Свет
(Видео) Пет светски настани што ја одбележаа 2020, а не се за коронавирусот
Кога ќе се спомене 2020 година, сите веднаш помислуваат на Kовид-19 и тоа е во ред. Но, оваа година имаше и други светски настани што ќе влијаат на случувањата во годините што претстојат.
Макар и без пандемијата на коронавирусот, идните историчари 2020 година ќе ја сметаат за година полна со настани што го сменија светот.
Од претседателските избори во Америка до повеќемесечните протести против „последниот европски диктатор“, ова се пет настани што ќе го обликуваат светот во следните години.
Бајден го победи Трамп на изборите во САД
Очите на целиот свет во ноември беа свртени кон САД – и сите едвај чекаа да дознаат дали најголемата економска и воена сила на светот ќе ја води Доналд Трамп уште четири години или ќе му биде препуштена на демократскиот кандидат Бајден.
Иако изборите беа одржани на 3 ноември, борбата беше тесна и неизвесна во некои клучни земји, па дури по неколку дена, Џо Бајден беше проектиран како победник додека броењето на гласовите продолжи.
Сепак, Трамп не го прифати поразот велејќи дека изборите се лажни и дека станува збор за изборна измама од страна на демократите, без да наведе докази.
Бајден победи со рекордни 81.283.385 гласа наспроти 74.2223.744 на Трамп, а Изборниот колеџ ја потврди победата на Бајден – 306 изборни гласа, а Трамп освои 232.
Велика Британија излезе од Европската Унија
Велика Британија официјално ја напушти Европската Унија на 31 јануари оваа година – но, со преоден рок како дел од договорот за повлекување.
Ова е првпат некоја држава да го напушти блокот, а долгорочните последици допрва треба да се видат.
Напуштањето се случи четири години по референдумот, а земјата за тоа време смени дури тројца премиери. Сагата траеше до крајот на 2020 година, а Велика Британија и ЕУ се бореа за трговскиот договор и другите аранжмани.
Европската Унија и Велика Британија постигнаа трговски договор по неколкумесечни несогласувања во врска со правата за риболов и идните бизнис-правила.
Договорот е постигнат една недела пред истекот на транзицискиот период на брегзитот.
Револуција во Белорусија
Александар Лукашенко, кого некои го нарекуваат последен диктатор на Европа, победи на претседателските избори во август, тврди неговиот режим.
Сепак, западните влади, ЕУ и голем дел од белоруското население не се согласуваат тврдејќи дека изборите биле наместени во корист на Лукашенко, кој е претседател 26 години – и е единствениот претседател што некогаш го имала земјата.
Предводена од коалиција на жени лидери, опозицијата забележа огромна поддршка во јавноста во изборниот круг, а по објавувањето на резултатите, се одржаа невидени протести во целата земја.
И покрај репресијата од страна на државните безбедносни сили, која опфаќаше илјадници апсења, обвинувања за тортура и смрт на голем број активисти, протестите продолжуваат да се одржуваат на улиците на Минск и другите градови.
Лидерот на опозицијата, Светлана Тихановскаја, беше противкандидат на изборите по апсењето на нејзиниот сопруг. Оттогаш се наоѓа во егзил, а другите опозициски лидери се принудени да ја напуштат земјата или се во затвор.
Оставка на владата во Бејрут по катастрофалната експлозија во пристаништето
Речиси 200 лица загинаа, а илјадници беа повредени во катастрофалната експлозија во пристаништето Бејрут на почетокот на август.
Но, последиците од таа експлозија ги надмина штетите, смртта и уништувањето што го предизвика, што на крајот доведе до оставка на владата по негодувањето во јавноста и меѓународниот свет.
Попладнето на 4 август, огромна експлозија, толку моќна што се почувствува и на стотици километри оддалеченост, во Израел и на Кипар, го потресе Бејрут.
Официјални лица изјавија дека тоа е предизвикано од согорување речиси 2.750 тони амониумнитрат, индустриско ѓубриво што стоело со години на пристаништето, неправилно складирано.
Потврдено е дека повеќе од 200 лица загинаа од експлозијата, илјадници беа хоспитализирани, а околу 300.000 луѓе останаа без покрив над главата поради широкораспространетата штета нанесена во поголемиот дел од градот.
Кога беше откриена причината за експлозијата, со потенцијално опасна супстанција што се чувала погрешно, се зголеми гневот во земјата.
Неколку дена по експлозијата – владата поднесе оставка
Премиерот на Либан, Хасан Дијаб, е само еден од официјалните лица што се соочуваат со обвиненија за експлозијата. Судијата што ја поднесе тужбата рече дека министрите добиле неколку предупредувања за амониумнитрат и дека не презеле никакви мерки за да го спречат тоа што се случило.
Движењето Black Lives Matter се прошири на глобално ниво
Смртта на Афроамериканецот Џорџ Флојд (46), кој почина кога полицаец го стисна за вратот и клечеше врз него повеќе од осум минути за време на апсењето, доведе до големи протести не само во САД, каде што се случи инцидентот, туку и во целиот свет.
Флојд беше уапсен на 25 мај кога наводно се обидел да плати продукти со фалсификувани пари. Дерек Шовин, белец, полицаец од Минеаполис, клечеше врз неговиот врат, додека другите полицајци му помагаа да го задржи Флојд на земјата или ги спречуваа минувачите да помогнат.
