Македонија
Жителите на Шуто Оризари што аплицираа за инвертери викендов ќе ги предаваат старите печки
Жителите на општината Шуто Оризари што аплицираа за субвенции за набавка на клима-инвертери во Град Скопје овој викенд (сабота и недела) ќе имаат можност да ги предадат своите стари печки на дрва или на нафта во дворот на средното училиште „Шаип Јусуф“. Акцијата ќе трае од 10 до 16 часот и во двата дена, соопшти Град Скопје.
До привременото запирање на повикот за доделување субвенции за набавка на инвертер клима-уреди во Град Скопје се пристигнати 4.282 апликации. Само од општината Шуто Оризари пристигнати се речиси 120 апликации на овој јавен повик.
Град Скопје ги замолува граѓаните за трпение додека трае процесот на проверка на пристигнатите апликации. Во наредниот период ќе се организира предавање на старите печки на дрва или на нафта и во другите скопски општини за што граѓаните ќе бидат навреме информирани.
Минатиот викенд ваква акција за предавање на старите печки што користат нееколошки енергенси во замена за инвертер клима-уреди за затоплување се организира во општината Сарај. Во акцијата во Сарај беа предадени 90 печки.
Значајно е да се нагласи дека во наредните две години, во согласност со условите од јавниот повик, градската или државната инспекција може да врши инспекциски надзор на лицата што добиле субвенција за да се види дали навистина ги користат инвертерите или е направена измама за што ќе биде поведена постапка за враќање на финансиските средства.
Јавниот повик за доделување субвенции за инвертер клима-уреди за затоплување на домаќинствата ги опфати граѓаните што купиле инвертер од 1.1.2020 година до завршувањето на повикот на 30.11.2020 години или до денот на исцрпување на средствата. На овој повик граѓаните можеа да аплицираат онлајн.
Според условите во повикот, на граѓаните ќе им бидат целосно надоместени трошоците за набавка на инвертер клима-уред, но не повеќе од 62.000 денари во нето-износ.
Целта на јавниот повик за доделување субвенции за набавка на инвертер клима-уреди е да се придонесе за намалување на аерозагадувањето во Скопје преку намалување на бројот на оџаци што чадат заради загревање на домовите во зимскиот период.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Променливо облачно со сончеви периоди, максималната температура до 11 степени
Променливо облачно со сончеви периоди. Ќе дува слаб, а долж Повардарието умерен ветер од југоисточен правец. Минималната температура ќе биде во интервал од -4 до 3, а максималната ќе достигне од 6 до 11 степени.
Во Скопје, променливо облачно со слаб до умерен ветер од југоисточен правец. Минималната температура ќе се спушти до -1, а максималната ќе достигне до 9 степени.
Времето во наредните денови
Од среда времето ќе биде променливо облачно со повремени локални врнежи од дожд, а на повисоките планини со врнежи од снег. Ќе дува слаб до умерен, а во среда засилен ветер од југоисточен правец. Температурите ќе бидат во пораст.
Македонија
Нормализиран сообраќајот на експресниот пат Кочани-Штип
Од 23:25 часот, вчера вечер сообраќајот на експресниот пат Кочани-Штип целосно е нормализиран, извести АМСМ.
Претходно, од 19:10 часот, поради сообраќајна несреќа на експресниот пат Кочани – Штип во близина на село Тркање, сообраќајот беше во целосен прекин.
Македонија
Сали во Брисел: Билатералните прашања не смеат да го кочат европскиот пат на земјата
Во рамките на официјалната посета на Брисел, Првиот заменик-претседател и министер за европски прашања, Беким Сали, оствари средба со европратеникот Матеј Тонин (EPP) во Европскиот парламент.
За време на средбата се дискутираше за напредокот на Северна Македонија во процесот на евроинтеграции и за спроведувањето на клучните реформи, вклучувајќи го владеењето на правото, јавната администрација и правата на заедниците. Истакната е важноста билатералните прашања да не го попречуваат напредокот на земјата кон ЕУ.
Исто така, беше оценет постигнатиот напредок во Планот за раст и дигитализацијата на услугите, вклучително и проектот WiFi4WB и приклучувањето во SEPA, како и соработката со Претседателството на Кипар и европските партнери за решавање на предизвиците со транспортерите по воведувањето на Системот Entry/Exit.
Првиот заменик-претседател Сали повторно ја потврди посветеноста на Северна Македонија кон европскиот пат и подготвеноста за натамошно унапредување на секоја реформа со европските партнери.

