Македонија
Царовска: Успешно заврши оценувањето за првото тромесечје

Министерката за образование и наука, Мила Царовска, на онлајн состанок со директорите и наставниците од основни и средни училишта разговараше за текот на наставата, при што беше заклучено дека воспитно-образовниот процес од почетокот на учебната 2020/2021 година се одвива успешно.
Наставниците информираа дека оценувањето на учениците за првото тромесечје заврши без потешкотии. Учениците и родителите имаат увид во оцените преку електронскиот дневник.
„Беше предизвик да ги оцените учениците во овие поразлични услови на настава. Но, убедена сум дека како наставници го најдовте најдобриот начин и методи да ги оцените знаењата и да ги формирате оценките за првото тромесечје, во оваа скратена учебна година“, рече Царовска.
Во средните училишта во тек се подготовките за матурата, што треба да се одржи во законскиот рок.
„Образованието продолжува и нема да дозволиме пандемијата да се одрази на развојот и напредокот на учениците. Следните шест месеци се доволен период да се подготвиме за успешно спроведување на државната матура, согласно сите здравствени протоколи. Испитните програми ќе бидат усогласени со скратените наставни програми. Вие како наставници, ние како Министерство и сите кои учествуваат во овој процес на заокружување на средното образование ќе им помогнеме на учениците успешно да ги совладаат и овие заврши испити и да постигнат високи резултати. Полагањето на матурата е во најдобар интерес на учениците и е основа за натамошно надградување и продолжување на образованието на факултетите“, нагласи министерката Царовска.
Во училиштата каде што се одвива настава со физичко присуство, се почитуваат мерките и протоколите за заштита, што се потврдува и со податоците дека под 1 процент на наставници и под 0,06 проценти ученици се активни случаи и нема пренос на болеста во училиштата. Кај учењето од далечина над 90 проценти од учениците следат онлајн настава, а континуирано се намалува бројот на ученици кои немаат технички услови, како резултат на заедничкиот ангажман на МОН, локалните самоуправи, училиштата и компаниите со општествена одговорност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Храбрите и неуморни пожарникари изгаснаа 21 пожар, активен е само уште еден

Центарот за управување со кризи информира дека до 9 часот наутро, регистрирани се вкупно 22 пожари на отворен простор. Од нив, само еден е сè уште активен, а 21 се изгаснати. Додека температурите се многу високи и сите бараме климатизирани простории, овие луѓе се на терен и се борат со екстремно високи температури од жешкото сонце и од огновите.
Единствениот активен пожар е во срцето на Националниот парк „Јасен“ во општина Македонски Брод, каде што гори мешана шума. Таму е мобилизирана значителна противпожарна сила, бидејќи станува збор за заштитено подрачје со исклучителна природна вредност и разновиден животински свет.
Останатите пожари, иако сега изгаснати, вчера предизвикаа сериозни интервенции низ целата држава. Во Тетовскиот регион, пламенот зафати ниска вегетација кај селата Озормиште и Тежето, како и во Слатино и Џепчиште, а во близина на железничката станица во градот и во Шемшово гореше запалено ѓубре. И Гостивар не остана поштеден – во близина на фирма во Мизраше гореше ниска вегетација, а во селото Симница повторно беше запалено ѓубре.
На југот од државата, во Струмичкото село Смолари, како и во Валандово, пламенот уништуваше ниска вегетација и плантажи. Во битолскиот регион, во близина на РЕК Битола, пожарот зафати тревни површини, а во селото Братиндол изгореа ниски растенија. Исто така, во прилепската касарна и во селата Дебреште и Лопатица гореше ниска вегетација, која поради сувото време брзо се ширеше.
Во централниот дел на земјата, Велес се бореше со пожар кај селото Отовица, а Куманово со пламен до патарината на автопатот Куманово – Скопје. Во источниот дел, селото Крупиште во Карбинци беше зафатено од пожар, како и селото Црвивци во Кичево. Сарај гореше кај селото Радуша, додека во Ранковце беше зафатена тревната површина покрај патот.
Иако сите овие пожари сега се изгаснати, надлежните предупредуваат дека високите температури и сувото време создаваат идеални услови за нивно повторно појавување. Апелираат граѓаните да бидат исклучително внимателни и да пријават секое забележано палење трева или отпад, со цел да се спречат нови големи катастрофи.
Македонија
Денес се навршуваат 24 години од загинувањето на бранителите кои нагазнаа на мина кај Љуботенски бачила

На повеќе локации во Скопје денеска ќе бидат одбележани 24 години од загинувањето на осуммината бранители, припадници на резервниот состав на Армијата кои загинаа во 2001 година кај месноста Љуботенски бачила.
Делегација од Министерството за одбрана и Генералштабот на Армијата предводена од директорот на Генералштабот, бригаден генерал Орце Јордев ќе положи венци со свежо цвеќе пред спомен обележјето на паднатиот бранител Томислав Настевски во Општина Ѓорче Петров, споменикот на паднатите бранители во село Волково, споменик на загинати бранители во село Љубанци и спомен-плоча во касарната „Илинден“.
Делегација на Собранието во состав на пратеничките Емилија Ангелова и Каролина Насковска, ќе положи свежо цвеќе пред спомен-обележјето поставено во чест на загинатите бранители во село Љубанци.
Општина Ѓорче Петров организира оддавање почит пред спомен-чешмата на Томислав Настески – Бумбар, во урбана заедница Мирче Ацев (ул. „Ѓорче Петров“) додека централна комеморативна манифестација ќе биде пред споменикот на загинатите бранители во Волково.
На 10 август 2001 година со воено товарно возило на патот кон месноста Љуботенски Бачила при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски кој во 2000 година загина во Арачиново при вооружен напад врз полициска патрола.
Македонија
Летните одмори направија редици на Табановце

Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, на ГП Табановце времето на чекање за влез во државата е околу еден час, на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.