Македонија
(Видео) Николовски: Владата отвори фронт во битката против корупцијата

По повод одбележувањето на Меѓународниот ден за борба против корупција, вицепремиерот задолжен за борба против корупцијата и криминалот, одржлив развој и човечки ресурси, Љупчо Николовски, учествуваше на неколку конференции кои беа одржани преку видеоконференциска врска.
На конференцијата организирана од страна на Државната комисија за спречување корупција, вицепремиерот Николовски истакна дека во владината четиригодишна програма се поставени јасни столбови во борбата против корупција, преку воспоставување соодветни механизми и преку отворена и редовна меѓуинституционална комуникација и соработка.
„Оваа битка ќе трае многу. Ни треба систем кој чесните и заслужните ќе ги наградува, а нема да ги казнува. Во изминатите три месеци воспоставивме пракса на редовна меѓуинституционална координација и размена на информации. Тука мислам и на олеснување на комуникацијата помеѓу надлежните владини институции и независните кои имат важна улога во брзото процесирање на предметите. Затоа што, недозволиво е на ДКСК да ѝ бидат во просек потребни од 2 до 3 месеци за да реши предмет, како што покажуваат истражувања на невладиниот сектор во Платформата на граѓански организации за борба против корупцијата. Корупцијата е комплексен феномен кој бара експедитивна реакција. Оттаму, како вицепремиер стојам на располагање да помогнам, онаму каде што е можно, односно каде тоа се должи на потешкотии во комуникација. Исто така, очекувам дека целокупната борба против корупцијата значително ќе се подобри веднаш штом ДКСК ги развие електронската изјава за имотна состојба и интереси за функционерите и софтверот за непосреден електронски пристап до базите на податоци на 17 институции“, изјави вицепремиерот Николовски.
При тоа Николовски посочи дека во насока на спречување на корупција, се донесе нов поприменлив Кодекс за етичко однесување на членовите на Владата и функционерите именувани од Владата.
На форумот организиран од страна од Советот на Европа, на тема „Контролирање на ризиците од корупција во кризни состојби“, вицепремиерот Николовски посочи дека за Република Северна Македонија како како земја кандидат за членство во ЕУ, од особена важност е поддршката и соработката со Советот на Европа. При тоа потенцираше дека во соработка со програмската канцеларија на Советот на Европа во Скопје, во тек се подготовките за изработка на физибилити студија за потребата од донесување Закон за потекло на имот и капитал на лица кои извршуваат јавни финкции.
На панел-дискусијата организирана од Амбасадата на САД, вицепремиерот Николовски истакна дека еден од приоритетите на Владата е јакнење на институциите, координираност и меѓусебно поврзување на надлежните ининституции кои треба да покажат резултат во борбата против корупцијата. Воедно, Николовски посочи дека транспарентноста и отчетноста се една од клучните алки во спречувањето на корупцијата, на што Владата посветува сериозно внимание.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се навршуваат 24 години од загинувањето на бранителите кои нагазнаа на мина кај Љуботенски бачила

На повеќе локации во Скопје денеска ќе бидат одбележани 24 години од загинувањето на осуммината бранители, припадници на резервниот состав на Армијата кои загинаа во 2001 година кај месноста Љуботенски бачила.
Делегација од Министерството за одбрана и Генералштабот на Армијата предводена од директорот на Генералштабот, бригаден генерал Орце Јордев ќе положи венци со свежо цвеќе пред спомен обележјето на паднатиот бранител Томислав Настевски во Општина Ѓорче Петров, споменикот на паднатите бранители во село Волково, споменик на загинати бранители во село Љубанци и спомен-плоча во касарната „Илинден“.
Делегација на Собранието во состав на пратеничките Емилија Ангелова и Каролина Насковска, ќе положи свежо цвеќе пред спомен-обележјето поставено во чест на загинатите бранители во село Љубанци.
Општина Ѓорче Петров организира оддавање почит пред спомен-чешмата на Томислав Настески – Бумбар, во урбана заедница Мирче Ацев (ул. „Ѓорче Петров“) додека централна комеморативна манифестација ќе биде пред споменикот на загинатите бранители во Волково.
На 10 август 2001 година со воено товарно возило на патот кон месноста Љуботенски Бачила при активирање на мина животот го загубија осум припадници на резервниот состав на Армијата: Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски. На овој ден се оддава почит и на Ацо Ангеловски кој во 2000 година загина во Арачиново при вооружен напад врз полициска патрола.
Македонија
Летните одмори направија редици на Табановце

Сообраќајот на државните патишта се одвива непречено, по суви коловози. Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, на ГП Табановце времето на чекање за влез во државата е околу еден час, на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Внимавајте на сонце, денес многу топло со температури до 39 степени

Времето денеска ќе биде сончево и многу топло. Ќе дува слаб до умерен ветер од источен и североисточен правец.
Минималната температура ќе биде во интервал од 12 до 21, а максималната ќе достигне од 32 до 39 степени.
Во Скопје, сончево и многу топло со слаб до умерен променлив ветер.
Минималната температура ќе се спушти до 19, а максималната ќе достигне до 39 степени.
Под влијание на многу топла воздушна маса од југ во текот на наредната седмица времето ќе биде претежно сончево и многу топло.
Дневната температура насекаде ќе биде над 30 степени, а наместа ќе достигне и 40 степени.