Регион
Притисок врз Србија да го признае Косово – на маса економски план вреден неколку милијарди евра
Српската страна на преговорите во Белата куќа тврди дека се врши притисок врз претседателот Александар Вучиќ да потпише документ, со кој би ја признал независноста на косово. Како што пренесуваат српските медиуми, на маса се наоѓа економски план вреден неколку милијарди евра.
Специјалниот советник на американскиот претседател Ричард Гренел на Твитер негираше дека се вршел притисок врз српскиот претседател.
Претходно беше кажано дека на маса е ставен документ за меѓусебно признавање на Србија и Косово. Српскиот министер за финансии, Синиша Мали изјави дека разговорите се исклучително тешки и напорни, бидејќи како што нагласи, сите вршат притисок врз Србија.
„Ова е најлошиот документ што сме го добиле од почетокот на преговорите со Приштина до сега. На масата имаше 16 точки, од кои десеттата подразбира меѓусебно признавање. Има и економски теми и оние кои се однесуваат на инфраструктурата, автопат, железница, помош за малите и средни компании за да се подигне економијата во целиот регион. Огромен притисок“ изјави Мали.
Вучиќ пред почетокот на разговорите од Вашингтон порача дека преговорите ќе бидат многу напорни за Србија, но дека предавањето не е опција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Грција ќе забрани издавање нови дозволи за краткорочно изнајмување во центарот на Атина
Забраната за издавање нови дозволи за краткорочно изнајмување во три квартови во строгиот центар на Атина ќе остане на сила најмалку една година, објави денеска грчката влада, истовремено зголемувајќи го данокот за изнајмување на такво сместување за одмор.
Како и многу други европски туристички дестинации, Грција се бори да ја балансира профитабилната индустрија управувана од онлајн платформите како што е Airbnb со потребите на локалните жители кои се соочуваат со недостиг на станови.
Недостигот на станови и зголемените трошоци за живот ги натераа властите да објават одлука овој месец за зголемување на даноците за краткорочни изнајмувања, забрана на нови дозволи во центарот на Атина и охрабрување на сопствениците на имот да се префрлат на долгорочни изнајмувања.
Грчката министерка за туризам Олга Кефалојани денеска најави дека забраната за ново краткорочно изнајмување во Атина ќе стапи на сила од 1 јануари 2025 година.
Дневниот данок на краткорочни изнајмувања и помага на земјата да се справи со влијанието на природните катастрофи поврзани со климатските промени. Во периодот од април до октомври ќе се зголеми од 1,5 на 8 евра, изјави министерот за финансии. Во зимските месеци данокот ќе се зголеми од 0,5 на 2 евра.
Министерот Кефалојани рече дека Грција годинава од туризмот очекува приход од 22 милијарди евра, што е уште еден рекорд. Таа во борбата против масовниот туризам најави уште една мерка – такса во висина од 20 евра за посетителите од бродовите за крстарење кои во екот на летната сезона ги посетуваат островите Санторини и Миконос, а ќе стапи на сила следната година.
Регион
Земјотрес го погоди Сараево
Послаб земјотрес го потресе Сараево изутрината.
Како што соопшти Федералниот хидрометеоролошки завод во Сараево, во Центарот за сеизмологија е регистриран во 8.04 часот слаб земјотрес во областа на главниот град на Босна и Херцеговина.
Магнитудата на земјотресот била 2,2 степена според Рихтеровата скала, а интензитетот во епицентарот бил III степен според Меркалиевата скала.
Многубројни жители на Сараево пријавиле тресење на земјата на услугата EMSC.
„Кратко, но силно“, „Кратко, татнеж“, „Само мал трепет и силен звук“, „Кратко, но жестоко“, изјавија тие во своите коментари.
Регион
Ердоган ги спореди израелските напади во Газа со геноцидот во Сребреница
Турскиот претседател Реџеп Тајип Ердоган денеска по разговорот со претседавачот на Претседателството на БиХ, Денис Беќировиќ изјави дека Израел ќе одговара за злосторствата во Газа, споредувајќи ги со геноцидот во Сребреница.
„За жал, денес во Газа и на окупираните палестински територии сме сведоци на сличен масакр што беше извршен пред очите на целиот свет во Босна и Херцеговина во 1990-тите“, рече Ердоган, кој денеска го прими Беќировиќ во Истанбул.
Тој додаде дека Израел ќе биде кривично гонет за убиствата на повеќе од 41.000 Палестинци во Газа, вклучително и турскиот активист Ајсенур Езги Ејги, кој беше убиен на Западниот Брег минатата недела.
„Сторителите на геноцидот во Газа, како оние во Сребреница во 1995 година, ќе одговараат пред меѓународните судови“, рече Ердоган.
Тој потсети дека Турција ја спонзорирала Резолуцијата на ОН за осуда на геноцидот во Сребреница и дека таа земја се залага за стабилноста на Босна и Херцеговина. Тој ги повика властите во БиХ да се приклучат во борбата против движењето ФЕТО, сметајќи дека таа организација е терористичка.
Фето е движење на Фетулах Ѓулен, поранешен сојузник, а сега противник на претседателот Ердоган, кого го смета за виновен за обидот за воен удар во јули 2016 година. Беќировиќ рече дека пријателството меѓу Босна и Херцеговина и Турција е нераскинливо.
„Република Турција е докажан пријател на Босна и Херцеговина и една од најсилните членки на НАТО алијансата и затоа, меѓу другото, нејзината поддршка за Босна и Херцеговина е исклучително важна“, нагласи Беќировиќ.