Хамас ја изрази својата подготвеност да го предаде Појасот Газа на палестинските власти, изјавија извори за „Скај Њуз Арабија“ во извештајот објавен вчера вечерта, како што пренесе „Ерусалим Пост“.

Според овие извори, Хамас изјавил дека нивните државни службеници би можеле „да се реинтегрираат во новата администрација или ќе се пензионираат, со гаранција дека ќе им бидат исплатени платите“.

Понатаму, извори тврдат дека Хамас ја донел оваа одлука „по значителен египетски притисок врз делегацијата на Хамас што го посети Каиро“.

Израел денеска ќе испрати делегација на работна група во Каиро за да преговара за договор за заложници и прекин на огнот, соопшти кабинетот на премиерот. Делегацијата ќе ја предводи координаторот за заложници и исчезнати лица, бригадниот генерал Гал Хирш, заедно со функционер од израелската безбедносна агенција Шин Бет, познат по кодното име „М.“.

Тимот ќе разговара за спроведувањето на првата фаза од договорот за заложници, во која се очекува ослободување на шесте преостанати живи заложници.

Украина може да се претвори во „верзија на европски Авганистан“ доколку американскиот претседател Доналд Трамп не може да обезбеди мировен договор со Русија, предупреди унгарскиот премиер Виктор Орбан, пренесува „Anadolu Agency“.

„Ако претседателот Трамп не може да најде решение, војната во Украина лесно може да стане Авганистан за ЕУ“, рече Орбан, говорејќи на медиумски настан викендот во Дубаи со поранешниот водител на „Фокс њуз“, Такер Карлсон.

Тој предупреди дека „ние сме во сериозна опасност бидејќи бескрајните војни и конфликти одземаат човечки животи, пари и сè, уништувајќи ја рамката на нормалниот живот во Европската унија“.

„Тешкотијата е, и ова не е мој предизвик, но предизвик е за претседателот Трамп, како да ги убеди Русите да ја прекинат војната кога Русите во основа победуваат. Ова е големо прашање“, додаде тој.

Коментарите на Орбан уследија по новите напори на Трамп за унапредување на мировните преговори.

Последниот разговор на Трамп со рускиот претседател Владимир Путин предизвика загриженост во Киев и низ Европа дека Вашингтон и Москва би можеле да ја обликуваат иднината на Украина без нејзино учество.

Грчкиот премиер Киријакос Мицотакис вчера во врска со земјотресите што ги погодија грчките острови Санторини и Кикладите изјави дека сеизмолозите предупредуваат дека се работи за феномен без преседан, со флуктуации во динамиката, поради што е невозможно со сигурност да се процени развојот на ситуацијата.

Мицотакис истакна дека владата е свесна за финансиската штета што оваа ситуација им ја нанесува на вработените и на работењето на компаниите на овие острови, пишува „Катимерини“.

Според него, сите компании и приватни работодавачи во општините Тира и Аморгос, каде што исто така е прогласена вонредна состојба, можат да ги прекинат договорите за вработување за периодот на оваа вонредна состојба од 1 февруари до 3 март.

Вработените на кои им се суспендирани договорите ќе добијат отштета од 534 евра.

„Ги преземаме сите превентивни мерки по препораките добиени од службите за проценка на сеизмолошки ризик“, нагласи премиерот.

Тој додаде дека поради тековната сеизмичка активност, училиштата во Тира, Иос, Анафи и Аморгос ќе останат затворени до петок, 21 февруари.

Мицотакис предупреди дека жителите на островот мора да ги следат упатствата за да избегнуваат собири во затворени простории и да не се приближуваат до напуштени и нестабилни згради.

Санторини и другите грчки острови во регионот се погодени од „невидена“ сеизмичка активност, а околу три четвртини од 15.000 жители на островот се евакуирани.