Свет
Штабот на Бајден откако Трамп прогласи победа: Неговите изјави се скандалозни и без преседан

Откако американскиот претседател прогласи победа во обраќањето до нацијата од Белата куќа и објави дека ќе оди на Врховен суд за наводна изборна измама, се огласи и седиштето на неговиот противкандидат Џо Бајден.
„Вечерашната изјава на претседателот за обид да се запре пребројувањето на гласовите е скандалозна, неточна и без преседан“, рече менаџерот на кампањата на Бајден, Џен О’Мали Дилон.
„Скандалозно е затоа што е обид да им се одземат демократските права на американските граѓани. Тоа е без преседан, бидејќи никогаш во нашата историја претседател не се обидел да им одземе гласови на Американците. Откако ги охрабри републиканските напори во неколку држави за да се спречи законското пребројување на гласови пред изборниот ден, сега претседателот вели дека овие гласови не можат да се бројат дури и по денот на изборите. Неточно е затоа што нема да се случи. Броењето нема да биде запрено. Напротив, ќе продолжи сè додека секој глас не биде пребројан. Бидејќи тоа е она што го бараат нашите закони – закони што го штитат уставното право на секој Американец да гласа“, рече О’Мали Дилон.
„Го повторуваме она што потпретседателот го рече вечерва: Доналд Трамп нема да одлучи за исходот на овие избори. Џо Бајден нема да одлучи за исходот на овие избори. Американскиот народ ќе одлучи за исходот на овие избори. Демократскиот процес мора да продолжи и ќе продолжи до конечниот резултат”, додаде таа.
Американскиот претседател во неговото обраќање кажа дека планира да се обрати до Врховниот суд – велејќи дека сака гласањето да се прекине. Тој, без да презентира докази, рече дека изборите биле мамење на американската јавност.
„Ова е голема измама. Одиме до Врховниот суд, не сакаме да најдат некои гласови во 4 часот наутро и да ги додадат на списокот. Ова е тажен момент. Но, ќе го добиеме ова. Што се однесува до мене, ние веќе победивме“, рече Трамп во говорот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.