Македонија
Маричиќ до еврокомесарот за правда Рејндерс: Сите реформи ќе бидат реализирани во блиска координација со ЕУ
Министерот за правда, Бојан Маричиќ, денеска преку видеоконференциска врска ја оствари првата официјална средба со еврокомесарот за правда, Дидие Рејндерс, на која дискутираа за евроинтеграциите на Северна Македонија и реформите во областа на владеењето на правото и правосудството.
Министерот Маричиќ истакна дека покрај сите премрежиња, очекува првата меѓувладина конференција за официјален почеток на преговорите со ЕУ да се одржи до крајот на 2020 година, а дека тој процес значително ќе влијае на развојот на Северна Македонија и темпото на реформите во сите области. Според министерот, позитивниот извештај на Европската комисија претставува силен аргумент и доволна причина зашто земјата треба да ги почне официјално преговорите до крајот на годината под германското претседателство.
На состанокот Маричиќ ги реафирмира својата подготвеност и заложбата сите реформските процеси од Поглавјето 23: правосудство и фундаментални права да се прават во блиска координација и партнерство со ЕУ и под лупата на Брисел.
Министерот информира дека е почнат инклузивен процес на средби и интензивна комуникација со сите засегнати фактори од правосудството, како Судскиот совет, Советот на јавните обвинители, судовите и обвинителствата, како и релевантните комори, сè со цел координација и усогласување пред предвидените реформи во правосудството.
Маричиќ истакна дека во претстојниот период ќе се фокусира на реализирање на мандатната мисија и ќе иницира политики за зголемување на професионалните стандарди, одговорноста и транспарентност на судството и Обвинителството.
Воедно, министерот информира дека тој е силен поддржувач за зајакнување на финансиската независност и капацитетите на судството и Обвинителството и дека очекува значително зголемување на нивниот буџет, со што ќе се создадат подобри услови за поефикасна и поефективна борба против организираниот криминал и корупцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филков: Се потпираме на електронските верзии, пред да замине од функцијата Лога си ги зел документите со препораки од оценската мисија на ЕУ
Пред да замине од функцијата, ексминистерот за правда Кренар Лога, од кабинетот во Министерството со себе го земал документот со препораки на Судскиот совет изработен од Оценската мисија на Европската комисија, рече актуелниот министер за правда Игор Филков, додавајќи дека во тек е постапка за случајот и оти ќе се бара одговорност. Вели дека и покрај тоа што документот е класифициран, тој бил земен од неговиот претходник, а Министерството за правда повеќе не располага со него.
„Голем предизвик во реализација на оваа активност претставува фактот дека Министерството за правда не располага со толку споменуваниот документ со препораките од Оценската мисија на Европската комисија по однос на Судскиот совет. Иако документот е класифицирана информација, истиот бил земен од мојот претходник, заради што Министерството не располага со истиот“, изјави Филков.
Филков додаде дека како резултат на тоа, во Правда биле принудени да се ослонат на електронски верзии на дел од документот што ги содржи исклучиво препораките, без соодветните образложенија за истите и официјалниот допис на Европската комисија. Посочи и дека функцијата ја презел без примопредавање и со испразнет кабинет од потребната документација.
Македонија
Двајца во притвор, еден во бегство – поднесена кривична пријава против три лица за пукањето во Чаир
Во врска со оружениот инцидент кој се случи на 14 октомври на булеварот „Христијан Тодоровски Карпош“ во Чаир, по поднесена кривична пријава од Министерството за внатрешни работи против три лица, Основното јавно обвинителство Скопје за нив поведе постапка за кривично дело – Учество во тепачка од член 132 став 1 од Кривичниот законик.
Од нив, за двајца надлежниот јавен обвинител поднесе предлог за определување мерка притвор до Основниот кривичен суд Скопје, додека еден осомничен во моментов е во бегство и е недостапен на органите на прогонот.
За уште едно лице, четврти учесник во инцидентот, за кое постојат првични сознанија дека со акт на оружено насилство предизвикал тешка телесна повреда – прострелна рана кај оштетениот, во тек е постапка за прибирање докази. Тој осомничен во моментот е на издржување затворска казна за друго дело во КПУ „Идризово“.
Македонија
20-годишен македонски државјанин предводел терористичка група во Австрија, регрутирал и нови членови
Во австрискиот град Сент Полтен е разбиена група осомничена за поврзаност со терористичката организација Исламска држава (ИД), предводена од 20-годишен македонски државјанин.
Како што јавуваат австриските медиуми, македонскиот државјанин издржува петгодишна затворска казна, а им бил познат и на властите по неговите активности и поддршката за Исламската држава преку графити што ги цртал во близина на главната железничка станица во Сент Плотен во 2023 година.
Македонскиот државјанин не само што активно ја поддржувал терористичката група туку и регрутирал нови членови.
Меѓу приведените е и 15-годишен Австриец со мигрантско потекло, кој бил регрутиран од македонскиот државјанин.
Австриските власти најавија дека продолжува истрагата.