Свет
Трамп одби да се обврзе дека ќе ја предаде власта мирно ако изгуби
Американскиот претседател Доналд Трамп одби на прес-конференција во Белата куќа да се обврзе на мирно предавање на власта доколку изгуби на претседателските избори.
„Па, ќе мора да видиме што ќе се случи“, рече Трамп, пренесува Би-би-си.
Тој исто така изјави дека смета дека за резултатите од изборите ќе одлучува Врховниот суд, повторно изразувајќи сомнежи за регуларноста на гласањето по пошта.
Трамп смета дека затоа е важно да има девет судии во Врховниот суд.
„Оваа измама спроведена од демократите е измама што ќе се најде пред Врховниот суд на САД и мислам дека не е добро да се има ситуација во која може да се случи исход 4-4“, рече Трамп.
Трамп вчера на Твитер објави дека ќе го објават името на судијата кој сака да го назначи во Врховниот суд в сабота, наместо судијката Рут Бадер Гинзбург, која почина во петокот.
Кандидатот на Демократите на претседателските избори, Џо Бајден, го повика кандидатот што ќе победи на изборите да почека со номинацијата за Врховниот суд до инаугурацијата во јануари 2021 година.
Републиканците, сепак, сакаат да ја искористат можноста и со помош на мнозинството во Сенатот со 53 места, да го засилат конзервативното мнозинство во Врховниот суд на 6-3, додека пред смртта на судијата Гинзбург тоа мнозинство беше 5-4.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
САД велат дека мртвиот ирански претседател имал крвави раце
Иранскиот претседател Ебрахим Раиси, кој загина во хеликоптерска несреќа во неделата, имал „крвави раце“ поради поддршката на екстремистичките групи во регионот, соопшти денеска Белата куќа.
Портпаролот за национална безбедност на Белата куќа, Џон Кирби, изјави за новинарите дека САД ќе продолжат да го бараат Иран одговорен за, како што рече, дестабилизирачките активности во регионот.
„Тоа дефинитивно беше човек со многу крв на рацете“, изјави Кирби.
Иран побара помош од САД откако хеликоптерот на Раиси се урна во планинските области долж границата со Азербејџан, но САД на крајот не успеаја да помогнат поради логистички причини, соопшти Стејт департментот.
Портпаролот на Стејт департментот Метју Милер, исто така, им рече на новинарите дека смртта на Раиси нема да ја промени основната позиција на САД кон Иран.
Иранскиот претседател Ебрахим Раиси, кој долго време се сметаше за можен наследник на врховниот лидер, ајатолахот Али Хамнеи, загина во хеликоптерска несреќа во планинска област во близина на границата со Азербејџан, соопштија во понеделникот официјални лица и државните медиуми.
Остатоците од хеликоптерот што се урна во кој беа Раиси и министерот за надворешни работи Хосеин Амир-Абдолахиан беа пронајдени рано во понеделникот по бурна потрага.
Смртта на Раиси ја потврди потпретседателот Мохсен Мансури во изјава објавена на социјалните мрежи и на телевизија.
Свет
Нетанјаху: Со кое право не’ споредувате со Хамас додека водиме праведна војна
Израелскиот премиер Бенјамин Нетанјаху рече дека одлуката на обвинителите на Меѓународниот кривичен суд, со која се бара налог за негово апсење, е апсурдна и е насочена кон Израел.
„Со гадење ја отфрлам споредбата на хашките обвинители меѓу демократски Израел и масовните убијци на Хамас“, рече Нетанјаху.
„Со каква дрскост го споредувате Хамас кој убиваше, палеше, масакрираше, силуваше и ги киднапираше нашите браќа и сестри, со војниците на ИДФ кои водат праведна војна“.
Тој го нарече потегот на обвинителот на судот нов тип на антисемитизам.
„Граѓани на Израел, ви ветувам едно – обидот да ни ги врзат рацете нема да успее“, рече тој.
„Ветувам дека ниту еден притисок и ниту една одлука на ниту еден меѓународен форум нема да не спречи да ги удриме оние кои сакаат да не уништат“, додаде премиерот.
Израелскиот претседател Херцог, коментирајќи ја веста за налозите за апсење за воени злосторства, кои покрај лидерите на Хамас се однесуваат и на двајца високи израелски лидери, вклучително и самиот премиер Нетанјаху, рече дека одлуката на обвинителот „повеќе од срамна“ и ќе ги охрабри терористите ширум светот.
„Секој обид да се повлечат паралели меѓу овие ѕверски терористи и демократски избраната влада на Израел – која работи на исполнување на својата должност да ги брани и заштити своите граѓани во целосна согласност со принципите на меѓународното право – е срамота и не треба да биде прифатена од никого. “, рече Херцог.
Главниот обвинител на судот Карим Кан, побара од судиите на Меѓународниот кривичен суд да одобрат налози за апсење на тројца лидери на Хамас и двајца израелски лидери за воени злосторства и злосторства против човештвото извршени за време на седуммесечната војна во Газа, објави во понеделникот судот .
Одлуката ја критикуваа и САД.
Свет
Америка изрази сочувство за смртта на иранскиот претседател
Соединетите држави денеска испратија „официјални изрази на сочувство“ за смртта на иранскиот претседател Ебрахим Раиси и други официјални лица во хеликоптерска несреќа, објави Стејт департментот.
„Додека Иран избира нов претседател, ние ја потврдуваме нашата поддршка за иранскиот народ и неговата борба за човекови права и основни слободи“, изјави портпаролот на Стејт департментот Метју Милер.
Американскиот министер за одбрана Лојд Остин денеска изјави дека нема увид во причината за хеликоптерската несреќа во која загина иранскиот претседател Ебрахим Раиси, додавајќи дека не мора да го гледа поширокото влијание на тој настан врз регионалната безбедност.
„Не можам да шпекулирам што би можело да биде причината“, рече Остин пред новинарите.
Американскиот Стејт департмент додаде дека САД ќе продолжат да се спротивставуваат на поддршката на Иран за тероризмот, ширењето на опасно оружје и унапредувањето на неговата нуклеарна програма.