Свет
Специјалниот трибунал за Либан: Лидерите на Хезболах не се соучесници во убиството на Рафик Харири

Специјалниот трибунал за Либан не најде докази дека раководството на Хезболах било вмешано во убиството на поранешниот либански премиер Рафик Харири, рече судијата Дејвид Ре денеска, пренесува ТАСС.
„Судскиот совет е на ставот дека Сирија и Хезболах можеби имале мотиви да ги елиминираат Харири и неговите политички сојузници, но нема докази дека раководството на Хезболах е вмешано во убиството на Харири и нема директен доказ за директна вмешаност на Сирија“, рече тој.
Судот, исто така, дошол до заклучок дека терористичкиот напад го извршил бомбашсамоубиец, чиј идентитет не може да се утврди. Се очекува пресудата да создаде дополнителни политички тензии во земјата, која веќе врие од незадоволство и протести против актуелната политика и корумпираните политичари.
Рафик Баха ел Дин ал Харири беше либански магнат и премиер на Либан од 1992- 1998 година и повторно од 2000 година до својата оставка во 2004 година. Во овој период, Харири беше на чло на пет влади.
Харири доминираше во повоениот политички и економски живот во Либан и често му ги припишуваат заслугите за обновата на Бејрут по петнаестогодишната граѓанска војна.
Харири беше убиен на 14 февруари 2005 година во детонација на бомба кога колоната со неговиот автомобил поминувала покрај хотелот „Сент Џорџ“ во Бејрут. За убиството беа обвинети наводните поддржувачи на Хезболах, но други го поврзуваа убиството со сириската влада.
Убиството на Харири беше катализатор за драматични политички промени во Либан. Масовните протести во текот на Кедарската револуција доведоа до повлекување на сириската војска и полиција од Либан и до промени во владата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вулин до фон дер Лајен: Побрзо ќе ја прифатите Турција во ЕУ отколку Србија да ја предаде Русија

Александар Вулин, кој во минатото извршуваше голем број важни функции во Србија, ги коментираше изјавите дадени од претседателката на Европската комисија, Урсула фон дер Лајен, за време на нејзината посета на Белград.
„Очекувам Европската Унија целосно да се усогласи со политиката на Србија, вклучително и повлекување на признавањето на таканареченото Косово, како и итно повлекување на сите одлуки што го кршат Дејтонскиот договор и ги намалуваат овластувањата на Република Српска. Госпоѓо фон дер Лајен, никој не нè праша дали сакаме да се впуштиме во авантурата за приклучување кон Европската Унија, но ви гарантирам дека ќе најдеме начин да ја прашаме Србија што мисли за продолжување на авантурата. И да не заборавам, попрво вие ќе ја примите Турција во Европската Унија отколку Србија да ја предаде Русија“, рече Вулин, пренесува „Телеграф“.
Фон дер Лајен разговараше со српскиот претседател Александар Вучиќ во Белград. На заедничката прес-конференција таа рече дека очекува Србија „да го започне својот пат кон Европската Унија двапати побрзо“.
„Нашите позиции се јасни и вклучуваат слобода, а не репресија, вклучително и право на мирно собирање, партнерство, а не потчинување, дипломатија, а не агресија“, нагласи фон дер Лајен, оценувајќи дека „сега е вистинското време Србија да преземе чекори кон пристапување“.
„Вреди да се вложи овој напор бидејќи се приближувате до целта. Потребно е да се забрзаат реформите во владеењето на правото, електронските медиуми, изборните закони и хармонизацијата со надворешната политика на Европската Унија“, изјави таа, истакнувајќи дека овие реформи бараат упорност, трпение, учество на сите сегменти од општеството и политичкиот спектар.
Свет
ОН: Израелската армија продолжува да убива цивили

Канцеларијата за човекови права на Обединетите нации соопшти дека израелската армија продолжува да убива цивили во областите околу линиите каде што силите се прераспоредија во Газа.
Според ОН, најмалку 15 Палестинци се убиени во близина на израелските позиции во Појасот Газа.
Израелската армија сè уште контролира околу 53 проценти од територијата на Газа откако се повлече на првичните линии договорени според прекинот на огнот.
Вчера, израелската армија соопшти дека отворила оган врз неколку осомничени откако здравствените власти во Газа објавија дека најмалку шест Палестинци се убиени во два одделни инциденти.
Израелските одбранбени сили соопштија дека отвориле оган кога осомничените ја преминале линијата на повлекување и се приближиле до силите во северна Газа.
„Од суштинско значење е прекинот на огнот да се одржи и да доведе до враќање и целосно спроведување на палестинското право на самоопределување“, рече Аџит Сунгеј, раководител на канцеларијата за човекови права на ОН.
„Подеднакво е важно сите напори за реконструкција, вклучително и воспоставувањето јавен ред и цивилен живот, да бидат во согласност со меѓународното право и заштитата на човековите права на Палестинците“, додаде тој.
Министерството за здравство на Газа потврди дека ги примило телата на 45 Палестинци што Израел ги предаде на Црвениот крст вчера, со што вкупниот број на предадени тела се искачи на 90.
Фото: ЕПА
Свет
Министерот за одбрана на САД: Мирот се постигнува со сила, а не со зборови, зголемете ја помошта за Украина

Министерот за одбрана на САД, Пит Хегсет, денес ги повика сојузниците од НАТО да ги зголемат трошоците за американско оружје за Украина по извештајот што покажа нагло намалување на воената поддршка за Киев во јули и во август.
„Мирот го постигнувате кога сте силни. Не кога користите силни зборови или покажувате со прст, туку кога имате силни и реални способности што вашите противници ги почитуваат“, им рече тој на новинарите пред состанокот со колегите од НАТО во седиштето на алијансата во Брисел.
Хегсет ги замоли сојузниците да ги зголемат инвестициите во програмата PURL (Приоритетна листа на барања за Украина).
„Нашето очекување денес е повеќе земји да донираат повеќе, да купат повеќе за да ја снабдуваат Украина за да го доведат тој конфликт до мирен крај“.
Обезбедени 2 милијарди долари
Генералниот секретар на НАТО, Марк Руте, рече дека очекува дополнителни ветувања истакнувајќи дека 2 милијарди долари веќе се обезбедени преку механизмот.
Сепак, овој износ е помал од 3,5 милијарди долари, што украинскиот претседател Володимир Зеленски се надеваше дека ќе ги обезбеди до октомври.
Шведска, Естонија и Финска ги ветија своите придонеси во средата, но земјите како Шпанија, Италија, Франција и Велика Британија се соочија со критики за нивната воздржаност.
Украина останува во голема мера зависна од американското оружје додека се подготвува за уште една зима на конфликт со Русија.
Килскиот институт за светска економија објави во вторникот дека воената помош за Украина се намалила за 43 проценти во јули и август во споредба со првата половина од годината.
Фото: принтскрин