Црна хроника
Запленети девизи, цигари, лекови, облека, мобилни телефони, фалсификати…
Во текот на минатата недела и викендот, царинските службеници спречија еден обид за увоз на гориво чиј увоз е забранет и откриени се повеќе обиди за криумчарење стока, при што привремено се задржани девизи, цигари, облека, обувки, боја за јајца, верски украси, мобилни телефони, тонери и фалсификати.
При личен претрес на македонски државјанин на скопскиот аеродром Александар Велики, кој допатувал со лет од Цирих биле пронајдени 12 илјади швајцарски франци. Во специјален појас, обвиткан околу телото на патникот, биле пронајдени 24 илјади швајцарски франци, од кои 12 илјади франци – противвредност на 10 илјади евра, износ што резидент може слободно да го внесе во државата му се вратени, а останатите 12 илјади франци се привремено задржани.
На граничниот премин Табановце, при контрола на патничко возило со македонски регистарски таблички, со кое за излез од државата се пријавиле двајца македонски државјани, биле пронајдени 7 илјади евра.
Во рачна ташна сопственост на сопатникот во возилото, пронајдени се 9 илјади евра, од кои, согласно законските одредби на патникот му се вратени 2 илјади евра, а останатите 7 илјади евра се задржани.
На скопскиот аеродром Александар Велики, во соработка со аеродромската служба, при контрола на чекираниот багаж на македонски државјанин кој имал намера да отпатува со лет за Лондон биле 30 штеки цигари Marlboro Gold оriginal, без акцизни маркички.
Во два одвоени случаи, од страна на мобилните царински тимови, биле откриени 157 готови текстилни производи и 200 пара женски чевли.
Во првиот случај, 157 готови текстилни производи пронајдени се во патните торби на македонски државјанин, патник во автобус, што сообраќал на релација Истанбул-Куманово, пријавен за влез во државата на граничниот премин Богородица.
Во вториот случај, при контрола на стока со потекло од Кина, наменета за увозник од Скопје, пријавена за увозно царинење на царинската испостава Скопје 2, пронајдени се 200 пара женски чевли, што не биле опфатени со приложените царински документи.
На царинската испостава Струмица пак, откриен бил обид на увозник од Струмица за увоз на екстра лесно гориво со повисоки параметри на обележувач Solvent yellow 124 (mg/lit) од утврдените параметри за оваа гориво, според Правилникот за спроведување на законот за акцизи.
При документарен и физички преглед на горивото, царинските службеници се посомневале во правилно прикажување на параметрите поради што се земени мостри и испратени на испитувања во Царинската лабораторија.
Од извршените испитувања утврдено е дека мострите содржат поголема количина обележувач Solvent yellow 124 (mg/lit) од законски определените од 6 до 9 mg во литар гориво, односно се работи за гориво чиј увоз и извоз е забранет.
Царинската испостава изготви мандатна казна за увозникот за погрешно декларирање на стоката и решение за враќање на стоката во странство./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.