Во периодот од 28 декември 2020 година до 3 јануари 2021 година од страна на седумте инспекциските служби се спроведени вкупно 5.718 надзори и контроли по основ на почитување на здравствените протоколи и материјалните закони.

Податоците покажуваат дека во овој период, во споредба со претходните надзори, 20 отсто е намален бројот на издадени решенија за изолација на лица заболени од коронавирус и на лица што биле во контакт со заболени лица.

Исто така, во делот на контролите што ги спроведува Државниот пазарен инспекторат регистрирано е намалување на бројот на затворени објекти, информира на прес-конференција претседателката на Инспекцискиот совет, Магдалена Филиповска-Грашкоска.

Во споредба со периодот од 21 до 27 декември, кога беа затворени 13 угостителски објекти, бројот на затворени угостителски објекти е намален повеќе од 60 отсто.

Државниот здравствен и санитарен инспекторат во периодот од 28 декември до 3 јануари изврши 74 надзори врз основа на кои изрече 6 решенија. Притоа овој Инспекторат во посочениот период издаде вкупно 4.576 решенија за изолација и домашно лекување на лица позитивни на Ковид-19 и лица што биле во контакт со заболени лица од Ковид-19. Анализирајќи ги бројките на издадени решенија за самоизолација, сè уште продолжува трендот на намалување, односно во однос на периодот од 20 до 27 декември (кога беа издадени 6.576 решенија), во текот на минатата недела се издадени 20 отсто помалку решенија за самоизолација.

Во истиот период инспекторите од Државниот пазарен инспекторат извршија 4.652 контроли и 278 надзори поврзани со почитување на здравствените протоколи за отворање и работа на кафетерии и угостителски објекти што послужуваат храна, Законот за заштита на потрошувачите; Законот за трговијата; Законот за нерегистрираната дејност; Законот за угостителската дејност; Законот за градежните материјали; Законот за занаетчиската дејност; Законот за енергетиката; Законот за метрологијата; Законот за безбедност на производите; Законот за заштита од пушењето.

При спроведените надзори изречени се 35 прекршочни пријави и 24 решенија за констатираните неправилности, како и 16 прекршочни платни налози. Од вкупниот број решенија, 5 се донесени поради непочитување на Законот за заштита на населението од заразни болести и Протоколот за работа на угостителските објекти, и тоа за 2 угостителски објекта во Битола и Тетово и за 1 угостителски објект во Струмица во кои не се почитувале работното време и ограничувањето за 4 лица на една маса. Во сите случаи изречена е мерка забрана за вршење дејност, односно тие се затворени за работа на самото место, а дополнително изречени им се и соодветни прекршочни платни налози. Во споредба со периодот од 21 до 27 декември (кога беа затворени 13 угостителски објекти), бројот на затворени угостителски објекти е намален повеќе од 60 отсто. За време на новогодишната ноќ, Државниот пазарен инспекторат во соработка со МВР спроведоа голем број заеднички контроли во угостителските објекти, но како што и веќе напоменав, беа констатирани мал број прекршувања, односно беа затворени 2 угостителски објекта (Струмица и Битола).

Во истиот период Инспекторат за транспорт изврши 29 надзори, при што за непочитување на материјалните закони изречени се: 1 прекршочна пријава и 1 прекршочен платен налог. Во однос на Законот за заштита на населението од заразни болести, минатата недела не се констатирани прекршувања, односно непочитување на протоколите за превоз на патници.

Државниот инспекторат за труд во изминатите 7 дена изврши 440 надзори во правни субјекти на територијата на целата држава со фокус на почитување на здравствениот протокол за превентивни мерки за сите работни места. Притоа Инспекторатот изрече 17 решенија и 1 прекршочен платен налог. Во овој период од страна на трудовите инспектори не се констатирани неправилности во согласност со Законот за заштита на населението од заразни болести и Протоколот за превентивни мерки за сите работни места.

Агенцијата за лекови и медицински помагала МАЛМЕД во истиот период спроведе 11 надзори во аптеки и веледрогерии по основ почитување на мерките на Владата, односно за формирани цени на заштитни средства против коронавирусот, при што не се констатирани неправилности.

Агенцијата за храна и ветеринарство изврши 207 надзори, при што издадени се 5 решенија, 14 едукации и 1 ППН по основ на нерегистриран оператор, непостапување по наредени мерки, неизвршени здравствени прегледи и неправилно складирање, чување и означување производи.

Државниот инспекторат за животна средина во текот на минатата недела изврши вкупно 27 надзори. Притоа, за констатираните неправилности од областа на животната средина инспекторите донесоа 2 решенија со задолжувања за подобрување на работата на правните субјекти.