Кога снимките од неговата смрт многу бргу се проширија и се споделуваа, имаше големи протести против полициската бруталност и расна неправда, првично локално, пред тие да се прошират во САД, а потоа и во целиот свет.
Имаше демонстрации во европските градови, каде што се појавија прашања за тековната расна нееднаквост, полициската бруталност и за историски прашања, како што е колонијализмот.
Движењето Black Lives Matter, основано во 2013 година по убиството на тинејџерот Трејвон Мартин, доби меѓународно внимание по смртта на Флојд, а организации беа основани во многу земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Британија воведува нова полициска единица слична на ФБИ
Британската влада денеска објави дека наскоро ќе претстави план за создавање нова полициска единица, слична на американското ФБИ, која би работела на сложени истраги, како што се борбата против тероризмот, измамите, злоупотребата на деца на интернет и разбивањето на криминални банди.
Полицијата ќе ја обедини работата на постојните агенции кои се занимаваат со тероризам и криминал, како и регионалните единици за организиран криминал во Англија и Велс.
Министерката за внатрешни работи Шабана Махмуд изјави дека новото тело ќе ги ослободи 43-те локални полициски сили во Англија и Велс и ќе им помогне да се фокусираат исклучиво на секојдневните злосторства во рамките на нивните јурисдикции.
„На некои локални сили им недостасуваат вештини или ресурси што им се потребни за справување со сложениот современ криминал, како што се измами, злоупотреба на деца на интернет или банди на организиран криминал“, рече таа.
Махмуд додаде дека сегашниот модел е „изграден за друг век“ и дека новото тело ќе привлече „талент од светска класа“, како и ќе ги намали трошоците со преместување на набавките во една национална единица.
Таа рече дека конечните предлози ќе бидат презентирани пред Парламентот утре, додека другите очекувани промени вклучуваат намалување на бројот на полицајци во Англија и Велс и промени во начинот на регрутирање и управување со полицијата.
Воведувањето на новата единица беше топло поздравено од полициските кругови, предводени од лондонската Метрополитенска полиција, која има водечка улога во борбата против тероризмот во земјата.
Свет
Форбс објави листа на најубавите крајбрежни места во Европа, Хрватска е број 1
Според изборот на организацијата „Европски најдобри дестинации“, објавен во списанието „Форбс“, Цавтат во Конавле е прогласен за најубав крајбрежен град во Европа за 2026 година. Во конкуренција од повеќе од 200 европски крајбрежни локации, ова мирно место на крајниот југ од Хрватска го освои првото место благодарение на комбинацијата од историја, архитектура и природна убавина.
Што го прави Цавтат посебен?
Цавтат е опишан како дестинација која успешно ги комбинира културното наследство, опуштениот медитерански начин на живот и визуелната привлечност на брегот. Градот е препознатлив по својата венецијанска архитектура, шеталиште обрабено со палми и комбинација од луксузни јахти и традиционални рибарски бродови. „Форбс“ наведува дека Цавтат е идеален за оние кои бараат мирно бегство покрај морето, исполнето со богата културна понуда.
Културни знаменитости како што се куќата на Влаха Буковац, најпознатиот хрватски сликар од 19 век, и Мавзолејот на семејството Рачиќ, изработен од скулпторот Иван Мештровиќ, се издвојуваат. Љубителите на природата можат да уживаат во прошетките по патеките на полуострововите Рат и Сустјепан или да се упатат кон видиковецот Соколов гребен. Препорака за сместувањеФорбс го препорачува хотелот Супетар, реставрирана вила од 1920-тите години, сместена веднаш до брегот. Тоа е петзвезден бутик хотел кој комбинира арт нуво естетика со интимна атмосфера и спектакуларен поглед од терасата на покривот.
За да се создаде рангирање на 15-те најубави европски крајбрежни дестинации, „Европските најдобри дестинации“ ангажираа експерти од туристичката индустрија и патници од дури 134 земји. Секоја локација е оценета според архитектурата и културното наследство, начинот на живот и софистицираноста, како и природната крајбрежна убавина. Емоционалниот впечаток, популарноста и желбата на патниците да се вратат или да ја посетат дестинацијата за прв пат беа исто така земени предвид.
Остатокот од престижната листаПокрај Цавтат, листата на најубави крајбрежни места во Европа за 2026 година вклучува: Касис, Франција Капри, Италија Љафранк, Шпанија Леричи, Италија Њукеј, Обединето Кралство Сен Тропе, Франција Патмос, Грција Санта Маргарита Лигуре, Италија Сен-Жан-Кап-Фера, Франција Портофино, Италија Динар, Франција Камоли, Италија Кадакес, Шпанија Хидра, Грција.
Свет
Најдено тело на четиригодишно дете кое паднало oд брод со мигранти
Крајбрежната стража на Грција вчеравечер уапси маж кој со брод се обидел да избега додека криумчарел мигранти, додека пак пред два дена, по дојава дека биле истоварени мигранти кај Икарија, властите пронашле тело на четиригодишно дете.
Патрола на крајбрежната стража го забележала бродот како се движи со голема брзина кон западниот брег на Хиос, по што започнала потера, а криумчарот отишол кон плажата Гларој каде ги „истоварил“ сите патници кои избегали.
Подоцна, Крајбрежната стража и локалната полиција подоцна пронајдоа 16 мажи, 11 жени и девет деца, по што биле однесени во прифатен центар на Хиос.








