Црна хроника
Спречен шверц на златен накит, монети, кучиња, цигари и ракија
Минатата недела и викендот, царинските службеници спречија повеќе обиди за шверц на стока, но и царинска измама. Притоа привремено се задржани златен накит, монети, две кучиња, цигари, ракија и друго.
На граничниот премин Богородица, при контрола на германски автомобил, управуван од германски државјанин, пријавен за влез во државата биле откриени 16 парчиња 21-каратен златен накит (нараквици, ѓердан, прстен и обетки) со вкупна маса од 227 грама. Златниот накит е пронајден во украсна кутија скриена во фабричка преграда под возачкото седиште на возилото.
На граничниот премин Табановце автопат при контрола на македонски автомобил, управуван од македонски државјанин, на влез во државата биле откриени 293 стари монети. Непријавените монети се пронајдени во патна торба, сместена на задното седиште на возилото.
При контрола на патничко моторно возило со косовски регистарски таблички, пријавено за излез од Република Македонија на граничниот премин Јажинце, царинските инспектори од Одделението за истраги, во багажниот простор на возилото пронајдоа две кучиња од расата „Азијат“, за кои возачот, косовски државјанин, изјавил дека потекнуваат од Украина, а во Република Македонија се донесени од за него непознато лице.
Возачот приложил и пасоши за кучињата, издадени во Украина, за кои царинските инспектори утврдиле дека не се комплетни, односно не ги содржат податоците за идентификација и за утврдување на потеклото на кучињата. За сторениот прекршок на прекршителот му е изречена глоба во износ од 500 евра, а кучињата се одземени и сместени во соодветни услови во Центарот за обука и дресирање на кучиња (Единица за службени кучиња) на МВР во Идризово.
При контрола на македонски автомобил извршена на патниот правец Кавадарци – Велес, мобилните царински тимови откриле 30 пластични туби со 290 литри ракија. Ракијата, за која возачот не поседувал никакви документи за сопственост, потекло и платени акцизни давачки, е пронајдена во багажниот простор, зад предните седишта и кај совозачкото седиште.
Царинските службеници од Службата за надзор на иматели на одобренија при Царинарница Битола открија и една царинска измама, односно обид за избегнување на плаќање увозни давачки во износ од околу 244 илјади денари. Контролата извршена во магацинските простории и во книговодствената евиденција на фирма од Прилеп – имател на одобрение за увоз за облагородување, покажа недостаток од 7.280 готови текстилни производи, што претходно биле евидентирани со една увозна царинска декларација, како стока вратена за поправка./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Уапсен дилер од Штип, пронајдена дрога и голема сума пари
МВР информира дека вчера по преземени оперативни мерки и дејствија, полициски службеници од Отсекот за недозволена трговија со дрога и оружје го уапсиле 32 годишниот Б.М. од Штип.
При претрес во неговиот дом во Штип извршен по насоки од надлежен обвинител, биле пронајдени и одземени прашкаста материја, поголема сума на пари и дигитална вага.
„Лицето е задржано во полициска станица и во текот на денот со кривичната пријава ќе биде предаден на судија на претходна постапка за понатамошно постапување“, соопштија од полицијата.
Црна хроника
Стружанец објавувал експлицитна содржина од малолетничка
Полицијата во Тетово поднесе кривична пријава против А.А.(41) од Струга, поради постоење основи на сомнение за сторени кривични дела „злоупотреба на лични податоци“ и „производство и дистрибуција на детска порнографија“.
Пријавениот, на социјална мрежа, објавил фотографии и видео снимки со експлицитна содржина од женско лице, кое во тоа време било малолетно.
Црна хроника
Жена од Гевгелија измамила Грк дека е од Царина и му зела 2.000 евра
Полицијата поднесе кривична пријава против М.Ј.(46) од Гевгелија, поради измама.
„Пријавената, на 13 септември на царинскиот терминал на Граничниот премин „Богородица“, го довела во заблуда грчкиот државјанин К.Г.К., на начин што лажно се претставила дека е застапник во царински постапки и лажно му прикажала факти дека сторил тежок царински прекршок, поради што ќе биде задржан на македонско-грчката граница од страна на царинските власти и му побарала 2.000 евра, за да му помогне, на што се согласил“, објави МВР во дневниот билтен.