Македонија
(Видео) Давидовиќ: Неодговорната власт на СДСМ ја поскапе водата во Куманово
Поради неодговорноста на локалната власт, почнувајќи од овој месец и секоја наредна година, кумановци ќе добиваат зголемени сметки за потрошена вода, обвини Милан Давидовиќ од ВМРО-ДПМНЕ.
„ЈП ‘Водовод’ – Куманово, наместо да се грижи за интересите на граѓаните, да го подобрува системот за водоснабдување, да ја намали загубата на водата низ водоводната мрежа, која е стара повеќе од 60 години, и да ја подобри слабата наплата на сметките за потрошена вода, нивниот врвен приоритет е посегнување по џебот на кумановци.
Сметаме дека поскапувањето на водата за пиење во Куманово, предложено од страна на Регулаторната комисија, е нереално и врз база на лоши финансиски извештаи на Јавното претпријатие. Затоа повеќе од неопходно беше потребно Советот на Општина Куманово да не даде согласност за оваа одлука на Регулаторната комисија, која, за жал, се усвои од советниците на СДСМ и ДУИ со 19 гласа ‘за’.
Ваквото посегање по џебот на граѓаните владејачкото мнозинство го направи само неколку дена предновогодишните празници и оваа штетна одлука ја протурка набрзина и надвор од очите на јавноста, со што кумановци се оптоваруваат со дополнителни финансиски издатоци во ситуација на пандемија и економска рецесија.
Оваа одлука на Регулаторната комисија за покачување на цената на водата за пиење во Куманово, како и начинот на кој беше донесена, ја сметаме за скандалозна и никако не смееше да биде изгласана во Советот на Општината.
Градоначалникот Максим Димитриевски, наместо да бара одговорност и да се спротивстави на ваквото поскапување на водата за пиење, тој ја премолчува целата оваа ситуација. Максим Димитриевски, СДСМ и ДУИ, по којзнае кој пат, го покажаа своето вистинско лице.
Додека повеќе од 50.000 граѓани на Република Македонија останаа без работа поради неспособноста на Владата да се справи со оваа економска криза предизвикана од пандемијата, а помеѓу нив и голем број кумановци, локалните власти зголемуваат такси и давачки, со кои дополнително ги осиромашуваат граѓаните. За вакво неодговорно и расипничко однесување одговорност мора да има и ќе има!“, порача Давидовиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајка на патот Радовиш – Штип, сообраќајот во прекин
Од 18:05 ч. сообраќајот на магистралниот пат Радовиш – Штип, во близина на „Алкопласт“, е во прекин поради сообраќајна незгода, соопшти АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Владата ќе ја одбележи 121 годишнината од смртта на Гоце Делчев
Владата на Република Северна Македонија, на 04.05.2024 година (сабота), ќе ја одбележи 121 годишнината од смртта на Гоце Делчев со положување свежо цвеќе на неговото вечно почивалиште, во црквата „Св.Спас“,Скопје.
По тој повод, во 10:30 часот, свежо цвеќе ќе положи претседателот на Република Северна Македонија, Стево Пендаровски, владина делегација предводена од Славјанка Петровска, министерка за одбрана во Владата на Република Северна Македонија, Каја Шукова, министерка за животна средина и просторно планирање во Владата на Република Северна Македонија.
Македонија
Димитриевски во Тетово: Ја бараме поддршката на граѓаните на претстојните избори за работите во Македонија да не бидат како досега
Претседателот на Движењето ЗНАМ – За наша Македонија, Максим Димитриевски денеска беше во Тетово, каде што со носителот на листата на кандидати за пратеници во ИЕ 6, Небојша Захариески и останатите кандидати, ја промовираа програмата на Движењето за претстојните парламентарни избори „Проглас за достоинствена Македонија“.
Димитриевски во изјавата за медиумите рече дека Движењето ЗНАМ – За наша Македонија се етаблираше како нова политичка сила на македонскиот политички простор токму со поддршката на граѓаните.
„Ја претставуваме програмата и ја бараме поддршката за нашите кандидати за пратеници предводени од господин Небојша Захариески во ИЕ 6. Јас знам дека никогаш повеќе ЗНАМ нема да дозволи нештата во државата да бидат исти. Ќе бидеме коректив на идната власт, но и на идната опозиција. Нашиот број секојдневно се зголемува, а и поддршката од граѓаните е се поголема и верувам дека заедно ќе успееме да ја вратиме државата таму каде што припаѓа, во рацете на граѓаните“.
Тој ги повика граѓаните масовно да ја дадат својата поддршка на Движењето ЗНАМ – За наша Македонија, на носителот на листата во ИЕ 6, Захариески, како и на сите кандидати за пратеници.
Со тоа, рече Димитриевски, граѓаните го даваат својот глас од граѓанин за граѓанин. Ние сме политички субјект кој расте токму со граѓанската поддршка. Продолжуваме понатаму со позитивни промени во државата, со позитивни промени во Македонија.
Носителот на листата во ИЕ 6, Небојша Захариески, рече дека со она што го нудат во програмата „Проглас за достоинствена Македонија“ сакаат да ги вратат илинденските и асномските темели на државата.
„Сакаме да ја направиме државата самоодржлива, со што ќе биде и самостојна. Сакаме да градиме стабилни меѓуетнички односи, а Тетово е симбол за добар соживот“, рече Захариески.
Тој додаде дека нивна цел е добро владеење, правна држава, како и запирање на клиентелизмот, непотизмот и корупцијата, со што, како што рече, ќе го дадат својот максимум за Македонија.