Европа
Германски виролог: Прашање е дали новиот вид коронавирус е виновен за брзото ширење или недоволно рестриктивните мерки
Прашање е дали новиот вид коронавирус е виновен за забрзаниот раст на бројот на случаи на југоистокот на Англија или за нешто друго, смета водечкиот германски виролог Кристијан Дростен.
Зборувајќи за новиот вид коронавирус што се појави во Велика Британија, Дростен се сомнева дека мерките не биле добро почитувани или дека не биле доволно строги.
„Изјавите дека овој вид е 70 проценти позаразен од претходните не се ништо друго, освен тврдења на политичари. Одеднаш се појави тој број и никој не знае што значи тоа“, рече Дростен, раководител на одделот за вирологија на универзитетската болница „Шарите“ во Берлин, една од најголемите во Европа, за радио „Дојчландфунк“.
Дростен смета дека во моментот нема доволно податоци за да се каже дали новиот вид вирус е поопасен од претходните. Тој додава дека таквите податоци може да пристигнат за неколку недели. Тој смета дека можеби новиот вирус не е виновен за брзото ширење на вирусот на југоистокот на Англија, пренесува „Спутник“.
„Прашање е дали вирусот е виновен или станува збор за локално жариште или, пак, можеби епидемиолошките мерки не беа доволно строги, а потоа пренесувањето се случи во област каде што владееше нов вид. Прашање е дали тој нов вид предизвика бран на инфекција или тој бран само го донесе“, рече Дростен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Германските угостители не можат да најдат доволно работници за Европското првенство
Германските ресторани и хотелиери очекуваат рекорден број посетители за време на Европското фудбалско првенство, но истовремено стравуваат од недостаток на кадар, пишуваат германските медиуми.
„Речиси е невозможно да се најде персонал на пазарот, ќе мораме да управуваме и да привлекуваме персонал од други гранки преку приватни агенции за посредување за одреден временски период“, вели Сами Нофал, менаџер на паркхотелот Хајнер во Гелзенкирхен во Западна Германија, каде, меѓу другото, се одржуваат натпревари.
Во склоп на хотелот има и голема тераса на која ќе биде организирано јавно гледање на натпреварите на ЕП, кои ќе се одржат во Германија од 14 јуни до 14 јули.
Персоналот „позајмен“ за време на натпреварите ќе чини значително повеќе, но немаме излез“, вели Нофал.
На рестораните низ Германија им е тешко да најдат нов персонал во нивната земја пред Европското првенство, кој делумно ја напушти индустријата за време на пандемијата на коронавирус.
Синдикатот на вработени во хотелиерството и угостителството НГГ смета дека работниците го свртеле грбот на угостителството и хотелиерството и дека во голема мера не се вратиле по пандемијата поради традиционално ниските саатници.
„Ова, како што покажа анкетата меѓу нашите членови, е главната причина поради која персоналот му врти грб на угостителството“, велат од НГГ.
По правило, рестораните им плаќаат на своите вработени околу 13 евра на час за келнери.
Здруженијата на угостители причината за кадровските проблеми ја гледаат пред се во „академизацијата“ на општеството и демографските промени.
Критичарите на социјалната политика на актуелната власт посочуваат дека на овие работни места тешко се придобиваат милионите бегалци кои од 2015 година пристигнаа во Германија бидејќи по правило социјалните бенефиции се повеќе од заработувачката во угостителството. Покрај тоа, бегалците и барателите на азил генерално не зборуваат доволно добро германски за да работат директно со клиентите.
И покрај проблемите со персоналот, рестораните и хотелиерите очекуваат позитивен биланс на претстојното ЕП во Германија и слични поволни ефекти како за време на одржувањето на СП 2006 во Германија.
Европа
Столтенберг: Украина се уште може да победи, но само со поддршка на НАТО
Генералниот секретар на НАТО Јенс Столтенберг денеска изјави дека „дојде време“ членките на алијансата да преиспитаат некои од ограничувањата за употребата на оружјето што и се доставува на Украина за борба против Русија.
„Сојузниците ја снабдуваат Украина со различни видови оружје и некои воведоа ограничувања за употребата на ова оружје, тоа се национални одлуки. Но, мислам дека, со оглед на начинот на кој се одвива војната, дојде време да се разгледаат тие ограничувања и да се дозволи Украина вистински да се одбрани“, рече Столтенберг во Прага на состанокот на министрите за надворешни работи на НАТО.
Украина го повика Западот да ги ублажи тие ограничувања, но државите се повеќе се поделени околу тоа дали да и дозволат на Украина да гаѓа цели на руска територија.
Според Столтенберг, Украина сепак може да ја победи Русија, „но само со постојана силна поддршка од сојузниците во НАТО“.
Британија, балтичките земји и Данска тврдат дека тоа е дел од легитимната самоодбрана од инвазија, додека други велат дека оружјето може да се користи само во Украина, изразувајќи стравувања дека нападите врз Русија ќе го вовлечат Западот во конфликтот.
Белгија оваа недела соопшти дека авионите Ф-16 што има намера да ги испорача на Украина може да се користат само во нејзините граници.
Германија издаде слични предупредувања за своите испораки на тешко оружје, вклучително и тенкови Леопард.
Европа
Украина: Русија собира сили во близина на Харков, но недоволно за голем напад
Русија ги собира силите во близина на северниот дел на украинскиот регион Харков, каде што започна офанзива овој месец, но сè уште нема доволно војници за голем напад во областа, изјави главниот командант на Украина.
Украина соопшти дека ја стабилизирала линијата на фронтот во североисточниот регион Харков, каде што руските сили започнаа прекугранична офанзива на 10 мај, што отвори нов фронт во 27-месечната војна и ги развлече помалку бројните сили на Киев.
Генерал-полковник Олександар Сирски рече дека Русија продолжува да испраќа дополнителни полкови и бригади од други области и полигони за обука за да ги зголеми своите сили на две главни линии на напад на северот на регионот Харков.
Ова ја вклучува областа Стрилеча-Липци помеѓу две мали села и околината на пограничниот град Вовчанск каде што се водеа улични борби. „Овие сили во моментов не се доволни за офанзива од големи размери и за пробив на нашата одбрана“, рече Сирски во изјавата за апликацијата за пораки Телеграм.
Украинскиот Генералштаб соопшти дека неговите сили продолжуваат да ги зајакнуваат нивните одбранбени линии во областа и го одбиле рускиот напад во четвртокот во близина на селото Старица на Харковскиот фронт.
Портпаролот на Националната гарда Руслан Музичук изјави дека руските сили не постигнале никаков напредок во регионот Харков во текот на изминатиот ден. Сирски рече дека „создавањето резерва за муниција“ на Украина ги намали и офанзивните способности на руските сили.
Соединетите Американски Држави конечно одобрија голем пакет помош за Украина во април по неколку месеци одложување. Американскиот државен секретар Ентони Блинкен во средата рече дека американското оружје што е испорачано помага да се стабилизираат украинските борбени линии.