Директорот на Агенцијата за аудио и аудиовизуелните медиумски услуги (АВМУ), Зоран Трајчевски, учествуваше на регионална онлајн-конференција за справување со предизвиците од дезинформациите во Западен Балкан, што се одржа на 11 и 12 ноември 2020 година.

На панел-дискусијата посветена на справувањето со дезинформациите од институционална перспектива, Трајчевски посочил дека постои наплив на дезинформации чиј интензитет се зголемува во зависност од актуелните случувања.

„Во трката за ексклузивност и поголема публика, повеќето држави, меѓу кои и нашата, се соочија со појавата на дезинформации или недоволно проверени информации, кои предизвикаа дополнителен проблем во справување и заштита од Ковид-19“, истакнал тој.

Директорот посочил дека во неколку наврати Агенцијата јавно реагирала и повикувала на почитување на професионалните новинарски стандарди и на неопходноста од точно и навремено информирање на граѓаните.

„Сите ние, без оглед дали станува збор за регулаторни тела, граѓански асоцијации, новинарски здруженија или државни институции, сме соочени со многубројни предизвици, но, сепак, не треба да заборавиме дека имаме заедничка цел – а тоа се професионални медиуми и медиумски писмени граѓани“, истакнал Трајчевски на панел-дискусијата.

Конференцијата ја организира Советот за регионална соработка, во соработка со „ОБЦ транс-Европа“, Европската служба за надворешно дејствување на ЕУ и Европскиот центар за борба против хибридни закани.