Бугарскиот европратеник Ангел Џамбазки остро го нападна промоторот на Македонски концепт Петар Богојески, притоа сеејќи омраза помеѓу граѓаните на Македонија и Бугарија. Сето ова се должи на објавите на Богојески во кои повикува на разбирање од соседна Бугарија и изнаоѓање  разумно, заедничко и европско решение. Според Богојески, ова е класичен напад кон него, по нарачка на министерот за одбрана на Република Бугарија, Красимир Каракачанов, соопшти Македонски концепт.

Според нив, „Џамбаски во својата објава вели и дека бугарското ВМРО нема да го поддржи почетокот на преговорите за членство во ЕУ на Република Северна Македонија, освен ако властите во Скопје не го спроведат Договорот за соседство веднаш и безусловно, и тоа не е предмет на преговори или какви било компромиси“.

„На овие напади Богојески одговори преку својот официјален фејсбук-профил, каде му порача на Каракачанов да не се плаши од ТВ-дуел, а доколку има потреба може да ги повика и европратеникот Џамбаски и министерката за надворешни работи, Екатерина Захариева.

„Господин Красимир Каракачанов, нема потреба да се плашите од ТВ-дуелот! Целта не е да шириме омраза, туку да ги разрешиме проблемите на транспарентен начин! Во недостиг на таа храброст, немавте потреба да го испраќате господин Џамбаски да одговара”, пишува Богојески, додавајќи дека омразата и заканите од соседна Бугарија не запираат. Јас го разбирам господинот Ангел Џамбазки дека не може да живее без омраза, тој таков јазик користи кон различни етноси во самата Бугарија, но европската идеја не повикува на ничии корени, туку на заедничка иднина. Жално е што Бугарија има вакви европратеници, кои се чемер и јад за цела Европа. Ја разбирам желбата на некои луѓе да им служат на туѓи интереси во Бугарија и Македонија, но се надевам дека иднината ѝ припаѓа на сериозни политичари кои ќе ги надминат старите страсти и јунаци”, додава тој.