Свет
Русија ја поднесе својата вакцина во СЗО за забрзана регистрација
Русија поднесе барање до Светската здравствена организација (СЗО) за забрзана за регистрација и претквалификација на својата прва вакцина против новиот коронавирус „спутник V“, објавија руските власти.
На прашањето на АФП од СЗО велат дека поднесоците за претходна селекција или регистрација во итни постапки се доверливи.
Русија е една од првите земји во светот што побара од СЗО да ја претквалификува својата вакцина против новиот коронавирус, соопштија руските власти.
„Во контекст на пандемијата, забрзаното регистрирање на вакцината според процедурата (СЗО) ќе ја направи руската вакцина достапна за сите побргу отколку со конвенционалните процедури“, се додава во соопштението. СЗО истакнува дека ако се смета оти производот доставен на процена е во согласност со критериумите за вклучување во списокот, СЗО ќе го објави.
„Успешната претходна селекција ќе овозможи вакцината ‘спутник V’ да се вклучи во списокот на лекови што земјите ги користат за набавка наголемо“, соопшти СЗО. Но, досега, забележува СЗО, „некои вакцини против Ковид-19 не се преквалификувани ниту, пак, е објавен список за итни случаи“.
Русија на почетокот на август рече дека е прва што развила и регистрирала вакцина против болеста Ковид-19. Вакцината е изработена од московскиот истражувачки центар „Гамалеја“ при Министерството за одбрана. Во Русија регистрацијата кај властите претходи на последната фаза на клинички испитувања.
Вакцината, наречена „спутник V“ според првиот вештачки сателит во историјата изграден од Советскиот Сојуз, беше примена со скептицизам, особено затоа што во времето на нејзиното постоење сè уште не ја поминала последната фаза на клинички испитувања. Сепак, голем дел од руската политичка елита изјави дека биле вакцинирани, а Владимир Путин го наведе примерот на една од неговите ќерки. Владата се надева дека ќе ја дистрибуира вакцината масовно во земјата во следните месеци.
Претходно овој месец, рускиот претседател Владимир Путин објави дека Русија ја регистрирала својата втора вакцина против коронавирусот. Во последните неколку недели во Русија се забележува големо ширење на епидемијата. Земјата е рангирана на четвртото место во светот според бројот на случаи со вкупно 1.547.774 заболени лица и 26.589 смртни случаи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Белата куќа: Русија не успеа да ги поткопа изборите во Молдавија, мора да бидеме внимателни
„Русија не успеа“ да ги поткопа изборите во Молдавија, иако интензивно работеше во таа насока, рече портпаролот на Белата куќа, апелирајќи на претпазливост. „Демократијата е силна во Молдавија, како и волјата на молдавскиот народ да продолжи со европската интеграција“, изјави Џон Кирби, портпарол на Советот за национална безбедност, по тесната победа на референдумот за членство во ЕУ.
Гласот „за“ победи на референдумот за членство на поранешната советска република во Европската унија со 50,46 отсто. Во исто време се одржаа и претседателските избори, чиј втор круг ќе се одржи на 3 ноември.
„Знаеме дека има втор круг и очекуваме Русите да се обидат да влијаат“ и на овие избори, рече Кирби.
Актуелната претседателка Маја Санду, која освои 42,45 отсто од гласовите и поранешниот главен обвинител Александар Стојаногло, кој освои 25,98 отсто, одат во вториот круг од претседателските избори во таа земја со 2,6 милиони жители.
Референдумот и претседателските избори се гледаат како тест за одлуката на длабоко поделената земја да одржува блиски врски со Русија или да започне потенцијално долг процес на пристапување во Европската унија. „Никој не го игра победничкиот танц“, рече Кирби, укажувајќи дека САД продолжуваат да работат со Молдавија за да го заштитат интегритетот на вториот круг од изборите.
Санду рече дека Молдавците ја добиле „првата битка во тешката борба“ за нивната иднина.
„Народот на Молдавија рече: Нашата иднина во ЕУ сега ќе биде закотвена во уставот. Се боревме фер во нефер борба – и победивме“, напиша Санду на X.
Регион
Вучиќ: Договорено снабдување со гас од Русија по поволна цена
Српскиот претседател Александар Вучиќ изјави вечерва дека тој и рускиот претседател Владимир Путин се договориле за купување гас по поволни цени и дека ќе разговараат за долгорочен аранжман.
Во интервју за РТС, тој рече дека договорил шест милиони кубни метри гас дневно според формулата за нафта, која се пресметува врз основа на дневната цена на таа енергија на Холандската берза (TTF).
„Вчера гасот на ТТФ чинеше 440 долари, а за Србија 323 долари, што е многу поповолно“, рече Вучиќ.
Тој додаде дека е договорена и испорака на два милиони кубни метри гас за руските компании во Србија, како што се Нафтената индустрија на Србија и Петрохемија.
Вучиќ изјави и дека се договорени дополнителни три милиони кубни метри гас, чија цена ќе се пресметува 70 отсто според цената на ТТФ, а 30 отсто според „нафтената формула“.
Тој потврди дека ќе разговараат и за долгорочното снабдување со руски гас за Србија со одредени „компромиси за работите од минатото“.
„Ние имаме вкупно 645 милиони кубни метри гас во резерви, така што луѓето не треба да се грижат. Цените што успеавме да ги договориме со руската страна се многу добри“, изјави Вучиќ.
Истакна дека е многу благодарен на руската страна за поддршката и помошта што им ја пружаат.
Свет
Евакуирана болница во Бејрут, Израел тврди дека под неа има бункер на Хезболах
Либанската болница Сахел во јужните предградија на Бејрут беше евакуирана откако Израел објави дека под неа има бункер на Хезболах, изјави денеска директорот на болницата Фади Аламех за Ројтерс.
Тој ги негираше овие наводи и ја покани либанската армија да ја посети локацијата.
Портпаролот на израелските одбранбени сили (ИДФ), контраадмирал Даниел Хагари, претходно денеска објави дека Израел лоцирал бункер на Хезболах под болницата во Бејрут каде, како што наведе, либанската милитантна група складира повеќе од 500 милиони долари во злато и готовина.
Тој ги соопшти деталите по нападите во текот на ноќта во кои Израел ги гаѓаше финансиските институции на Хезболах, пренесува Танјуг.
На прес-конференцијата, Хагари покажа еден од бункерите на убиениот лидер на Хезболах Хасан Насрала, лоциран под болницата Сахел во Бејрут.
Израел започна „ограничена и насочена“ копнена операција против Хезболах во јужен Либан.
Израелските сили ја преминаа границата на 1 октомври, за прв пат по 34-дневната војна меѓу Израел и Хезболах во 2006 година, пренесуваат светските агенции.