Македонија
Осуммина осомничени за кражбата на два тона марихуана од Јосифово во Арачиново
Осум лица се осомничени за двата тона марихуана што беше украдена од валандовско Јосифово, соопшти министерот за внатрешни работи, Оливер Спасовски. За сите се бара притвор.
Спасовски не даде објаснување како осомничените успеале да ја транспортираат марихуаната 137 километри, без да бидат фатени, и таа да стигне до Арачиново.
Тој објасни дека на тоа прашање ќе има одговор кога ќе заврши истрагата, која е во тек.
„За сите лица што се во истрагата, ќе се бара притвор. Ова е една акциска контрола, која е сузбивање на недозволена трговија и шверц со дрога. Во моментот осум лица се во пријавата. Тие се таму каде што треба да бидат. И натаму има активности поврзани со акцијата. Во тек е истрагата, не можеме да ја водиме преку медиумите. Кога ќе ги имаме сите информации, ќе споделиме. Целта ни е да се обезбедат доказите и сите одговорни да сносат одговорност“, посочи Спасовски.
За фирмите да добијат лиценци за одгледување канабис, треба да исполнуваат и услови за техничко и физичко обезбедување на складовите. Спасовски посочи дека МВР нема овластувања да проверува дали тие биле почитувани.
„МВР нема овластувања во овој дел, лиценците ги доделува Министерството за здравство и има точни услови за да се добие лиценца за производство на марихуана. Се знае какви сефови треба да има, техничко, физичко обезбедување. Ние вршиме контрола на работата на агенциите за обезбедување. Има многу детали што се во делот на криминалистичката обработка не само во овој случај, туку и во сите други. Истрагата ќе го покаже тоа и ќе ги имаме сите информации“, рече Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.