Потпретседателката на Бугарија, Илијана Јотова, и еврокомесарката за проширување, Марта Кос, ќе разговараат за проширувањето на ЕУ кон Западен Балкан. Тие ќе учествуваат на отворањето на форумот „Европската Унија се среќава со Балканот“.

„Ова ќе биде моја прва средба со комесарката Кос. Сакаме да чуеме од неа каква е визијата за проширувањето на ЕУ кон Западен Балкан. Мојата опсервација е дека оваа тема е целосно напуштена во последните месеци“, рече таа пред почетокот на форумот, пренесуваат бугарските медиуми.

Јотова исто така потврди дека ќе го изнесе ставот на Бугарија во врска со Република Северна Македонија.

„Според мене, оваа дебата се искривува, и овде во Бугарија и на европската сцена. Постои обид од страна на нашите колеги од РСМ да ги претстават нормалните барања на Бугарија – да се почитуваат европските критериуми – како речиси каприц од наша страна, а покрај тоа, се обидуваат да ги стават во билатерална блокада, што не е вистина“, коментира Јотова.

Претседателот на Република Српска, Милорад Додик, изјави дека се чувствува побезбедно во која било друга земја отколку во Босна и Херцеговина, но и дека чувствува задоволство затоа што знае дека е во право и дека се брани од неправда со многу волја и енергија. Тој истакна дека дури и пред пресудата на неуставниот суд се чувствувал несигурно во Босна и Херцеговина.

„Јас сум човекот што досега имаше најголем број закани во БиХ, од луѓе од БиХ и однадвор, кои, мотивирани од политичкиот ислам, ми се закануваа мене и на моето семејство“, рече Додик во гостувањето во емисијата „Телеринг“ на РТРС.

Индикативно е, според Додик, што никој не поведува спорови против овие луѓе.

Додик истакна дека ова се прави и со поранешниот министер за безбедност во Советот на министрите, Ненад Нешиќ, кој беше прогласен за виновен во истрагата и е во притвор четири месеци.

Претседателот на Република Српска, Милорад Додик, изјави дека не би препорачал никому да се обиде да го уапси бидејќи го штитат полицијата на Република Српска и добро обучените специјални сили.

„Верувам дека не може да ме уапсат. Според Уставот, ме штитат полицијата на Република Српска и добро обучените специјални сили, кои неодамна беа наградени на голем меѓународен натпревар во Дубаи“, изјави Додик за швајцарскиот неделник „Велтвохе“.

Зборуваме за специјалните сили лојални на Република Српска, кои веруваат дека прогонот на Милорад Додик како претседател претставува прогон на Република Српска.

„Затоа не би му препорачал на никого од Сараево да се обиде во тоа. Ќе се браниме“, рече Додик.

Новата влада на Србија беше избрана на седницата на Собранието на Србија.

Владата предводена од премиерот Ѓуро Мацут беше избрана со поединечно гласање на пратениците, од кои 153 гласаа „за“ и 46 „против“.

При објавувањето на резултатите од гласањето, пратениците на опозицијата не беа во собраниската сала, јавуваат срспките медиуми.

Членовите на Владата положија заклетва во присуство на претседателот на Србија, Александар Вучиќ.

По положувањето заклетва, претседателот и членовите на владата го потпишаа текстот на заклетвата и ѝ го предадоа на претседателката на Народното собрание, Ана Брнабиќ, со што заврши вонредната седница на која беше избрана новата влада.

Седницата почна во понеделникот со излагање на мандатарот Ѓуро Мацут, кој истакна дека Србија е уморна од поделби и блокади, дека мора да работи на усогласување на општеството, дека хармонијата може да се гради преку дијалог, толеранција, работа и градење на вредносен систем и рече дека негов прв приоритет ќе биде нормално нормално функционирање на училиштата и факултетите.

Опозиционерите главно го критикуваа предлогот на Владата на Ѓуро Мацут, со оценка дека ништо нема да се промени и дека оваа влада ќе продолжи да работи штетно како и претходната.

Тие искажаа посебни критики за предлогот за министер за образование да се избере Дејан Вук Станковиќ, професор на Факултетот за образование, поради заканите што ги упатувал кон студентите за време на телевизиски настапи, но и поради обвинувањата за сексуално вознемирување од страна на некои негови студентки, за што тој поднесе тужба.

Нови имиња во Владата, заедно со премиерот Мацут, се и професорот на Факултетот за образование на наставници Дејан Вук Станковиќ кој е нов министер за образование, Ненад Вујиќ е избран за министер за правда, а академик Бела Балинт е избрана за министер за наука, технолошки развој и иновации.

За нов министер за земјоделство, шумарство и водостопанство е избран Драган Гламочиќ, Сара Павков за заштита на животната средина, Александра Софронијевиќ за градежништво, транспорт и инфраструктура, додека Јагода Лазаревиќ ќе биде министер за внатрешна и надворешна трговија.

Меѓу новите имиња се министерката за државна администрација и локална самоуправа Снежана Пауновиќ, министерот за човекови и малцински права и социјален дијалог Демо Бериша, како и министерот за информации и телекомуникации Борис Братина.

Прв вицепремиер и министер за финансии повторно е Синиша Мали, а вицепремиери се министерот за внатрешни работи Ивица Дачиќ и министерката за економија Адријана Месаровиќ кои остануваат во нивните ресори.

Министерката за рударство и енергетика Дубравка Ѓедовиќ Хандановиќ, министерот за одбрана Братислав Гашиќ, министерот за надворешни работи Марко Ѓуриќ, министерот за здравство Златибор Лончар, министерот за култура Никола Селаковиќ остануваат на своите позиции од претходниот состав на Владата.

Во Владата останаа и министерот за спорт Зоран Гајиќ, министерот за грижа на селото Милан Кркобабиќ, министерот за туризам и млади Хусеин Мемиќ и министерот за јавни инвестиции Дарко Глишиќ.

Министрите кои ќе останат во владата, а нема да водат исти ресори, е поранешната министерка за семејна грижа и демографија, Милица Ѓурѓевиќ Стаменковски, која сега е избрана на функцијата министер за труд, вработување, бранители и социјала, додека нејзината сегашна функција ја зазеде Јелена Жариќ, која беше министерка на локалната администрација и локалната управа во претходната влада.