Црна хроника
Го ограбиле магацинот што го обезбедувале

Скопската полиција до Јавното обвинителство поднесе кривична пријава за тројца скопјани, од кои двајца припадници на обезбедување на магацин, коишто се осомничени за кражба на повеќе од 500 диспанзери за вода, во вкупна вредност од околу два милиона денари.
Истражен судија на тројцата осомничени на возраст од 27 и 28 години, поради постоење на основано сомнение дека сториле кривично дело „кражба“, им одредил мерка притвор во траење од 30 дена.
Тројцата се товарат дека од 1-ви јуни годинава неколкупати провалиле во магацин на компанијата АД „Пелистерка“ на булеварот „Босна и Херцеговина“ во скопската населба Бутел, и притоа украле вкупно 522 апарати, различни модели од диспанзерите за вода од марката „ЛАМО“, чија вредност е проценета на два милиона денари.
Двајцата од пријавените, имено, работеле како обезбедување на магацинот преку скопска агеција за обезбедување имот и лица, а во периодот кога двајцата работеле во ноќните смени, од магацинот во повеќе наврати краделе апарати диспанзери за вода кои ги изнесувале од магацинот и ги оставале во близина на капијата. Потоа тројцата со помош на возила ги товарале и ги носеле надвор од кругот на магацинот по што ги делеле меѓу себе, а потоа ги давале или ги продавале на други лица.
На 11-ти јули од АД „Пелистерка“ била поднесена пријава за кражба при што се преземени мерки и пронајдени се и одземени десет од украдените апарати диспанзери, и тоа кај различни лица, во роднински или пријателски односи со пријавените.
Како што информираат од МВР, тројцата осомничени го признаале извршувањето на кривичните дела./крај/со.мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Жена од Илинден пријавила дека такси возач ја вознемирувал и ја допирал по телото

Вчера во Полициското одделение Петровец, 37-годишна жена од населено место во општина Илинден пријавила дека на 15 септември, 30 минути по полноќ, такси возач наместо да ја однесе до нејзиниот дом, почнал да ја допира по телото.
Откако му се спротивставила, возачот престанал и ја однел до нејзиниот дом.
Жената го пријавила инцидентот и во такси-компанијата каде што возачот бил вработен, по што тој бил отпуштен од работа.
Од МВР велат дека се преземаат мерки за целосно расчистување на случајот.
Црна хроника
Сведок почина во граѓанскиот суд во Скопје

Вчера во полицијата било пријавено дека во Основниот граѓански суд Скопје починал З.Д., кој бил сведок на судење.
Лекар од Итната медицинска помош констатирал смрт, а по наредба на јавен обвинител, телото на починатиот е дадено на обдукција, соопшти МВР во дневниот полициски билтен.
Црна хроника
Пациент во Тетово нападнал лекар и полицаец во болница

Полицијата од Тетово вчера попладне го приведе М.М. (28) од селото Челопек, по пријава дека во Клиничката болница во Тетово агресивно се однесувал кон медицинскиот персонал и физички го нападнал Л.А. (31) од село Желино, лекар кој се обидувал да му укаже лекарска помош.
Според МВР, по пристигнувањето на полицијата, осомничениот продолжил со агресивното однесување и нападнал и еден од полициските службеници.
М.М. е задржан во полициска станица, а по целосно документирање на случајот против него ќе биде поднесена соодветна пријава.