Европа
Жестоки реакции против новите мерки во Британија, можно е да се вмеша и војската

Новите рестриктивни мерки што ги објави премиерот на Велика Британија, Борис Џонсон, против ширењето на коронавирусот, наидоа на жестоки реакции во јавноста и деловните кругови.
Опозициските лабуристи бараат појаснување на предлогот за користење на војската како поддршка на полицијата во рамките на новите ограничувања за борба со коронавирусот.
Џонсон синоќа, презентирајќи ги новите мерки што во земјата може да останат на сила дури шест месеци, предупреди дека Велика Британија дошла до опасна пресвртна точка во борбата со коронавирусот.
Тој најави и можен ангажман на армијата за поддршка во спроведувањето и контролата на мерките.
Ги повика граѓаните да работат од дома, доколку се во можност, а од четврток баровите и рестораните ќе мора да затвораат во 22 часот и да ги служат гостите само на маси.
Критичарите веднаш потсетија дека владата не толку одамна ги повика сите да се вратат на работа, за да заживее економијата.
Лидерот на лабуристите, Кир Стармер, го искористи својот прв говор на партиската конференција за да го критикува Џонсон за неговата наводна неспособност во борбата со пандемијата.
Во меѓувреме, портпаролот на Џонсон објасни дека ангажманот на војската ќе значи дека армијата исполнува одредени задачи, како што е заштитата на некои објекти, со цел полицијата да може потемелно да се посвети на спроведувањето на мерките против Ковид-19, пренесува „Скај њуз“.
По однос на ова прашање се огласи и лидерот на партијата „Брегзит“, Најџел Фараж, пренесе „Дејли мејл“.
„Премиерот вели дека ние сме земја што ја сака слободата, но ќе ве казнува со 10.000 фунти и ќе испраќа војска по негова волја. Тоа е авторитарно”, напиша Фараж на „Твитер“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Шефот на германската разузнавачка служба: Имаме докази, Русија планира напад врз НАТО

Шефот на германската служба за надворешно разузнавање, Бруно Кал, предупреди дека Германија има „конкретни“ разузнавачки докази дека Русија планира напад врз територијата на НАТО за да ја тестира клучната клаузула во алијансата – Член 5, кој гарантира заемна одбрана.
Во ретко интервју за германскиот подкаст „Table Briefings“, Кал рече дека руското раководство повеќе не верува дека НАТО ќе застане на страната на своите членки и дека Москва би можела да се обиде да провери дали таа обврска всушност се почитува.
„Многу сме сигурни, а имаме и разузнавачки докази за ова, дека [руската инвазија на] Украина не е крај, туку само чекор на патот на Русија кон Западот“, рече Кал.
Тој додаде дека ова не значи дека Германија очекува „големи тенковски единици да се движат од исток кон запад“, туку дека има луѓе во Москва кои сериозно се сомневаат во ефикасноста на Член 5.
Неговите изјави се надоврзуваат на претходните предупредувања на германскиот министер за одбрана Борис Писториус, кој постојано нагласуваше дека Германија „мора да биде подготвена за војна“ до крајот на оваа деценија. „Во моментов не верувам дека е веројатен руски напад“, изјави Писториус за „Тагесшпигел“ минатата година. „Нашите експерти проценуваат дека ова би можело да стане можно во рок од пет до осум години“.
Слична проценка даде данското воено разузнавање во извештај објавен во февруари. Според нив, ако војната во Украина заврши, Кремљ би можел да ослободи значајни воени капацитети и да започне нов конфликт во соседната земја во рок од шест месеци.
Кал, кој наскоро ќе ја преземе својата нова функција како амбасадор на Германија во Светата столица, рече дека Москва сака да го врати НАТО на границите од 1990-тите, да ги истисне САД од Европа и да го прошири своето влијание со сите расположиви средства. „Мора да го спречиме ова додека сè уште можеме“, предупреди тој.
Тој истакна дека соработката со Соединетите Американски Држави останува стабилна и покрај повремените тензии. „Американците го сфаќаат Член 5 многу сериозно“, рече Кал, „но тие со право инсистираат дека Европа мора да го преземе својот дел од одговорноста“.
Иако војната е сè уште ограничена на украинска територија, германската агенција за внатрешна безбедност, Федералната канцеларија за заштита на уставниот поредок (BfV), предупредува дека Русија сè повеќе го шири конфликтот на Запад преку кибернапади и шпионажа.
Според годишниот извештај на BfV, презентиран во Берлин, Москва користи таканаречени агенти со низок профил за извршување саботажи. Овие агенти се осомничени за испраќање запаливи направи во пратки, што предизвика серија пожари во логистичките центри низ Европа минатата година.
„Забележуваме дека агресијата на Русија против Украина сè повеќе ги тестира нашите одбранбени способности во областите на кибер и разузнавачки операции“, рече Синан Селим, заменик-претседател на BfV.
Европа
Словачка се заканува дека ќе ги блокира новите санкции кон Русија

Словачка би можела да го блокира новиот пакет санкции на Европската Унија кон Русија доколку Европската комисија не понуди решение за загриженоста на земјата-членка во врска со снабдувањето со енергија, изјави вчера премиерот Роберт Фицо.
„Словачката Република нема да го поддржи предложениот 18-ти пакет санкции против Руската Федерација доколку Европската комисија не понуди вистинско решение за кризата што ќе ја зафати Словачка по целосното прекинување на снабдувањето со гас, нафта и нуклеарно гориво од Русија“, напиша Фицо на Фејсбук.
Словачка, која граничи со Украина и е членка на ЕУ и НАТО, е во голема мера зависна од руската енергија. Прекинот на протокот на руски гас низ Украина влијаеше на снабдувањето, предизвикувајќи спорови со Киев и загриженост во Братислава.
Словачкиот парламент минатата недела со тесно мнозинство одобри необврзувачка резолуција со која се повикуваат владините претставници да се спротивстават на какви било идни санкции што се сметаат за штетни за економијата на земјата.
Фицо, левичарски националист, постојано јавно ги критикуваше поединечните санкции на ЕУ, тврдејќи дека тие ќе ѝ наштетат на Словачка повеќе отколку на Русија. Но, за разлика од конзервативниот премиер на Унгарија, Виктор Орбан, Фицо и други словачки владини претставници на крајот ги поддржаа сите санкции против Русија без исклучок.
Европа
Жителите на Грац запалија свеќи во центарот на градот за да оддадат почит на жртвите од нападот

Граѓаните на Грац се собраа на главниот плоштад во градот за да запалат свеќи и да им оддадат почит на жртвите од пукањето.
Фотографиите покажуваат како луѓето оддаваат почит во тишина додека градот се обидува да го разбере трагичниот напад.
Се огласи училиштето каде што се случи масакрот
БОРГ Драјершуценгасе, средното училиште во северозападен Грац каде што се случи пукањето, објави порака на Инстаграм по трагедијата. Пораката е напишана на германски јазик, официјалниот јазик на Австрија.
„Ова беше ужасен ден кој длабоко нè погоди и шокираше сите нас. Да продолжиме да се држиме заедно како училишна заедница и да се поддржуваме едни со други. Вашите наставници и вашиот директор“, се вели во пораката.
Според првичните извештаи, во училиште во Грац околу 10 часот вчера наутро се случило пукање. Најмалку 11 лица се мртви, вклучувајќи го и напаѓачот. Уште 11 лица се повредени во нападот, од кои седум се во критична состојба.