Армискиот полигон „Криволак“ доби нов пат во должина од 33 километри со кој се отвора нов пристап од стрелиштето Пенуш кај Штип, а истовремено се обнови и патната инфраструктура во самиот полигон во должина од 15 километри.

Министерката за одбрана, Радмила Шекеринска, која денеска беше во посета на „Криволак“, каде што работат инженерците на Армијата, информира за сработеното и за идните планови за овој капацитет за кој рече дека е дополнителен ресурс во колективната одбрана и безбедност на алијансата и наша лична карта во НАТО.

„Овие инвестиции значеа огромен напор, огромен труд и огромна волја, пред сè, од нашиот Генералштаб и од нашите инженерци што во изминатиот период секој работен ден го поминуваа на армискиот полигон ’Криволак’. Ја постигнавме нашата прва стратешка цел, а тоа е полигонот ’Криволак’ да го отвориме кон север и да го поврземе со стрелиштето Пенуш кај Штип за да можеме од две страни да пристапуваме кон полигонот и за да го ослободиме притисокот што досега постоеше исклучиво преку Неготино“, рече министерката.

Шекеринска им честита на инженерците за квалитетно извршената работа за која рече дека доколку не се работела со сопствени ресурси, туку комерцијално, би чинела 10 пати повеќе, односно наместо околу еден милион евра за целосно завршен проект, тој според процените би чинел 10 милиони евра. Додаде дека средствата што се потрошени се единствено за дневници, за храната што се обезбедува и за горивото, што уште еднаш ја потврдува паметната одлука беше донесена за инвестирање во инженериски машини, која овозможи инженерците да може самостојно да го реализираат овој проект.

Во однос на значењето на инфраструктурните зафати на полигонот за алијансата, министерката посочи дека со оваа инвестиција, со оваа обновена и нова инфраструктура, в година кога ќе се организира уште една голема вежба во соработка со Армијата на САД и неколку други армии во соседството, ќе имаме шанса да им покажеме колку сме го подобриле овој полигон за една година и тоа ќе го зголеми интересот за заедничка работа на ’Криволак’“.

Шекеринска најави финансиска поддршка од американската армија за дел од проектот и дека во првата половина од следната година очекуваме американски инженерци да им се приклучат на нашите инженерци во активностите за инфраструктурен развој на полигонот.