Италија дава пример за другите европски земји со тоа што испраќа мигранти во трети земји за да ги процесуираат нивните барања за азил, изјави денеска италијанската премиерка Џорџа Мелони. Мелони пред Сенатот на италијанскиот парламент рече дека испраќањето мигранти во двата мигрантски центри изградени од Италија во Албанија претставува, како што рече, „нов, храбар, невиден начин, но кој совршено го одразува европскиот дух“.

Првата група мигранти, составена од 10 државјани на Бангладеш и шест Египќани, беше спасена во морето во близина на Либија во неделата, а во среда треба да пристигне во Албанија. Мигрантите во Албанија се превезуваат со бродот на морнарицата „Либра“. Центрите за мигранти во Шенџин и Ѓадер на северот на Албанија почнаа да функционираат минатата недела, пренесуваат локални медиуми.

Италијанскиот министер за внатрешни работи Матео Пјантедози во саботата изјави дека првите мигранти ќе пристигнат оваа недела во двата мигрантски центри што Италија ги изгради на територијата на Албанија.

Пјантедози им рече на новинарите дека нема да има свечено отворање на центрите за мигранти, наведувајќи дека центрите во Албанија ќе бидат слични на оние во Италија со режими на „мек притвор“. Нема бодликава жица, има здравство“, посочи Пјантедози.

Според него, сите мигранти можат да поднесат барање за меѓународна заштита во овие центри и можат да ја добијат во рок од неколку дена. Мигрантите кои беа спасени од меѓународните води и кои се обидуваат да стигнат до Италија со бродови и чамци ќе бидат сместени во два мигрантски центри во Албанија.

Според најавите, во овие центри нема да има жени, деца или ранливи групи. Едниот центар е во Шенџин на северот на Албанија, а другиот е во блискиот Ѓадер, на местото на поранешната воена база.

Со центрите целосно ќе управува италијанската влада, која платила за нивната изградба. Повеќе од милион мигранти стигнале до Италија по море во изминатите 12 години, пренесува Танјуг.

Еден човек е убиен, а четворица се ранети во пукање на автопат на југот на Израел.

Како што пренесува „Тајмс оф Израел“, тешкоранетиот починал при транспорт во болница, а станува збор за полициски службеник.

Според првичната истрага, полицијата соопшти дека терористот се приближил до патот пеш пукајќи во полицаецот, а потоа ги повредил другите четворица пред да биде застрелан од волонтер од брзата помош, кој случајно се нашол на местото на настанот.

„Возев и видов лице со пиштол како стои на патот“, изјави волонтерот за јавниот радиодифузер „Кан“. „Најпрвин мислев дека е полицаец, а потоа испука неколку куршуми во мене. Скокнав од автомобилот, го извадив пиштолот и го застрелав“.

Патот е повторно отворен откога сообраќајот беше привремено запрен веднаш по нападот.

Според вестите на „Канал 12“, идентитетот на напаѓачот сè уште не е утврден, што укажува дека тој немал досие и можеби илегално преминал од Западниот Брег.

„Гугл“ планира да ги напојува своите центри за податоци со електрична енергија од нуклеарните централи сигнализирајќи дека ќе го следи примерот на другите технолошки гиганти во долгорочните планови за покривање на огромната потрошувачка на енергија на инфраструктурата за вештачка интелигенција.

„Гугл“ планира брзо и безбедно да ги поврзе првите мали модуларни реактори (SMR) на калифорниската компанија „Каирос повер“ на мрежата до 2030 година и да инсталира повеќе реактори до 2035 година, се вели во соопштението објавено денеска.

„Договорот ќе обезбеди вкупно до 500 мегавати нова енергија без јаглерод за американската електрична мрежа и ќе им помогне на повеќе заедници да уживаат во придобивките од чистата и достапна нуклеарна енергија“, рече директорoт во „Гугл“, Мајкл Терел. Терел во интервју за „Фајненшл тајмс“ рече дека нивниот план е да користат шест или седум електрани. Сè уште не е јасно дали струјата од реакторот ќе влезе во мрежата или директно во центрите за податоци.

Финансиските детали од договорот се исто така матни бидејќи „Гугл“ не прецизира дали има намера да ја кофинансира изградбата на електраните или само да купува струја од нив. Посебна карактеристика на малите реактори на „Каирос“ е ладењето со стопени флуоридни соли. Компанијата тврди дека таков модел на ладење е побезбеден од оној на конвенционалните реактори, кои користат вода бидејќи не вклучува загревање до точка на вриење.

Минатата година „Каирос“ доби дозвола за изградба на првиот пробен модуларен реактор во американската сојузна држава Тенеси. Вештачката интелигенција бара големи количества електрична енергија, а „Гугл“ најави дека сака да биде климатски неутрален до 2030 година и моментно ги неутрализира емисиите на јаглероден диоксид (CO2) со мерки како што е садењето дрвја.

Уделот на чиста електрична енергија во центрите за податоци и канцелариите на „Гугл“ минатата година изнесуваше 64 отсто, но емисиите на јаглероден диоксид се зголемија 13 отсто пред една година. Од почетокот на годината и „Амазон“ и „Мајкрософт“ потпишаа договори, кои предвидуваат снабдување на центрите за податоци со електрична енергија од нуклеарните централи.

Во март „Амазон“ купи центар за податоци напојуван со електрична енергија од нуклеарни реактори од „Тален енерџи“. Во септември „Мајкрософт“ потпиша договор со Constellation Energy за враќање на производството на електрична енергија во нуклеарната централа Tree Mile Island, местото на најлошиот нуклеарен инцидент во американската историја.