорите. Денес, имам средба со претседателот на ДУИ, Али Ахмети. Имаме успех во многу аспекти, а имаме и прашања што не се затворени, а се прилично сериозни. Се надевам на успех бидејќи граѓаните ни дадоа насоки кој со кого да преговара. Граѓаните кажуваат со кого треба да се направат сите можни напори. Но, опциите постојат“, рече Заев.
На преговорите се разговарало и за кандидатите на ДУИ и распределбата на ресорите, а сите одлуки што ќе ги донеле, според Заев, ќе бидат според желбата на граѓаните.
„Сите партии со кои се видовме се согласуваат да зборуваме за граѓаните. Да, за еднаквоста, правата и за обврските. Но, да зборуваме за граѓаните. Од таков аспект отворено е да зборуваме за граѓаните како потенцијални кандидати во согласност со вродените успеси, вградената перцепција кај граѓаните дека се добри кандидати. Во делокругот на сите тие работи ги гледаме сите аспекти. Не зборувам само за претседател на владата, туку и за министри и други кадри. Решението што ќе го изнајдеме е за еднаквоста на граѓаните“, додаде Заев.
Тој неколкупати во текот на својот говор посочи дека очекува флексибилност од ДУИ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерството за животна средина отстапи движни ствари на повеќе општини, за потребите на училиштата вклучени во ГЛОБЕ програмата
Владата, на предлог на Министерството за животна средина и просторно планирање, донесе одлука со којашто движни ствари во сопственост на министертството, се даваат на трајно на повеќе општини во државата, за потребите на повеќе основни училишта и тоа во Гевгелија, Неготино, Валандово, Битола, Прилеп, Тетово, Куманово, Пробиштип, Ранковце, Велес, како и на училишта во скопските општини: Центар и Карпош.
Целта е спроведување на ГЛОБЕ програмата во Република Северна Македонија, а Министерството за животна средина и просторно планирање, како што е посочено, е носител на активностите на ГЛОБЕ програмата и со владина одлука е задолжено да обезбеди хемикалии и инструменти за вршење на мерењата и да ги пренесе на користење на вклучените училишта во програмата.
Станува збор за движни ствари што ќе им бидат од полза на училиштата во спроведувањето на проектот, а коишто, по пат на јавна набавка ги обезбедило ресорното министерство.
Македонија
Одлука за учество на Армијата во НАТО операцијата „КФОР“ во Косово
Владата, на предлог на Министерството за одбрана, донесе Одлука за определување на бројот на кандидати кои се запишуваат на Воената академија „Генерал Михаило Апостолски“- Скопје, во студиската учебна 2024/2025 година, чие образование се финансира од Буџетот на Република Северна Македонија.
Со одлуката е определено, во студиската учебна 2024/2025 година да се запишат 44-ца студенти/питомци како редовни студенти, од кои 25-мина студенти/питомци за потребите на Министерството за одбрана – Армијата на Република Северна Македонија; како и тројца студенти/питомци за потребите на Војската на Црна Гора; шестмина студенти/питомци за потребите на вооружените сили на Босна и Херцеговина; петмина студенти за потребите на управување со кризи и петмина студенти за потребите на заштита и спасување.
Согласно Законот за Воената академија, како што е образложено од ресорното министерство, на Академијата можат да студираат и припадници на вооружените сили на странски држави и странски државјани.
Владата, на предлог на Министерството за одбрана, донесе и Одлука за испраќање припадници на Армијата на Република Северна Македонија за учество во НАТО операцијата „КФОР“ во Република Косово.
Македонија
Заклучоци на Владата по случувањата со новиот стадион во Тетово: да се прекине со работите на теренот, додека нема правна разврска на случајот
Владата на Република Северна Македонија, по побарано мислење од Уставниот суд, го разгледа случајот со користењето и случувањата околу Новиот стадион во Тетово и донесе неколку заклучоци.
Владата, во разгледувањето, ја имаше предвид иницијативата до Уставниот суд, за оценување на уставноста и законитоста на постапките поврзани со Стадионот, а каде е посочено дека Новиот фудбалски стадион, со владина одлука во 2015 година, е даден на трајно користење, без надомест на Општина Тетово. Општината, како што е наведено, без законски основ, го дала Стадионот на трајно користење на ЈП „Тетово транспорт“. Дури, градоначалникот на Општина Тетово, Општина Тетово и ЈП „Тетово транспорт“, на јавен настан промовирале проект за рушење и изградба нов градски стадион.
Владата при носењето на заклучоците на денешната седница ги зеде предвид и одредбите на Законот за користење и располагање со стварите во државна сопственост и со стварите во општинска сопственост, според коишто, надлежност да дава на трајно користење и да утврдува престанок на корисничко право, има само Владата на Република Северна Македонија.
Заклучено е, Генералниот секретаријат на Владата да подготви комплетна информација во врска со статусот на објектот Нов фудбалски стадион – Тетово, КП бр. 11476. Во меѓувреме, да се испрати укажување до Општина Тетово, да се прекине со работите на теренот, додека нема правна разврска на случајот. Исто така, Владата одлучи да се обрати со препорака до Уставниот суд, да ја земе предвид итноста на овој случај и да се произнесе во врска со поднесената Иницијатива за оценување на уставноста и законитоста на постапувањето во него. Владата заклучи и да се разгледаат правни основи, согласно Кривичниот законик, за покренување соодветна пријава до надлежните органи, во врска со овој случај.