Свет
Трамп му пркоси на гувернерот на Невада со митинг во затворен простор во близина на Лас Вегас
Американскиот претседател, Доналд Трамп, вчеравечер одржа митинг во затворен простор во еден магацин во близина на Лас Вегас, каде што го нарече гувернерот на државата политички медиокритет и го повика да ја отвори државата, пренесува „Њујорк пост“.
Говорејќи пред илјадници приврзаници собрани во фабриката во Хендерсон, Трамп жестоко го критикува гувернерот Стив Сисолак, кој претходно го нападна Трамп поради одржувањето на митингот, со што ја прекришл државната забрана која ги ограничува собирите на 50 лица.
„Сега имате гувернер кој е политички медиокритет. Патем, кажете му на вашиот гувернер да ја отвори вашата држава. Отворете ја вашата држава“, им рече Трамп на присутните.
Државната економија работи со засебни ограничувања во секоја држава според нивните индивидуални нивоа на ризик од коронавирусот. Казината и рестораните во округот Кларк во Лас Вегас, на пример, работат со капацитет од 50 отсто. Но, баровите и таверните во округот остануваат затворени.
Сите окрузи мора да се придржуваат до државните наредби за ублажување на пандемијата, вклучително и носењето маски и ограничувањето на собирите поголеми од 50 лица.
Одлуката на Трамп да биде домаќин на митингот во недела вечерта – негов втор во исто толку денови во Невада со повеќе од 50 луѓе – Сисолак ја опиша како несовесна и себична.
„Претседателот Доналд Трамп презема непромислени и себични активности што ставаат во опасност безброј животи во Невада. Претседателот, се чини, заборави дека оваа земја е сè уште во средина на глобална пандемија“, рече Сисолак.
Трамп ги увери своите приврзаници дека ќе ги поддржи во случај да се појават какви било проблеми од присуството на митингот во затворените простории.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Орбан: Унгарија ќе ги зголеми трошоците за одбрана доколку војната во Украина продолжи
Унгарија ќе мора да ги зголеми трошоците за одбрана и следната година доколку војната во Украина продолжи до 2025 година, со што ќе се намали износот на расположливите средства за други трошоци, изјави денеска унгарскиот премиер Виктор Орбан.
Орбан изјави за државното радио дека доколку војната во Украина се пролонгира до 2025 година, нивоата на средства за одбрана на Унгарија за 2023 и 2024 година нема да бидат доволни и ќе мора да се зголемат, пренесува агенцијата МТИ. Орбан изјави дека е загрижен за иднината на Европа и дека унгарската влада нема да дозволи Унгарија да биде принудена да влезе во војна по трет пат, откако учествуваше во Првата и Втората светска војна.
Премиерот на Унгарија смета дека е потребно европско безбедносно решение во кое ќе биде вклучена Русија и дека американската воена индустрија најмногу профитирала од војната во Украина, откако САД испратија најголема воена помош во Киев.
„Нашето историско искуство со војната е дека можете само да изгубите. Колку сте поблиску до воената зона, толку е поголема цената што ја плаќате“, рече Орбан.
Унгарија значително ги зголеми одбранбените распределби минатата година на 2,43 отсто од БДП, што е над два отсто на кои се обврзаа членките на НАТО, наведува МТИ.
Европа
Шефот на британската дипломатија: Украина има право да го користи нашето оружје во Русија
Британскиот министер за надворешни работи Дејвид Камерон денеска вети три милијарди фунти (3,74 милијарди долари) годишна воена помош за Украина „колку што е потребно“ и додаде дека Лондон нема ништо против оружјето да се користи во Русија.
„Ќе даваме три милијарди фунти секоја година онолку колку што е потребно. Штотуку навистина исцрпивме се што можеме во однос на давање опрема“, изјави тој за Ројтерс во интервју за време на посетата на Киев, додавајќи дека пакетот помош е најголемиот од ОК до сега.
„Дел од таа (опрема) пристигнува во Украина денеска, додека јас сум тука“, рече тој.
Камерон рече дека Украина има право да користи оружје доставено од Лондон за да нападне цели во Русија и дека тоа зависи од Киев.
„Украина го има тоа право. Исто како што Русија напаѓа внатре во Украина, сосема е разбирливо зошто Украина чувствува потреба да се осигура дека е способна да се одбрани“, изјави Камерон за Ројтерс.
Камерон, кој го предводеше Обединетото Кралство од 2010 до 2016 година како премиер и се врати на политичкиот фронт пред само неколку месеци, се состана со украинскиот министер за надворешни работи Дмитро Кулебa и претседателот Володимир Зеленски во неговата втора посета на Киев како министер за надворешни работи.
Свет
(Видео) Над 30 лица загинаа во поплавите во Бразил, 60 лица се водат како исчезнати
Повеќе од 30 лица загинаа во поплавите во јужен Бразил, 60 лица се водат како исчезнати, додека околу 15.000 жители се евакуирани.
Хидроелектрична брана во бразилската држава Рио Гранде до Сул се урна поради поплавите предизвикани од обилните дождови неколку дена, а најмалку 500.000 луѓе останаа без струја и чиста вода, јавува Би-би-си.
Во акцијата за пребарување и спасување беа вклучени и хеликоптери, а во некои населби жителите се качија на покривите на нивните поплавени домови.
Бразилскиот претседател Луис Инасио Лула да Силва го посети поплавениот регион и вети помош од Владата на Бразил.
Гувернерот на државата Рио Гранде до Сул, Едуардо Леите побара итна помош за луѓето во поплавените подрачја, а владата на таа држава прогласи вонредна состојба.
Метеоролозите најавија дека врнежите ќе продолжат во тој регион.
Повеќе од 30 луѓе загинаа минатата година во циклон во Рио Гранде до Сул.